I Samuel 8:10-18
“Kră Yang khan: Hiap bĕ lu bơngai mă gơnang tơduă kon bơngai,hơ-đơ̆ng gơnang kơ sĕch akar pơm jơhngơ̆m pran kơtang. Lăm jơhngơ̆m achăng tŭk Kră Yang.”(Jêrêmi 17:5).
Nơ̆r jet tơchĕng pơwao:
– Kră Yang ‘Bok Kei-Dei athei ‘bok Samuel roi ăn lu bơngai Isơrael tơdrong kiơ?
– Nơ̆r Kră Yang tơ’bôh kơ lu bơ̆n dôm tơdrong tơpă sĭt gĭt kăl kiơ?
– Kơplah ‘bơ̆t anăp bơ̆n đei tơdrong kiơ ei wă kơ bơ̆n rơih tơdrong bơ̆n wă pơm,yua bơ̆n băt kơnăl kơ tơdrong sĭt tơpă đơ̆ng nơ̆r Kră Yang, nơ̆r Kră Yang noh tơgŭm bơ̆n thoi yơ lăm tơdrong bơ̆n rơih iŏk wă pơm noh?
Trong 10 tơ’bôh‘bok Samuel hlôi chu yom kơ Kră Yang lăm tôm tơdrong, “Samuel roi ăn kơ kon pơlei dôm nơ̆r Kră Yang đei khan gah tơdrong lu sư đei apinh sư wă kơ đei pơtao”mă khan sư băt ră kon pơlei kuă kơ mơ̆ng dôm lu nơ̆r ‘noh. Nơ̆r Kră Yang tơbăt lê̆ adrol tơdrong răm wă truh tơ’bôh nơ̆r sĭt gĭt kăl tơpă. Mă minh, ưh kơ trŏ kơ tôm tơdrong ‘lơ̆ng ngăl thoi lăng ‘bôh hơbŏ gah ‘nguaih sư ôh. Tơdah kon pơlei ‘maih wă kơ đei minh ‘nu “pơtao wă kơ pơgơ̆r lu nhôn, thoi lu adrĕch adrung nai mă đei pơtao pơgơ̆r.”(tr.5) lei lu sư athei răp sơng pŭ iŏk“tơdrong mă pơtao iĕm gô pơgơ̆r lu iĕm”(tr.11). Lu bơngai ala teh ling-lang kơ đei lu nơ̆r pơkă pơ’ngam hiôk‘lơ̆ng dêh mă-lei pĕng ôn lê̆ gah rŏng ‘noh tơdrong răm tih lĕch đơ̆ng nơ̆r pơkă hơlĕnh pơdăr.‘Bok Ađam păng yă Ewơ sơ̆ hlôi rơih iŏk nơ̆r Bơngai Hơlĕnh Pơdăr, ưh kơ rơih iŏk nơ̆r Kră Yang Tơ’ngla Sĭt Tơpă.(Blŭng 3:4-5). ‘Bok Lot kư̆m hlôi ăn kơ tơdrong hơbŏ ‘lơ̆ng lăm dêh Sôđôm, Gômôrơ “…thoi lĕ pơgar Kră Yang pơm, thoi char Êyip tơ ”noh hơlĕnh pơdăr sư (Blŭng a 13:10) lei na hlôi răm ba đơ̆ng anăn sư mă đe ư-ang noh,răm truh tơ hnam dơnŏ kon hơ’lơ̆p sư hloi.Tơdrong tơpă ‘nâu oei hơnơ̆ng trŏ truh tơ bơ̆n dang ei păng nơ̆r Kră Yang tơbăt lê̆ adrol tơdrong răm gô truh noh kăl dêh wă kơ bơ̆n lăng gĭt lăng kăl na tơchĕng pơwao mă tơpă.(I Yôhan 2:15-17). Mă ‘bar, trŏ kơ ‘Bok Kei-Dei ră mă-lei tơplih, lê̆ kơ kon bơngai dơ̆ng,tơdrong noh ưh kơ đei la-yơ ba ăn đei yua lơ̆ng hloh ôh. Nơ̆r mă lăm Hla bơar ‘nâu đei pơma hơđăl wă kơ bơ̆n băt kăl dêh noh lu nơ̆r ‘nâu: “rôp”, “iŏk” lăm trong 11,13,14,16; rôp dah iŏk ‘nei tơpă sư lăp minh nơ̆r đĕch wă khan “tơgar” dah “iŏk lê̆”tơmam kiơ ei,tơdrong kiơ ei đơ̆ng bơngai nai.Kon pơlei Isơrael ‘bônh kơ hiơt kơ Kră Yang Tơ’ngla mă dŏng pơklaih lu sư đơ̆ng đĭch đe Êyiptơ, na jơ ‘nâu lu sư apinh wă kơ ăn kơ lu sư đei minh ‘nu pơtao pơgơ̆r tơplih Kră Yang wă kơ đơ̆ng rŏng kơ ‘noh kơnh “lu iĕm gô pơm đĭch đam kơ sư”(17). Dang ei, lơ lu bơngai lui kiơ̆ Kră Yang mă-lei jơhngơ̆m oei trăp trĭn yua kơ khan Kră Yang “iŏk lê̆” tơdrong rơngei lu sư, mă-lei ‘noh lu sư ưh kơ băt kơ pôm oei lăm Kră Yang đĕch na gơh mơn đei tơdrong rơngei tơpă, rơngei wă arih tơdrong arih minh ‘nu bơngai mă Kră Yang pơjing trŏ kơ arih, ưh kơ pơm đĭch kơ dôm tơdrong hưch ham,’maih wă kiơ̆ kơ sĕch akar.(Yôhan 10:10)
Mă pêng, dah bơ̆n rơih iŏk pơm tơdrong kiơ, mă-lei rơih glăi, lei gô ba ăn kơ bơ̆n tơdrong răm tih, răm tong kơ khei sơnăm,tong kơ jơhnơr. ‘Bok Kei-Dei hlôi tơbăt ăn kơ kon pơlei Isơrael gah tơdrong răm wă truh kơ lu sư păng kon sâu lu sư, na dĭng truh tơ jơ lu sư băt kơnăl tơdrong răm noh lĕch đơ̆ng lu sư rơih pơm tơdrong ưh kơ trŏ,mă-lei jơ sư băt noh đĭ klui dêh bơih. Lu bơngai arăng kơ̆l krao apinh, ‘Bok Kei-Dei kư̆m kuă kơ mơ̆ng hloi ‘mơ̆i.(tr.18).
Nơ̆r tơbăt lê̆ adrol tơdrong răm wă truh noh tơbăt khưm thoi âu: Bơ̆n kĕch iŏk dôm kiơ mă bơ̆n rei bơih. Athei kơchăng,athei mă pơ’lơ̆ng dôm tơdrong kiơ mă bơ̆n rơih iŏk wă pơm,wă jang, “Iĕm ‘nĕ tơchĕng khan bơ̆n gơh hơlĕnh kơ ‘Bok Kei-Dei, yua kơ Sư băt tôm tơdrong.Bơ̆n pơtăm găr kiơ gô đei plei ‘nei tơpă” (Galati 6:7).
Ơ Kră Yang, apinh Ih mơnat kơ inh păng apinh Ih ăn ‘bai pơhrăm tơdrong hơ’mon ‘nâu ling-lang tơ’blŏk kơ inh kơplah rim wơ̆t inh tơ’bơ̆p tơdrong pơhlŭ pơlung, ‘noh pơhlŭ wă kơ inh rơih tơdrong kiơ nai dah bơngai bu nai tơplih kơ Ih.Mă đei tơdrong pơhlŭ wă kơ inh rơih iŏk tơdrong nai,bơngai plơ̆ng, apinh Ih tơgŭm inh ling-lang rơih Ih, rơih iŏk nơ̆r Ih wă kơ inh huay kơ răm, mă-lei đei pŭn hiôk. Inh krao khan yua anăn Kră Yang Yêsu Krist, Amen!
Bơ̆n rơih iŏk kiơ kơplah bơ̆n kơtơ̆ng dôm lu nơ̆r Kră Yang tơbăt lê̆ adrol tơdrong răm wă truh ‘bơ̆t Sư yua nơ̆r lăm Sơ̆p Hla bơar Sư tơbăt kơ bơ̆n noh?
Đŏk nơ̆r Kră Yang lăm pêng sơnăm: II Hơ’mon 12.
Kênh Youtube BHKTHN:
