Klei Aê Diê Blŭ: Klei Mphŭn Dơ̆ng 40:1-23
Êlan kliăng: “Khua djă kčok amâo lŏ hdơr ôh kơ Y-Yôsep, ƀiădah wơr bĭt hĕ gơ̆.” (Klei Mphŭn Dơ̆ng 40:23).
Klei êmuh ksiêm mĭn: Ya klei Y-Yôsep ngă leh kơ khua djă kčok Pharaôn? Ya klei ñu ngă leh kơ gơ̆ hlăk leh ñu dưi lŏ wĭt kơ bruă ñu? Dŭm sui Y-Yôsep dôk guôn leh anăn si klei ñu lŏ kdơ̆ng wĭt? Si drei srăng kdơ̆ng wĭt tơdah arăng wơr bĭt?
Klei yăl dliê kơ klei čhĭ Y-Yôsep ba jing hlŭn ti čar Êjip, êdei tinăn arăng lŏ mă krư̆ ñu hlăm war mnă ruăt amâo mâo klei soh ôh, leh anăn klei Aê Diê hơêč hmưi kơ ñu čih hlăm Klei Mphŭn Dơ̆ng kdrêč 39-41. Hruê anei, drei bi mĭn kơ klei Y-Yôsep ngă jăk ƀiădah arăng wơr bĭt hĕ ñu hlăm war mnă. Dơ̆ng mơ̆ng anăn, drei hriăm brei thâo gĭr leh anăn sĭt suôr dôk guôn hruê mông Aê Diê.
Êjai arăng krư̆ hlăm war mnă, Y-Yôsep mâo bruă jao brei răng kriê khua djă kčok leh anăn khua ngă kpŭng Pharaôn hlăk arăng mă diñu dua ba krư̆ hlăm war mnă (êlan 1-4). Jih diñu dua mâo klei êpei mdê mdê ƀiădah amâo thâo si mblang klei êpei anăn ôh, snăn diñu ênguôt dhuôt. Y-Yôsep uêñ êmuh leh anăn mblang brei klei diñu êpei tui si klei Aê Diê bi êdah kơ ñu (êlan 5-13). Leh mblang brei klei êpei kơ khua djă kčok, Y-Yôsep akâo kơ khua djă kčok hdơr ya klei truh leh kơ ñu leh anăn hưn brei kơ Pharaôn čiăng ñu dưi kbiă mơ̆ng war mnă (êlan 14-15). Êdei tinăn, jih jang klei truh djŏ msĕ si klei Y-Yôsep mblang klei êpei: khua djă kčok wĭt kơ bruă ñu, bi khua ngă kpŭng arăng ruôt kkuê (êlan 20-22). Ƀiădah ênguôt êdi, khua djă kčŏk wơr bĭt bhiăng Y-Yôsep, gơ̆ jing pô răng kriê ñu leh anăn mblang brei klei êpei kơ ñu (êlan 23).
Snăn yơh Y-Yôsep lŏ dôk thiăm dua thŭn hlăm war mnă tơl truh hruê Pharaôn mâo klei êpei, kyua amâo lŏ mâo ôh pô dưi thâo mblang klei êpei kơ mtao, mông anăn kơh khua djă kčŏk ƀrơ̆k hdơr kơ Y-Yôsep gơ̆. Klei Mphŭn Dơ̆ng kdrêč 41 brei thâo arăng bi kbiă Y-Yôsep mơ̆ng war mnă atăt nao kơ mtao čiăng mblang brei klei mtao êpei. Hlŏng tơl jih klei hdĭp, Y-Yôsep thâo kral nanao ñu mâo Aê Diê dôk mbĭt leh anăn hơêč hmưi kơ klei hdĭp ñu. Wăt mâo klei dưi mblang klei êpei, ñu amâo mâo mgao ôh, kyuadah ñu thâo hlăm jih jang klei Aê Diê yơh Pô ngă brei (êlan 8; 41:16). Leh anăn wăt arăng wơr bĭt ñu hlăm war mnă dưn, ƀiădah Y-Yôsep ăt sĭt suôr dôk guôn, amâo mâo sa klei blŭ ƀuah ôh.
Hlăm êlan tui hlue Khua Yang, lu bliư̆ drei dôk guôn sui sĭn yơh, amâodah tăp năng mĭndah wơr bĭt leh, amâo lŏ mâo klei čang hmăng ôh. Ƀiădah Aê Diê jing sĭt suôr, Ñu thiê brei tui si mông jăk hĭn, grăp čô drei brei sĭt suôr dôk guôn tơl Khua Yang wĭt lač leh anăn tơl Ñu ngă bruă tui si hruê mông Ñu. Drei hdơr klei yăl dliê kơ Y-Nôê dôk guôn leh anăn mtô lač êjai, hlŏng kơ 120 thŭn, êlâo kơ ñu mbĭt hŏng gŏ sang ñu mŭt hlăm kŭmpăn. Msĕ mơh, ung mo ̆ Y-Abraham dôk guôn tơl dua pluh êma thŭn kơh dưi mâo anak tui si klei ƀuăn. Adôk lu lĭn klei bi hmô kơ klei dôk guôn mkăn hlăm Klei Aê Diê Blŭ bi mđĭ ai drei, êjai dôk hdĭp hlăm ƀuôn sang mtŭk mtŭl ênuk anei. Tơdah drei sĭt suôr dôk guôn, snăn Aê Diê jing Pô Sĭt Suôr srăng bi leh bruă Ñu kơ klei hdĭp drei.
Si ngă drei dưi gĭr leh anăn sĭt suôr dôk guôn hruê mông Khua Yang mơ̆?
Ơ Khua Yang, akâo kơ Ih đru kâo dưm klei đăo kâo kơ Aê Diê Sĭt Suôr, čiăng kơ kâo dưi sĭt suôr dôk guôn klei Ih čiăng hlăm djăp mta klei, wăt tơdah dôk guôn sui sĭn dưn mơh.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 19:1-39
Kênh Youtube BHKTHN:
https://www.youtube.com/channel/UCaSY8ebjVfMKhPups5jZ9yw
