Klei Aê Diê Blŭ: Klei Bi Hriêng 22:28-29
Êlan kliăng:“Khua ñu lač kơ ñu, ‘Jăk leh, Ơ dĭng buăl jăk leh anăn sĭt suôr. Ih dôk sĭt suôr hlăm bruă điêt, kâo srăng brei ih kiă kriê lu. Mŭt bĕ leh anăn mâo klei hơ̆k mơak mbĭt hŏng khua ih” (Y‑Mathiơ 25:21)
Klei êmuh ksiêm mĭn: Ya ngă amâo dưi bi mlih ôh knông lăn hđăp? Ya boh tŭ dưn sa čô mnuih mbruă srăng mă tŭ? Si drei yua leh klei brei, klei thâo Aê Diê brei leh kơ drei? Leh anăn ya klei čiăng kơ drei bi mlih hĕ?
Hlăm krĭng Čar Ngŏ ênuk đưm, phung ƀuôn sang dlăng yuôm snăk kơ knông lăn pô dê leh anăn knông lăn mbĭt hŏng phung găp djuê, klei anei jing yuôm snăk kơ klei hdĭp gŏ sang leh anăn yang ƀuôn. Arăng bi kdriêl knông lăn hŏng kmeh boh tâo amâodah dăp boh tâo čiăng hưn kơ lăn anăn jing dŏ pô dê, jing ngăn dưn djŏ tui si klei bhiăn. Tơdah amâo săng amâodah amâo gưt ôh kơ klei bhiăn anei, sĭt nik srăng mâo klei bi mmiă leh anăn mâo klei rŭng răng. Klei bi mlih knông lăn (êlan 28) lač kơ klei jhat ƀai sa čô mnuih knang kơ ñu mâo klei dưi snăn ngă klei ktư̆ juă mnuih ƀun ƀin leh anăn amâo mâo klei dưi ôh hlăm buôn sang. Y‑Môis mtô klei bhiăn Aê Diê kơ phung Israel snei: “Knông lăn phung khua hđăp bi kčah leh hlăm anôk jing ngăn dưn diih srăng mă bha hlăm čar Yêhôwa Aê Diê diih brei kơ ih mă bha, đăm bi mlih kdriêl knông lăn pô riêng gah ih ôh” (Klei Mtô Mñă Klei Bhiăn 19:14). Brei phung ƀuôn sang Aê Diê thâo klă kơ lăn, dŏ ngăn jing dŏ Aê Diê brei, kyuanăn yơh brei gưt kơ klei bhiăn Aê Diê, amâo dưi ôh kyua klei tluh snăn ngă klei ktư̆ juă phung ƀun ƀin, phung amâo mâo klei dưi čiăng plah mă dŏ ngăn digơ̆.
Mtao Salômôn mtô anak ñu, hrô kơ klei yua mnêč jhat čiăng plah mă lăn mnuih ƀun ƀin, duah klei tŭ dưn hŏng klei wê, snăn brei anak kriăng mă bruă (êlan 29). Brei anak sĭt suôr hlăm bruă điêt, bruă gŏ sang, sĭt nik arăng srăng brei kơ anak ngă bruă prŏng hĭn, mâo klei mpŭ hĭn. Mơ̆ng klei mă bruă aguah tlam hlăm gŏ sang, anak srăng dưi mă bruă kơ phung mtao, kơ ƀuôn sang leh anăn kơ lăn čar. Kyua klei mbruă leh anăn klei kpă ênuah yơh anak srăng mâo klei čăt đĭ leh anăn đĭ kyar nanao, amâo djŏ hŏng klei luar ôh.
Hlăm klei yăl dliê bi hriêng kơ Ƀuôn ala mtao Aê Diê (Y‑Mathiơ 25:14-30), Khua Yang Yêsu lač hlei pô sĭt suôr hlăm bruă điêt hĭn ti lăn ala anei, Aê Diê srăng jao bruă prŏng hlăm Ƀuôn ala mtao Ñu srăng truh. Hlăm hruê Khua Yang lŏ hriê, grăp čô drei jing phung dĭng buăl Ñu, drei srăng nao ti anăp Ñu leh anăn hưn bi êdah jih bruă drei tuôm ngă leh. Akâo Khua Yang đru drei hdơr kơ drei jing phung dĭng buăl mă bruă kơ Ñu, Ñu brei leh klei brei mdê mdê čiăng mă bruă mâo boh tŭ dưn kơ Ñu. Brei drei hur har, sĭt suôr hŏng jih ai tiê čiăng bi mđĭ klei thâo, klei Aê Diê brei čiăng ba klei tŭ dưn kơ bruă Ñu. Truh hruê Khua Yang lŏ hriê, čiăng snăk grăp čô drei srăng mă tŭ klei mưn mơ̆ng Khua Yang leh anăn hmư̆ Ñu lač, “Jăk leh, Ơ dĭng buăl jăk leh anăn sĭt suôr. Ih dôk sĭt suôr hlăm bruă điêt, kâo srăng brei ih kiă kriê lu. Mŭt bĕ leh anăn mâo klei hơ̆k mơak mbĭt hŏng khua ih”.
Si drei dôk yua klei brei Aê Diê brei leh kơ drei?
Wah lač: Ơ Khua Yang, Ama kâo hlăm adiê. Kâo lač jăk kơ Ih khăp leh kơ kâo leh anăn brei kâo dưi mă bruă kơ Sang Ih. Mơ̆ng klei hriăm hruê anei, đru kâo hdĭp jăk, kpă ênô leh anăn sĭt suôr hŏng jih jang bruă Ih jao leh kơ kâo. Kâo wah lač hlăm Anăn Khua Yang Yêsu Krist. Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 7
Kênh Youtube BHKTHN:
