Klei Aê Diê Blŭ: Klei Kbiă 23:10-13
Êlan kliăng: “Êjai năm hruê brei ih mă bruă, ƀiădah hruê tal kjuh brei ih mdei; čiăng kơ êmô leh anăn aseh dliê ih dưi mdei mơh, leh anăn anak êkei dĭng buăl mniê ih leh anăn mnuih tue dưi lŏ jing mơai.” (Klei Kbiă 23:12).
Klei êmuh ksiêm mĭn: Si ngă phung ƀuôn sang Israel djă pioh hruê leh anăn thŭn Sabat? Ya ngă Khua Yang kčah hruê leh anăn thŭn Sabat? Si ngă drei ƀuh klei khăp Aê Diê hŏng mnơ̆ng dhơ̆ng Ñu hrih mjing mơ̆ng Klei bhiăn Sabat anei? Ya klei hriăm drei mâo hlăm klei mdei Aê Diê brei leh?
Boh blŭ Saƀat jing mdei amâo dah mdei mă bruă. Drei hriăm leh kơ klei mdei hlăm hrue Sabat hlăm Klei bhiăn tal pă (Klei kbiă 20:8-11). Mơ̆ng hlăm wưng Aê Diê hrih mjih lăn adiê hlăm năm hruê, hruê tal Kjuh Ñu mdei leh anăn hơêč hmưi kơ hruê mdei (Sabat), mjing hruê doh jăk (Klei Mphŭn Dơ̆ng 1:1-2:3). Êlan 12 mñă kơ phung ƀuôn sang Aê Diê thâo săng: Aê Diê mkŏ mjing hruê Sabat čiăng kơ anak mnuih leh anăn hlô mnơ̆ng dưi mdei čiăng lŏ mâo ai ktang leh năm hruê mă bruă suaĭ êmăn. Grăp čô mnuih hlăm ƀuôn sang Aê Diê mdei sơaĭ hlăm hruê năm čiăng hrăm mbĭt lŏ hdơr klei mdei Aê Diê brei čiăng bi kjăp klei bi hguôp hŏng Aê Diê leh anăn hdơ̆ng phung drei.
Ăt sa klei bhiăn anăn, thŭn Sabat jing thŭn phung ƀuôn sang Israel mdei buh pla leh năm thŭn buh pla čiăng kơ lăn dưi mdei, lŏ klei bi kna mnơ̆ng tŭ jing hlăm lăn. Hlăm thŭn Sabat, phung ƀuôn sang Israel amâo buh pla ôh ôh, digơ̆ mdei ƀiădah ăt djăp mnơ̆ng ƀơ̆ng huă kyua pioh leh hlăm năm thŭn êlâo anăn. Hjăn phung dleh dlan ƀun ƀin amâo mâo klei găl mkăm pioh mnơ̆ng ƀơ̆ng huă, Aê Diê mkăp kơ digơ̆ mnơ̆ng ƀơ̆ng hlăm dŭm boh mnga mơ̆ng yan êlâo êluh, čăt leh anăn mboh. Klei mkăp mơ̆ng Aê Diê êbeh dlai kơ phung ƀun ƀin kyua ăt adôk mâo mnơ̆ng adôk kơ hlô mnơ̆ng ƀơ̆ng (êlan 11). Klă sĭt Aê Diê ăt dôk kiă kriê djăp mta mnơ̆ng, Ñu khăp leh anăn răng mgang djăp mta mnơ̆ng Ñu hrih mjing mâo: anak mnuih, mnơ̆ng rông, hlô mnơ̆ng hlăm dliê, lăn ala leh anăn ana boh kroh djăp mta mnơ̆ng. Aê Diê amâo brei ôh klei bhiăn ktang phĭt ƀiădah Ñu bi hriăm klei yuôm bhăn, êlam, bŏ hŏng klei Ñu khăp. Knŏng djuê ana Israel kriê pioh hruê leh anăn thŭn sabat hluê si Klei Aê Diê Blŭ mtă čiăng bi êdah klei huĭ mpŭ kơ Aê Diê leh anăn khăp kơ phung knap mñai, ƀun ƀin, leh anăn Aê Diê sĭt suôr rông leh diñu trei mđao hŏng mnơ̆ng dhơ̆ng jăk hĭn.
Êlan 13 msĕ si sa klei klah čŭn, bi hdơr phung ƀuôn sang Aê Diê brei thâo Yêhôwa Aê Diê jing Aê Diê Kpă Ênô bŏ hŏng klei myang amâo pô msĕ, Ñu khăp nanao leh anăn kriê dlăng digơ̆, čiăng kơ diñu thâo huĭ mpŭ kơ Aê Diê leh anăn djă pioh djăp klei bhiăn Aê Diê mtă leh.
Khua Yang Yêsu lač: “Aê Diê mjing hruê sabat pioh kơ mnuih, amâo djŏ ôh mjing mnuih pioh kơ hruê sabat” (Y-Markôs 2:27). Hruê anei, drei pioh hruê mdei mơ̆ng Aê Diê amâo djŏ kyua klei tŭ dưn mơ̆ng hruê Sabat ôh ƀiădah kyua klei tŭ dưn kơ phung drei.
Ya klei yuôm bhăn hruê leh anăn thŭn Sabat hŏng phung drei?
Ơ Khua Yang! Klei Khăp Ih bi êdah hlăm klei bhiăn Ih! Akâo kơ Ih brei kơ kâo klei thâo mĭn čiăng thâo săng leh anăn čiăng hluê ngă djăp klei bhiăn Ih, čiăng kơ dưi mdei, ba klei tŭ dưn kơ kâo pô leh anăn kơ djăp mta mnơ̆ng Ih hrih mjing.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 21:1-20
Kênh Youtube BHKTHN:
https://www.youtube.com/channel/UCaSY8ebjVfMKhPups5jZ9yw
