Tơdrong Pơđơ̆k 23:22-25
“Răt bĕ tơdrong sĭt tơpă, ‘nĕ kơ tĕch lê̆. Iŏk tơdrong hơgei wei nơ̆r bơtho pơhrăm păng hlôh wao” (Tơdrong Pơđơ̆k 23:23)
Nơ̆r jet tơchĕng pơwao:
– Pơtao Sôlômôn bơtho kon sư tơdrong kiơ?
– Lĕch đơ̆ng tơdrong iŏk păng pơm kiơ̆ tơdrong hơgei thoi yơ?
– Tơdrong arih bơ̆n pơm kơ mĕ ‘bă chơt hiôk dah nhơ̆m ding đĭ đak măt?
Pơtao Sôlômôn bơtho kon sư tơdrong gĭt kăl lăm tơdrong chơ chă, sơng iŏk păng pơm kiơ̆ tơdrong gơh hơgei, kon hơ’lơ̆p oei ‘lơ̆p nge kăl kơ iŏk tơdrong hơgei đơ̆ng mĕ ‘bă. Nơ̆r “pơjing kơ ih” đei pơma lơ wơ̆t pơma ‘bơm kơ tơdrong tơ’bưh mĕ ‘bă păng kon hơ’lơ̆p. Pơjing kon kư̆m dai pơmat bơih, mălei bơtho kon hơ’lơ̆p kư̆m dai pơmat hloh dơ̆ng. Mĕ ‘bă athei bơtho kon hơ’lơ̆p tơm tơdrong pơm ‘lơ̆ng, tơdrong arih Kră Yang hơgăt. Kon hơ’lơ̆p athei băt hơđăl, hli yom kơ Kră Yang ‘Bok Kei-Dei jing tơm tơdrong hlôh wao (Tơdrong Pơđơ̆k 1:7), păng tơdrong “hơgei” blŭng a ih đei noh đơ̆ng mĕ ‘bă bơtho. Kră Yang pơma hơđăl kon pơlei Kră Yang athei bơtho tơdrong hơgei Sư kơ kon hơ’lơ̆p. Mĕ ‘bă athei bơtho kon hơ’lơ̆p thoi nơ̆r Kră Yang khan: “Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆. Wă truh tơ kră lu sư huay kơ weh đơ̆ng trong noh”. Kon gơh hơgei đei đon mơ̆ng kiơ̆ nơ̆r ‘bă bơtho khan (Tơdrong Pơđơ̆k 13:1), iŏk păng pơm kiơ̆ tơdrong hơgei ‘noh. Nơ̆r: “’Nĕ areh kơ mĕ đĭ kră pă kĕ jang” dah ‘nĕ kơ tĕch lê̆ tơdrong hơgei, bơtho tơ’blŏk kơ kon hơ’lơ̆p mă khan wơ̆ ‘lŏ kơjăp bơih, lei na dôm nơ̆r mĕ ‘bă bơtho kư̆m athei hơlen, ‘nĕ kơ tŭk nơ̆r bơngai hơgei mă pơjing ih.
Ưh kơsĭ kon hơ’lơ̆p iŏk tơdrong hơgei đơ̆ng mĕ ‘bă đĕch, mălei athei băt wă kơdih gơh wơ̆ ‘lŏ păng pơm kiơ̆ tơdrong hơgei. Nơ̆r “răt” “tĕch” pơma gah tơdrong mơdro sa. Đei tơjur tŏk, pơhuach wă kơ đei tơdrong hơgei. Mĕ ‘bă păng yă ‘bok gơh bơtho kơ kon hơ’lơ̆p, mălei lăp kon hơ’lơ̆p đĕch gơh sơng iŏk nơ̆r ‘Bok Kei-Dei lăm jơhngơ̆m, ôn hlơp păng chu tơ jur hơtŏk.
Tơdrong ‘lơ̆ng lĕch đơ̆ng kon hơ’lơ̆p iŏk tơdrong hơgei, đĭ jơhngơ̆m hli yom păng pơm kiơ̆ nơ̆r Kră Yang ưh kơsĭ ba tơdrong kĕ jei lăm chăl arih, tơdrong arih ling lang kơ kon hơ’lơ̆p đĕch ôh, mălei kư̆m ba ăn kơ mĕ ‘bă chơt hiôk ling lang. Lơ bơngai hơ’lơ̆p oei arih thoi bơngai kon tơklah đơ̆ng mĕ ‘bă (Luka 15:11-31). Sơngah ưh kơ mơ̆ng nơ̆r bơtho hơgei đơ̆ng mĕ ‘bă, năm kiơ̆ trong kơdih, pơm yoch hăm Kră Yang păng mĕ ‘bă, mă khan praih băt bơih wih brŏk lei na đêl rơka lăm jơhngơ̆m anat dêh wă tơsir, hiong jơ năr mă lơ ‘mơ̆i na gơh tơsir. Đei bơngai hơ’lơ̆p mơ’nah oei hơnơ̆ng pơm tơdrong yoch, đei lơ tơdrong sơ’ngon mơlâu. Lu sư pơm kơ mĕ ‘bă nhơ̆m hrơ̆ đak măt, hiong tơdrong chơt hiôk. Rim ‘nu kơ bơ̆n hơpơi mă khan mĕ ‘bă dah kon hơ’lơ̆p athei đĭ jơhngơ̆m bơtho, iŏk păng pơm kiơ̆ tơdrong hơgei Kră Yang wă kơ hnam dơnŏ ling lang chơt hiôk chhôk ‘nă.
Ơ Kră Yang, kơkuh bơnê kơ Ih đei ăn kơ inh đei ‘bă, đei mĕ bơtho nơ̆r Kră Yang ăn kơ inh. Apinh Yang Bơhngol ‘Lơ̆ng tơ’blŏk kơ inh đĭ jơhngơ̆m sơng iŏk păng pơm kiơ̆ tơdrong hơgei wă pơm kơ mĕ ‘bă hiôk, păng pơm hơdah anăn Kră Yang, yua anăn Kră Yang Yêsu Krist, Amen!
Bơ̆n kăl kơ tơplih tơdrong kiơ wă arih hơgei, pơm kơ mĕ ‘bă hiôk păng pơm hơdah anăn Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Pơđơ̆k 22
Kênh Youtube BHKTHN:
