LĐ Êyiptơ 32:1-6
“Minh ‘nu Inh đĕch, iĕm ‘nĕ kơ đei lu yang nai.” (LĐ Êyiptơ 20:3)
Nơ̆r jet tơchĕng pơwao:
– ‘Bok Arôn păng kon pơlei Isơrael pơm yoch kiơ?
– Tơm sư thoi yơ na ba truh lu sư đei pơm yoch âu?
– Lu bơ̆n ngăl đei tơdrong lei lăi lăm tơdrong pơm yoch thoi yơ?
Đơ̆ng rŏng kơ pêng khei lĕch đơ̆ng dêh char Êyiptơ, hăm dôm tơdrong mơn đêl gah tơdrong dŏng pơklaih hlĭch chrơp đơ̆ng Kră Yang, Kră Yang đei pơjing tơdrong pơgơ̆p pơkă, pơkăm pơkă chu yom pơm kiơ̆ Nơ̆r ‘Bok Kei-Dei kư̆m thoi lu khôi juăt sư pơkă wă kơ hăm đĭ jơhngơ̆m (LĐ Êyiptơ 24:3-8). Mă khan lei ră, mă lŭch dêh đei truh kơplah kon pơlei “Lăng ‘bok Môis đơ̆ng kơpal kông hiơ̆ kơ jur”. Yua kơ sư tŏk tơ kông Sinai lăm 40 măng, năr wă iŏk kơ’bang khôi juăt. Kon pơlei apinh ‘bok Arôn “pơm lu rup yang wă kơ năm adrol kơ lu nhôn”, păng lu sư “pơyơ̆r tơmam soi ‘buh păng tơmam soi bơnê; tơ oei na sŏng sa, đơ̆ng noh iung păng chơt hiôk” (trong 1, 6). Lăm nơ̆r Hêbrơ, nơ̆r “hiôk chơt” wă tơ’bôh tơdrong bơ̆n pơm mơ̆ng kơ wă păng tơ’bôh rup gah tơdrong pơm giĕng chơt hiôk tih, hăm tơdrong et sik suai, suang pơplŏng tơhưch băl păng pơm tơdrong ưh kơ ‘lơ̆ng (LĐ Êyiptơ 32:35). Yua kơ thoi noh, kon pơlei Isơrael kơplah noh pơm yoch glăi hăm lu Khôi juăt Kră Yang mă 1, 2 păng mă 7 lăm mơjĭt Nơ̆r Tơtă.
Tơm sư kơplah ei pơm kơ lu bơngai Isơrael pơm yoch yua kơ lu sư ưh kơ kĕ chơ̆n kơplah oei răp gô ‘bok Môis jur đơ̆ng kông. Tơdrong âu tơ’blŏk kơ lu bơ̆n phŏ đei lơ ‘măng đei tơdrong truh pơtrŭt lu bơ̆n pơm hăt hot na đei tơdrong pơm glăi. Mă khan lei ră, tơm sư mă tih dêh noh tơdrong lu kon pơlei Isơrael pơm yoch noh đơ̆ng ưh kơ kĕ chơ̆n lăm đon lui gơnang kơ Kră Yang. Lăm tơdrong măt lăng kon pơlei. Kră Yang ‘Bok Kei-Dei ưh kơsĭ lăp minh ‘măng đĕch kơplah sư pơma hăm ‘bok Arôn: “Lu kon pơlei lăng Môis hiơ̆ kơ jur đơ̆ng kông, lu sư akŭm hloi tăp dăr kơ Arôn păng khan kơ sư: Pơm bĕ kơ bơ̆n lu rup yang năm adrol kơ bơ̆n; yua kơ Môis tơ’ngla mă tơlĕch bơ̆n đơ̆ng char Êyiptơ noh bơ̆n ưh kơ băt ôh tơdrong kiơ truh kơ sư bơih.” (trong 1). ‘Bôh rơđah, đon lui lu sư ưh kơsĭ lui kơ ‘Bok Kei-Dei đĕch mălei lu sư kư̆m oei kơkuh kơ “lu yang nai” hai mơ̆n, păng kư̆m kơplah oei ‘bơ̆t ‘bok Môis mơ̆n. Yua kơ thoi noh, ‘bok Môis ưh pă oei hơdai lu sư na đon lui lu sư ‘bônh kơ rơdu hiong răm. ‘Nâu jơ̆ đon lui mă khul lui dang ei kư̆m oei đei, jơ̆ đon lui kơ’bah tơdrong tơ’bưh kơjăp hăm Kră Yang. Đei lơ bơngai lui pơ̆k huŏng pơm yoch yua kơ ưh kơ đei đon lui gơnang kơ Kră Yang đĕch mă noh lu sư oei ‘nguaih kơ Kră Yang, lu sư lui gơnang kơ lu yang nai.
Kơplah âu, ‘bok Arôn athei pŭ iŏk tơdrong yoch kơn pơlei yua kơ sư tơmơ̆t pôm đon hơdai hăm lu sư, kơplah krao pơtơm kon pơlei athei plôh maih wă hiong maih wă hling rup kon rơmo. Dang ei, lu bơ̆n kư̆m đei pơhlŭ pơlung chơchă kiơ̆ tơdrong âu, tơdrong to kiơ̆ bơngai ala teh, ‘bônh kơ chơ chă, păng ‘bônh kơ drơ̆ng lăp đon kon pơlei pơla. Kăl kơ ‘blŏk dôm tơdrong đêl mơn gah bơhngol mă khan bơ̆n lăng nhen thoi ‘lơ̆ng, trŏ dêh thoi yơ hĭ, noh ưh kơsĭ tơm đon lui lăm Kră Yang, tơdrong pôm đon ba truh tơdrong yoch kang rai trăp trĭn, lu bơngai wei lăng păng kon pơlei Kră Yang athei wei kơjăp pơm kiơ̆ nơ̆r Kră Yang.
Ơ Kră Yang, apinh Ih mơnat kơ inh yua kơ lơ wơ̆t inh rơdu, đon lui gơnang kơ lơ tơdrong nai lơ hloh kơ gơnang kơ Ih. Apinh Ih tơgŭm inh ling lang yak năm lăm tơdrong băt hli yom kơ Ih. Krao khan yua anăn Kră Yang Yêsu Krist, Amen.
Lu bơ̆n hăm tơmơ̆t hơdai lu bơngai ala teh wă kơ kon pơlei păng hăm lu bơngai nai lăp đon ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Pơđơ̆k 25
Kênh Youtube BHKTHN:
