Klei Aê Diê Blŭ: Klei Bi Hriêng 4:1-2
Êlan kliăng: “Ơ phung anak kâo, hmư̆ bĕ klei sa čô ama bi hriăm, mđing knga bĕ čiăng kơ diih dưi mâo klei thâo mĭn.” (Klei Bi Hriêng 4:1).
Klei êmuh ksiêm mĭn: Si Klei Bi Hriêng kdrêč 4 brei ƀuh jar gru tui klei mtô lač kơ phung anak? Ya klei “sa čô ama” iêu mthưr kơ anak ñu? Ya ngă brei amĭ ama sĭt suôr hưn, mtô lač Klei Aê Diê Blŭ kơ phung anak? Ya bruă klam drei ƀuh, kơ amĭ ama leh anăn kơ phung anak?
Knhuah hdĭp hlăm ƀuôn sang ênuk anei ba lu klei dleh dlan kơ amĭ ama hlăm bruă mtô lač kơ phung anak, msĕ si gun kpăk bruă knuă, klei mdê dhar kreh, boh kbưi gưl ênuk, knhuah hdĭp, klei blŭ… Hruê anei, lu amĭ ama leh anăn đa wăt phung gĭt gai bruă Sang Aê Diê msĕ mơh, hung êran tiŏ bi hrăp klei phung hđeh čiăng, ƀiădah amâo mâo ôh kčĕ mtô lač kơ phung hđeh brei tui hlue hnơ̆ng čuăn mơ̆ng Klei Aê Diê Blŭ.
Klei Bi Hriêng kdrêč 4 brei sa jar gru tui klei mtô lač kơ phung anak hlăm gŏ sang, leh anăn ăt brei ƀuh mơh kơ phung amĭ ama brei sĭt suôr hlăm bruă klam anei, mbĭt hŏng klei anăn phung anak msĕ mơh, brei sĭt suôr mđing hmư̆ leh anăn gưt ngă klei amĭ ama mtô lač. Hlăm êlan 1, pô čih hră iêu mthưr: “Ơ phung anak kâo, hmư̆ bĕ klei sa čô ama bi hriăm, mđing knga bĕ…” Ya ngă “sa čô ama” brei iêu mthưr “phung anak” mđing hmư̆ klei ñu bi hriăm? Êđal blă jing, kyuadah phung anak amâo čiăng mđing hmư̆ ôh! Tơdah phung anak thâo mđing hmư̆ sĭt yơh ama amâo lŏ guôn iêu mthưr ôh. Klei sĭt anei drei ƀuh klă kơ mtao Y-Rôbôam, lăm lui hĕ klei mtô lač thâo mĭn mơ̆ng mtao Y-Salômôn ama ñu, pioh kơ ñu, boh nik nak čih hlăm dua hdruôm hră Klei Bi Hriêng leh anăn Khua Pô Mtô, dơ̆ng mơ̆ng anăn yơh atăt kơ klei hdĭp ñu leh anăn klei ñu gĭt gai lăn čar truh kơ klei dluh lĕ. Tinei drei thâo, wăt tơdah phung anak khăng bi êdah klei bi kdơ̆ng amâo čiăng mđing hmư̆ ôh klei amĭ ama amâodah phung huĭ mpŭ kơ Aê Diê mtô lač bi hriăm diñu, ƀiădah klei anăn amâo djŏ ôh jing klei mơal kơ phung amĭ ama amâo sĭt suôr bi leh bruă klam pô.
Klei bi hriăm kơ “phung anak” jing mơ̆ng “sa čô ama” – sa klei pia bŏ kluôm hlăm anăn mâo klei mđing uêñ, klei bi mguôp, klei suôr tliêr, ƀiădah wăt jing bruă myang leh anăn klei dưi ti dlông phung anak mơh. Phung jing amĭ ama brei thâo săng klă kơ klei dưi anei, leh anăn ngă bi djŏ sĭt. Wăt tơdah tinei amâo ƀuh lač kơ Aê Diê ôh, ƀiădah hlăm Klei Bi Hriêng 3:11-12 hưn lač leh kơ klei Aê Diê mjuăt mđăo msĕ si sa čô ama (dlăng hlăm Klei Mtô Mñă Klei Bhiăn 8:5), đru drei thâo săng brei djă pioh leh anăn čuê ngă nanao hlŏng kơ ênuk êdei anăp, bruă mtô mjuăt kčưm dơ̆ng leh mơ̆ng Aê Diê, snăn klei bi hriăm mơ̆ng “sa čô ama” tinei jing klei mtô bi hriăm Klei Aê Diê Blŭ yơh. Blŭ mdê, klei dưi Aê Diê brei kơ amĭ ama jing klei dưi mngăt myang, bi êdah hŏng klei huĭ mpŭ kơ Aê Diê leh anăn sĭt suôr mtô lač Klei Aê Diê Blŭ kơ phung anak.
Si drei sĭt suôr ngă bruă klei dưi mtô Klei Aê Diê Blŭ kơ phung anak drei?
Ơ Khua Yang, bi mni lač jăk kơ Ih brei kơ kâo mâo phung anak. Akâo kơ Ih brei kâo thâo săng kơ bruă klam čiêm rông mtô lač phung anak tui si klei Ih Blŭ, leh anăn akâo kơ Ih đru kâo mâo klei thâo mĭn leh anăn klei ktang čiăng dưi sĭt suôr ngă bi leh jih bruă klam yuôm bhăn anei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 14:6-15:19
Kênh Youtube BHKTHN:
