Klei Aê Diê Blŭ: Y‑Nêhêmi 4:1‑3, 7‑14
Êlan kliăng: “Hmei wah lač kơ Aê Diê hmei, hruê leh anăn mlam hmei dưm phung gak čiăng mgang.” (Y‑Nêhêmi 4:9)
Klei êmuh ksiêm mĭn: Hlei jing phung roh hŏng Y‑Nêhêmi leh anăn phung ƀuôn sang Yêrusalem? Ya êlan hdră diñu yua čiăng bi kgăn hĕ bruă lŏ mkra msir mnư̆ ƀuôn? Ya klei Y‑Nêhêmi leh anăn phung ƀuôn sang ngă leh? Ya knuih brei drei mâo êjai dôk tlă anăp hŏng klei bi kdơ̆ng?
Mơ̆ng hlăk Y‑Nêhêmi lŏ wĭt kơ ƀuôn Yêrusalem leh anăn hdră bruă mdơ̆ng mnư̆ ƀuôn ka kčưm dơ̆ng, ƀiădah phung roh hlăm kring dơ̆ng ksŭng ngă jhat leh (Y‑Nêhêmi 2:19‑20). Diñu wang jŭm dar ƀuôn Yêrusalem mơ̆ng jih pă tĭng: Y‑Sanbalat leh anăn phung Samari tĭng dưr, Y‑Tôbia leh anăn phung Amôn tĭng ngŏ, Y‑Gêsem leh anăn phung Arap tĭng kơ dhŭng, leh anăn phung Asdôt tĭng kơ yŭ. Mnơ̆ng bi blah phung bi kdơ̆ng anei yua jing klei djik djak (êlan 1), sa êlan hdră êlưih ngă hĭn ƀiădah êlưih ngă bi êdu ai mnuih mkăn hĭn, kyuadah ñu ngă bi luč liê ênoh yuôm hlăm lam sa čô mnuih leh anăn bruă pô anăn dôk ngă. Sa čô Ăng-Gle ngă bruă ksiêm dlăng leh anăn čih mkra hră, anăn Thomas Carlyle pia kơ klei djik djak jing “klei blŭ mơ̆ng yang jhat”. Phung bi kdơ̆ng anei djik djak klei “awăt” phung ƀuôn sang Yuđa dôk ti anăp sa bruă ngă prŏng snăk. Diñu wăt ksŭng ngă kơ klei mtrŭt ai tiê phung ƀuôn sang Yuđa tơdah diñu lač, jih bruă diñu ngă knŏng kyua kơ diñu pô yơh, amâo djŏ kyua Aê Diê, kyua klei guh kơang Aê Diê amâodah kyua găp djuê ƀuôn sang ôh. Diñu wăt lông dlăng klă anăp klei đăo phung ƀuôn sang Aê Diê leh anăn djik djak phung ƀuôn sang Yuđa (êlan 2‑3). Ti djiêô anăn diñu lŏ wăt bi huĭ wang bi blah ƀuôn Yêrusalem, leh anăn bi mdjiê phung ƀuôn sang Yuđa, ngă kơ bruă mjưh mdei hĕ (êlan 7, 11).
Amâo djŏ knŏng roh mơ̆ng êngao wang jŭm pă tĭng, ƀiădah wăt ti krah phung ƀuôn sang Aê Diê, phung mơ̆ng găp djuê Yuđa lŏ blŭ klei bi êdu ai tiê phung ƀuôn sang msĕ mơh (êlan 10). Găp djuê Yuđa jing găp djuê djă bruă khua gĭt gai, jing găp djuê sĭt suôr leh anăn ktang hĭn (Klei Mphŭn Dơ̆ng 49:8‑10), ƀiădah lĕ tinei phung găp djuê Yuđa pô yơh lŏ ngă bi êdu ai phung ƀuôn sang Aê Diê ktang hĭn. Kdlưn hĭn mơh, phung Israel dôk hdĭp giăm phung roh ăt ngă bi rŭng răng bi huĭ hlăm phung ƀuôn sang msĕ mơh (êlan 12). Diñu dơ̆ng mđing hmư̆ klei phung djik djak hrô kơ mđing hmư̆ Aê Diê, leh anăn phung Israel anei, thâodah amâo thâo săng amâodah čŏng hŏng ai tiê, diñu yơh jing mnơ̆ng phung yua kăp bi kdơ̆ng hŏng phung ƀuôn sang Aê Diê.
Klă sĭt klei bi kdơ̆ng ƀrư̆ hruê ƀrư̆ đĭ hĭn ênoh phung roh wăt hnơ̆ng klei huĭ hyưt. Mta klei anei djŏ hŏng Y‑Nêhêmi leh anăn phung Yuđa ênuk anăn, wăt djŏ hŏng phung tui hlue Khua Yang găn jih jang ênuk. Si klei Y‑Nêhêmi mkŏ mjing phung kăp gak hruê leh anăn mlam, brei drei msĕ mơh kăp dôk răng kơ mnêč phung roh (Y‑Mathiơ 7:15). Klei yuôm hĭn kơ jih jang, brei êlâo hĭn wah lač, amâo djŏ ôh wĭt ngă tui si klei mĭn pô (êlan 9, 14). Brei drei hriăm mơ̆ng Y‑Nêhêmi leh anăn phung ƀuôn sang Aê Diê hlăm klei wah lač leh anăn knang kơ Khua Yang čiăng dưi hĭn hŏng roh hlăm lam wăt mơ̆ng êngao.
Ya klei đru drei mơ̆ng hdră êlan Y‑Nêhêmi wĭt ngă hŏng phung bi kdơ̆ng hŏng ñu?
Wah lač: Ơ Khua Yang, grăp hruê kâo hdĭp ti lăn ala tlă anăp hŏng lu mta klei lông dlăng, klei dleh dlan, klei bi kdơ̆ng…, akâo Khua Yang brei kâo thâo ƀuh klei Ih dôk kiă kriê hlăm jih jang kdrêč hlăm klei hdĭp, dlăng phă Khua Yang nanao, leh anăn hŏng klei anăn yơh kâo dưi dôk kjăp hlăm klei đăo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
