Mathiơ 6:6
“Dah iĕm wă krao khan, iĕm athei tang ‘măng kơdrô̆ tơ anih hrĕp. Iĕm krao khan thoi noh na iĕm tơchĕng truh tơ ‘Bă bơ̆n Yang mă bơ̆n ưh kơ gơh ‘bôh. Mă iĕm krao khan tơ anih hrĕp Sư kư̆m ‘bôh mơ̆n, Sư ăn tơdrong iĕm apinh noh tơpă.” (Mathiơ 6:6)
Nơ̆r jet tơchĕng pơwao:
– Kră Yang Yêsu đei tơ’bôh tơblang hơyơ lăm tơdrong krao khan?
– Tơdrong kăl tơm hơyơ wă kơ tơdrong krao khan gơh đei Kră Yang hiôk lăp đon?
– Hơyơ tơdrong mă lu bơ̆n kăl kơ tơplih lăm chăl arih krao khan?
Đĭ đăng bơngai lui lăm lu tơdrong lui đei krao khan ngăl, păng kư̆m đei lơ bơngai lui kơ Yêsu Krist kư̆m oei krao khan nhen thoi lu bơngai tam mă lui kơ Kră Yang kư̆m krao chă yang lu sư. Lăm ‘bai bơtho tơ kơpal kông, Kră Yang pơma kơ lơ tơdrong arih ‘lơ̆ng kơ lu kon pơlei Dêh Char ‘Bok Kei-Dei păng kăl tơm Sư lăm Mathiơ 6:6, Kră Yang pơma kơ tơdrong lu bơngai Juđê ling lang kơ pơm kiơ̆, mălei tơdrong lu sư pơm kiơ̆ noh ling lang ưh kơ trŏ ‘blep, ‘noh jơ̆ tơdrong krao khan.
Kơplah bơtho gah tơdrong krao khan mă tơpă. Kră Yang Yêsu ưh kơ pơma: “Tơdah ih krao khan…” mălei Sư khan: “Kơplah ih krao khan…” thoi noh krao khan jơ̆ tơdrong trŏ tơpă. Păng Sư bơtho gah tơdrong trong gơlong wă pơm kiơ̆, “mălei kơplah ih krao khan, athei mơ̆t tơ anih hrĕp kơdrô̆, tang ‘măng…”, tơdrong ‘noh wă khan krao khan jơ̆ tơdrong trŏ thoi noh tơpă lăm anih kơdrô̆. Kră Yang Yêsu bơtho pơtrơp dơ̆ng: “mălei kơplah ih krao khan, athei mơ̆t tơ anih hrĕp kơdrô̆, tang ‘măng. Iĕm krao khan thoi noh iĕm tơchĕng truh tơ ‘Bă…” Thoi noh, krao khan jơ̆ tơdrong jang trŏ thoi noh tơpă lăm anih hrĕp kơdrô̆ jơ̆ lu bơngai mă krao kơ Kră Yang ‘Bok Kei-Dei ‘Bă, dah pơma pha ‘biơ̆ dơ̆ng ‘noh jơ̆ lu kon ‘Bok Kei-Dei.
Đe bu kon Kră Yang lĕ? Gah tơdrong bơ̆n ‘bôh băt kơ Kră Yang pơjing tôm tơdrong lei đĭ đăng bơngai kon Kră Yang (Tơdrong jang 17:28). Mălei, tơdah wă pơma tơpă sư lu kon ‘Bok Kei-Dei, Pah ‘Nao bơtho tơ’bôh gah dôm lu bơngai bu mă lui sơng iŏk Kră Yang Yêsu. Thoi noh, nơ̆r krao khan tơpă đei pơyơ̆r ăn kơ Kră Yang ‘Bă ‘noh yua đơ̆ng Kră Yang Yêsu. ‘Noh jơ̆ tơdrong kơnhăm lu bơ̆n pơtôch nơ̆r krao khan hăm nơ̆r: “Yua anăn Kră Yang Yêsu Krist”. ‘Nâu ưh kơsĭ kơ nơ̆r pơlơ̆k pơle ưh kơ yua thoi chă bơlăm kư̆ kă. Mălei ‘noh jơ̆ minh tơdrong băt tơpă, tơdah ưh kơ đơ̆ng tơdrong Kră Yang Yêsu lôch păng iung arih lei lu bơ̆n ưh kơ gơh năm jê̆ Kră Yang ‘Bok Kei-Dei păng krao khan hăm Sư (Hêbrơ 10:19-22). Hloh kơ noh dơ̆ng, Sơ̆p Hla bơar ‘Bok Kei-Dei oei bơtho nơ̆r krao khan tơpă gơh pơyơ̆r kơ Kră Yang ‘Bă đơ̆ng Kră Yang Yêsu ‘mơ̆i păng oei lăm Yang Bơhngol ‘Lơ̆ng (Êphêsô 2:18; Rôm 8:26-27).
Thoi noh, krao khan jơ̆ minh tơdrong trŏ tơpă lăm tơdrong oei hreh, kơdrô̆ kơ dôm lu bơngai mă lui sơng iŏk Kră Yang Yêsu, jơ̆ tơdrong tơ’bưh hăm Kră Yang lăm anih hrĕp kơdrô̆ lăm lu bơngai lui kơ Yêsu Krist hăm ‘Bok Kei-Dei. Krao khan ưh kơsĭ chă pơm gah ‘nguaih lăm tơdrong lui, kư̆m ưh kơsĭ wă chă pơhiôk lăm jơhngơ̆m ôh, mălei krao khan ‘noh jơ̆ tơdrong tơ’bưh lăm kon ‘Bok Kei-Dei hăm Kră Yang. Yua kơ thoi noh, krao khan jơ̆ tơdrong jang kăl lăm “hnam dơnŏ” jơ̆ tơdrong jang wă kơdih tơ’bưh ‘Bă kon. Dah wă pơma jing kon Kră Yang bơih athei krao khan hăm Sư.
Lu bơ̆n hăm kon Kră Yang tơpă păng bơ̆n hăm tơ’bưh păng Kră Yang lăm tơdrong krao khan ưh?
Ơ Kră Yang, bơnê kơ Ih yua kơ Ih dŏng pơklaih inh, chông ba inh mơ̆t lăm hnam dơnŏ ‘Bok Kei-Dei păng ăn pŭn hiôk gơh tơ’bưh hăm Ih lăm tơdrong krao khan. Apinh Ih tơgŭm inh ling lang oei jê̆ Ih wă kơ rim năr rai hlôh băt kơ Ih, băt kơ lăm jơhngơ̆m Ih, păng đơ̆ng noh arih pơm kiơ̆ trŏ thoi Ih lăp đon rai hloh. Yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Pơđơ̆k 17
Kênh Youtube BHKTHN:
