Klei Aê Diê Blŭ: Klei Bi Hriêng 20:5, Y-Êsai 11:1-5
Êlan kliăng: “Klei mĭn mnuih jing msĕ si êa êlam, ƀiădah mnuih thâo săng thâo djăt mă mơ̆ng anăn” (Klei Bi Hriêng 20:5)
Klei êmuh ksiêm mĭn: Ya ngă klei mĭn hlăm ai tiê phung ƀai dưi bi hmô hŏng êa êlam? Si boh jhat phung mâo klei mĭn ƀai? Ya ngă dŭm bruă ngă ƀai, klei mĭn ƀai ăt srăng êdah?
Hlăm Klei Bi Hriêng 20:5, Mtao Salômôn bi hriăm kơ klei mĭn ƀai hlăm ai tiê mnuih. Ñu brei ƀuh klei mdê plah wah “klei mĭn mnuih” hŏng boh tŭ mơ̆ng “mnuih thâo săng”. Klei mĭn anak mnuih msĕ si êa êlam snăk. Bi hmô hŏng kbăng êa êlam hŏng klei čiăng lač anak mnuih bi mĭn klei mĭn anăn amâo dưi ƀuh ôh, amâo dưi sô̆ djă ênưih ôh, amâo ênưih msir mgaih, leh anăn snăn êa êlam lŏ mâo lu klei huĭ hyưt. Ai tiê anak mnuih ăt snăn mơh, dưi mdăp hgăm klei mĭn măk ƀai. Ti ƀô̆ mta mơak mñai, ƀiădah hlăm ai tiê mâo klei mĭn ƀai snăk. Dŭm klei mĭn hgăm hlăm ai tiê phung ƀai amâo mâo kñăm pioh kơ klei tŭ dưn êpul êya ôh ƀiădah knŏng bi hrăp klei mgao pô. Čiăng bi hgăm klei mĭn ƀai anăn, phung ƀai bi hgăm, mdăp hgăm snăk, mplư mnêč snăk huĭ arăng ƀuh hĕ.
Boh blŭ “djăt mă” hlăm klei blŭ Hêbrơ jing “mă mơ̆ng anôk êlam čiăng dŏng mtlaih mnuih”, brei drei ƀuh wăt tơdah êa êlam dưn mơh, mnuih thâo săng ăt mâo hdră djăt mă êa. Wăt tơdah mdăp hgăm dưn mơh, ya bruă ƀai ăt srăng bi êdah mơh, klei kpă ênô srăng dưi bi mngač.
Khua pô hưn êlâo Y-Êsai bi êdah kơ Khua Yang Yêsu snei: “Ñu srăng hơ̆k mơak hlăm klei huĭ mpŭ kơ Yêhôwa. Ñu amâo srăng phat kđi tui si ală ñu ƀuh ôh, kăn ñu srăng čuăn čiăng ngă rei tui si knga ñu hmư̆. Ƀiădah ñu srăng phat kđi phung kƀah mnơ̆ng hŏng klei kpă ênô, ñu srăng čuăn čiăng ngă klei djŏ kơ phung ƀun ƀin ti lăn ala. Ñu srăng čăm lăn ala hŏng giê hnuăt kbiă mơ̆ng ƀăng êgei ñu, leh anăn hŏng êwa mơ̆ng ƀăng kƀông ñu, ñu srăng bi mdjiê phung ƀai” (Y-Êsai 11:3-4). Djăp klei soh brei bi kmhal. Đăm ôh yua klei dưi, klei thâo mĭn amâodah ngăn drăp duah mnêč ngă jhat kơ mnuih. Amâo mâo ôh ya klei soh hgăm dưi mdăp hŏng Aê Diê “Kyuadah ală Yêhôwa dlăng tar ƀar lăn ala” (II Klei Yăl Dliê 16:9).
Akâo kơ Aê Diê mñă kơ drei hdĭp kpă ênô, thâo săng wăt tơdah drei ngă lu mnêč dưn mơh ăt kăn dưi mdăp mơh, dŭm klei măk ƀai anăn dưi mdăp kơ anak mnuih dưn mơh ƀiădah kăn dưi mdăp mơh Pô Thâo Jih Jang. Dŭm bruă măk ƀai êlâo êdei ăt tŭ klei anak mnuih leh anăn Aê Diê bi kmhal. Êngao anăn, brei drei jih ai tiê đăo knang kơ Khua Yang, thâo kral Ñu hlăm djăp êlan, Ñu srăng ktrâo, srăng đru drei thâo kral kơ klei mĭn phung ƀai čiăng thâo ñĕ đuĕ. Mbĭt anăn Aê Diê ăt hơêč hmưi, bi kpă êlan drei (Klei Bi Hriêng 3:5-6).
Hlăm ai tiê drei mâo ya klei mĭn amâo jăk dôk mdăp anak mnuih, mdăp Aê Diê mơ̆?
Wah lač: Ơ Aê Diê, akâo kơ Ih pap brei kơ kâo kyua lu blư̆ kâo amâo kpă ênô hŏng pô mkăn, ngă soh hŏng Ih kơ klei mĭn, bruă ngă hgăm. Akâo kơ Ih brei kâo huĭ mpŭ kơ Ih nanao leh anăn êbat hlăm klei Yang Mngăt Jăk ktrâo lač.
Dlăng Klei Aê Diê Blŭ hlăm tlâo thŭn: Y- Mathiơ 25:31-26:25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
