Klei Aê Diê Blŭ: Y‑Đaniel 11:21-35
Êlan kliăng: “Kâo yap klei knap mñai ênuk anei amâo năng ôh bi mđơr hŏng klei guh kơang srăng bi êdah kơ drei ênuk êdei.” (Rôm 8:18)
Klei êmuh ksiêm mĭn: Êlan 21-35 lač kơ hlei pô? Ya ngă Khua Yang brei khua pô hưn êlâo Y‑Đaniel ƀuh kơ hruê êdei kbưi snăk msĕ snăn? Si drei ngă čiăng dưi ƀuh nanao rup prŏng kluôm hrô kơ klei hyuă čăp hŏng klei truh ti anăp ală?
Êlan 21-35 hưn lač kơ sa čô mnuih “arăng bi êmut snăk”, hlăm hƀuê ênuk jing Antiochus IV Epiphanes yơh (dlăng thiăm Y‑Đaniel 8:9-12; 23-25). Hlăm hră mkăn đa mblang pruê̆ blŭ anei jing “mnuih čhŏ mrŏ, jhŏng ktang jhat ƀai êgao hnơ̆ng” wăt tơdah ñu bi anăn kơ ñu pô Epiphanes mblang jing “pô guh kơang”. Antiochus ăl ngêñ snăk kơ phung ƀuôn sang klei bi mguôp doh jăk. Thŭn 169 Êlâo kơ Krist, ñu plah mă bi rai ƀuôn prŏng Yêrusalem, Sang Yang leh anăn bi mdjiê lu phung Israel. Amâo djŏ knŏng dŭm năn ôh, êlan 29-35 brei thâo “mnuih arăng bi êmut” anei srăng “bi čhŏ adŭ doh jăk”, “mdơ̆ng mnơ̆ng bi êmut kheh brei jing ênguôl”. Tui si hră čih klei hƀuê ênuk, Antiochus mdơ̆ng knưl ngă yang kơ yang Zeus phung Grĕk hlăm Sang Yang Yêrusalem; lui hĕ mnơ̆ng myơr čuh grăp hruê. mơ̆ng klei truh anei yơh bi mjing klei bi kah dua phung mnuih; Phung gao klei bi mguôp hŏng Aê diê čiăng krơ̆ng pioh klei hdĭp leh anăn phung thâo mĭn “thâo kral Aê Diê digơ̆”, wăt tơdah digơ̆ srăng “êbuh hŏng đao gưm, hŏng êlah pui, hŏng klei jing mnă, leh anăn hŏng klei arăng plah mă êjai bhiâo” čiăng dôk kjăp tơl knhal tuč (êlan 32-35).
Ya ngă Khua Yang brei khua pô hưn êlâo Y‑Đaniel leh anăn phung ƀuôn sang Aê Diê thâo klei hƀuê ênuk srăng truh sĭt êdei kơnăn lu gưl ênuk? Tal sa, Khua Yang čiăng kơ diñu thâo wăt tơdah mnơ̆ng dhơ̆ng mtŭ mlan bi mlih dưn ƀiădah “ai tiê mtao jing msĕ si sa hnoh êa hlăm kngan Yêhôwa…” (Klei Bi Hriêng 21:1) čiăng kơ phung ƀuôn sang Aê Diê đăo kjăp kơ Ñu. Tal dua, anak mnuih khăng wơr êlan, đuôm kpĭ hŏng klei truh ti anăp ală. Tinei, Khua Yang brei klei bi ƀuh kơ khua pô hưn êlâo Y‑Đaniel leh anăn kơ phung ƀuôn sang Ñu dlăng phă hruê ẹdei anăp, kyuadah klei diñu čang hmăng ti dlông hĭn jing “ênuk knhal tuč”, hlăk jih jang amâo srăng lŏ dôk ôh, hlăk mâo klei dưi hĭn leh anăn ƀuôn jăk pioh kơ hlei pô “thâo mĭn” gĭr dôk sĭt suôr hŏng Ñu (êlan 35).
Hlăm dŭm gưl hiu hưn klei mrâo mrang jăk Khua ƀĭng kna Y‑Pôl, ñu tlă anăp hŏng djăp mta klei knap mñai, klei lông dlăng, klei arăng ngă jhat ktang tĭt, ƀiădah ñu ăt đăo kjăp nanao kơ hdră Aê Diê mkra leh kơ klei hdĭp ñu tơdah Khua Yang jao bruă klam kơ ñu. Kyuanăn ñu amâo dlăng ôh kơ klei knap mñai ngă bi êdu ai, ƀiădah ñu dlăng ƀuh nanao rup kluôm jih mơ̆ng Aê Diê čiăng ƀuh klei guh kơang kmlăi mngač hlăm ênuk knhal tuč, kyuanăn ñu kjăp ai tiê ksŭng phă anăp, wăt êjai dôk hlăm mnă, ñu ăt mơak ngă bruă jao hưn Klei Mrâo Mrang Jăk. Kyuanăn ñu bi mđĭ ai phung anak Aê Diê čang hmăng nanao kơ Aê Diê, “Kâo yap klei knap mñai ênuk anei amâo năng ôh bi mđơr hŏng klei guh kơang srăng bi êdah kơ drei ênuk ênuh êdei.” (Rôm 8:18). Anăn yơh jing klei ktang kơ khua ƀĭng kna Y‑Pôl hruê êlâo leh anăn kơ grăp čô drei hruê anei dôk kjăp mă bruă kơ Khua Yang.
Wăt tơdah ară anei si jing dưn, si ngă drei đăo mơ̆ hruê êdei anăp dôk hlăm kngan Khua Yang?
Wah lač: Ơ Khua Yang, akâo Ih đru kâo thâo ƀuh rup prŏng kluôm hŏng klei Khua Yang kiă kriê, čiăng kơ kâo hdơr nanao wăt tơdah ară anei si jing dưn, ti knhal tuč êlan klei Khua Yang pioh kơ kâo jing klei jăk mơak leh anăn guh kơang.
Dlăng Klei Aê Diê Blŭ hlăm tlâo thŭn: Y‑Yêrêmi 31:23-40
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
