Titus 3:2-5
Nqe cim:
“Koj yuav tsum qhia tej no rau sawvdaws, rau qhov yav tas los peb yeej yog neeg ruam, neeg tawv ncauj neeg ua txhaum, peb qaug rau kev phem kev qias thiab rau txhua yam kev lomzem. Peb lub siab niaj hnub xav phem, ntshaw luag tug thiab ib leeg ntxub ib leeg.” (Titus 3:3)
Lus nug rau sawvdaws xav:
– Cov ntseeg Yexus cheemtsum zeem paub ob yam tseemceeb twg kom ua tau lub neej raws li Vajtswv Txojlus qhia?
– Qhov kev zeem paub ntawd pab tau peb coj tus cwj pwm rau lwm tus li cas?
– Peb cheemtsum uas lub neej li cas kom tsimnyog qhov uas tus Tswv ua zoo rau peb?
Cov ntseeg Yexus yuav tsum ua neej kom Vajtswv tau ntsejmuag los ntawm kev ua haujlwm zoo, ua zoo rau txhua tus, tsis hais cov uas tsis tau ntseeg huvsi, vim ua ntej ntawd peb kuj zoo ib yam li lawv thiab. Tsuas yog thaum los ntseeg Yexus, peb thiaj zeem paub “ruam” yog tsis paub txog yus sab ntsujplig. Vim qhov uas peb tsis zeem paub no ua rau peb pheej mus caum tej kev lomzem ntiajteb, nrhiav kev txaus siab, cia tus kheej mus ua li lub siab ntshaw nqaij tawv, ua qhev rau kev txhaum. Qhov kev ua neej li no tsimnyog raug ntxub, thiab peb kuj xwbtim ua neeg nyob hauv txojkev sib ntxub. Yog li, los ntawm lub meejmom uas ntseeg Tswv Yexus, muaj kev paub txog sab ntsujplig, thaum ntsia cov neeg tsis ntseeg ibncig kev ua neej, peb tsis txhob thuam thiab txiav txim rau lawv. Qhov no yog thawj yam uas peb yuav tsum zeem paub kom peb ua tau lub neej raws li Vajtswv Txojlus qhia.
Qhov thib ob cheemtsum zeem paub, txawm yog peb ruam, ua txhaum los Vajtswv yeem ua zoo rau peb txhua tus los ntawm qhov uas Nws txib Tswv Yexus los hauv ntiajteb no cawm peb dim ntawm peb tej kev ntshaw thiab kev txhaum lub hwjchim tswj kav, “thaum Vajtswv tus uas yog peb tus Cawmseej nws qhia nws txojkev hlub rau sawvdaws.” (nqe 4). Tus Tswv cawm peb “tsis yog vim peb ua ib yam haujlwm zoo, tiamsis vim Vajtswv hlub peb xwb.” (nqe 5). Yog li ntawd, tus Tswv ua siab ntev rau peb qhia tshwm Nws nplooj siab hlub los cawm cov neeg uas tsis tsimnyog thiab hloov neeg kom zoo phim tus Tswv. Tsis txhob khav theeb vim peb tau cawm dim los ntawm Vajtswv txojkev ua zoo thiab nplooj siab hlub cov neeg ruam zoo li peb.
Thaum los ua tus ntseeg Yexus, peb zeem paub yus tej kev txhaum ua ntej ntawd, thiab pom Vajtswv txoj koob hmoov hlub tsis paub kawg pub rau peb, ces cia li ua neej kom tsimnyog txojkev cawm tus Tswv pub. Yog Vajtswv menyuam, peb yuav tau muaj tus cwjpwm txo hwjchim, ib leeg ua zoo rau ib leeg thiab txav deb lub neej “ruam” hnub thaud. Tsis txhob tawmtsam, tsis txhob cia luag ntxias tau yus pheej niaj hnub ua txhaum kev nkauj kev nraug, kev phem kev qias, kev ntshaw.
Thov Vajtswv,
Vajtswv tus uas zoo kawg nkaus, muaj kev hlub. Ua tsaug uas Koj cawm nyuam yaus dim txojkev txhaum. Thov pab kom nyuam yaus zeem paub tias tau los ua Koj menyuam yog vim Koj txoj koob hmoov hlub. Thov cia nyuam yaus hmov tshua, hlub thiab coj cov neeg uas tabtom yuam kev lawd los cuag tus Tswv. Tuav Tswv Yexus lub npe thov, Amees.
Peb puas tau ua lub neej tsimnyog qhov uas peb zeem paub thiab Vajtswv txoj koob hmoov hlub lawm tau?
Nyeem Vajluskub hauv peb lub xyoo: Pajlug 23
Kênh Youtube BHKTHN:
