Klei Aê Diê Blŭ: Kôlôs 3:15-17
Êlan kliăng: “Brei klei êđăp ênang Krist kiă kriê hlăm ai tiê diih. Kơ klei anăn Aê Diê iêô leh diih hlăm sa asei mlei. Leh anăn brei diih thâo hdơr knga.” (Kôlôs 3:15)
Klei êmuh ksiêm mĭn: Si klei khua ƀĭng kna Y‑Pôl wah lač brei kơ phung đăo ti Kôlôs? Ya klei ñu mtă brei diñu ngă? Ya mta klei ñu kñăm? Si drei bi êdah klei thâo hdơr knga nanao kơ Khua Yang hlăm knhuah hdĭp drei?
Êlâo kơ bi ruê̆ trăn lač kơ klei hdĭp mrâo hlăm Yang Krist, khua ƀĭng kna Y‑Pôl wah lač kơ phung đăo ti Kôlôs. Mâo dua mta klei yuôm hlăm klei ñu wah lač kơ diñu, jing klei êđăp ênang leh anăn Klei Blŭ Yang Krist kiă kriê leh anăn bŏ dlai hlăm ai tiê (êlan 15-16). Ăt jing dua mta phŭn brei grăp čô phung đăo bi knal nanao. Brei klei êđăp ênang Krist plah kluôm jih leh anăn kiă kriê ai tiê phung anak ƀuôn sang Aê Diê hlăm jih jang klei truh. Mơ̆ng anăn kơh drei dưi bi êdah klei thâo hdơr knga kơ Khua Yang hlăm jih jang klei. Klei Aê Diê Blŭ jing Klei Blŭ thâo mĭn leh anăn yuôm bhăn brei mâo hlăm klei hdĭp mngăt myang drei (Klei Mmuñ Hđăp 119:105). Sa čô đăo ƀiădah amâo thâo Klei Aê Diê Blŭ amâo dưi dôk kjăp hlăm klei đăo ôh. Kyuanăn, khua ƀĭng kna Y‑Pôl akâo brei Klei Aê Diê Blŭ bŏ dlai hlăm klei hdĭp phung đăo čiăng kơ drei dưi hdĭp hŏng klei thâo mĭn, bi mơak kơ Aê Diê.
Čuê tluôn, khua ƀĭng kna Y‑Pôl hưn mdah dŭm klei mtă mtăn yuôm kơ klei hdĭp mrâo hlăm Khua Yang brei bi mâo. Mta klei ñu kñăm êdi hlăm jih tlâo êlan Klei Aê Diê Blŭ anei jing klei thâo hdơr knga. Tơdah mâo klei êđăp ênang Khua Yang “kiă kriê” hlăm ai tiê srăng đru drei thâo hdơr knga kơ jih klei Khua Yang ngă leh kơ drei. Hlăm klei blŭ phŭn, boh blŭ “kiă kriê” jing boh blŭ yua hlăm bruă bi ktang asei mlei, čiăng lač kơ pô krơ̆ng hlăm klei bi lông. Hlăm drei ăt mâo nanao klei bi blah ti krah mnuih hđăp leh anăn mnuih mrâo. Klei êđăp ênang anei yơh jing pô krơ̆ng ba hriê leh klei hnŭk ênang, klei bi mguôp phung ƀuôn sang anak Aê Diê jing sa asei mlei hlăm Khua Yang. Kyuanăn, grăp kdrêč hlăm asei mlei brei thâo hdơr knga kơ Khua Yang čiăng dưi hdĭp hnŭk ênang hdơ̆ng găp.
Hŏng ai tiê thâo hdơr knga kơ Khua Yang, brei drei đru bi mtô mblang hdơ̆ng drei, yua klei mmuñ hđăp, klei mmuñ kkuh mpŭ, klei mmuñ doh jăk hŏng ai tiê bŏ hŏng klei mpŭ mni kơ Khua Yang. Hlăm knhuah hdĭp grăp hruê, ya mta klei drei blŭ amâodah ngă brei ngă hlăm Anăn Khua Yang Yêsu leh anăn “bi mni kơ Aê Diê Ama hlăm Ñu” (êlan 16b-17).
Klei thâo hdơr knga amâo djŏ knŏng bi êdah hlăm knhuah hdĭp hjăn mdê bi pô ôh, ƀiădah brei bi êdah wăt hlăm êpul êya phung ƀuôn sang Aê Diê. Khua ƀĭng kna Y‑Pôl hưn mdah tlâo blư̆ kơ klei bi mni lač jăk hlăm tlâo êlan anei tơdah ñu čih hră kơ phung đăo Phung Sang Aê Diê Kôlôs brei ƀuh hnơ̆ng yuôm kơ klei thâo bi mni lač jăk. Tơdah grăp čô phung anak Aê Diê hdĭp hŏng ai tiê thâo hdơr knga, Phung Sang Aê Diê bi êdah klei thâo hdơr knga snăn ai tiê klei mĭn thâo bi mni lač jăk srăng lar kơ lu mnuih. Phung mkăn dưi ƀuh sa klei hdĭp êđăp ênang, klei thâo hdơr knga hlăm klei blŭ, bruă ngă drei leh anăn diñu ăt čiăng jing msĕ snăn mơh.
Si ngă klei hdĭp drei bi êdah nanao klei thâo hdơr knga hŏng klei blŭ leh anăn bruă drei ngă mơ̆?
Wah lač: Ơ Khua Yang, akâo klei êđăp ênang Khua Yang kiă kriê hlăm ai tiê kâo leh anăn Klei Aê Diê Blŭ bŏ dlai hlăm kâo, čiăng kơ kâo bi êdah nanao ai tiê thâo hdơr knga kơ Khua Yang hlăm knhuah hdĭp grăp hruê.
Dlăng Klei Aê Diê Blŭ hlăm tlâo thŭn: Y‑Êsai 58
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
