Nehemis 4:1-3, 7-14
Nqe cim.
“Tiamsis peb thov peb tus Vajtswv thiab tso neeg zov nruab hnub hmo ntuj, tawmtsam lawv tsis pub kom tuaj tau ti peb hlo li” (Nehemis 4:9)
Lus nug rau sawvdaws xav.
– Nehemis thiab cov pejxeem hauv nroog Yeluxalees cov yeebncuab yog leejtwg?
– Lawv siv dabtsi los ua tabkaum tes haujlwm txhim kho tus ntsa yeej?
– Nehemis thiab cov pejxeem tau ua licas?
– Peb yuav tsum muaj tus cwjpwm licas thaum ntsib kev tawmtsam?
Thaum Nehemis nyuam qhuav los hauv Yeluxalees thiab tseem tsis tau txhim kho tus ntsa yeej ces cov yeebncuab nyob ibncig twb nrhiav kev tawmtsam lawm (Nehemis 2:19-20). Lawv tuaj vij lub nroog Yeluxalees tagnrho plaub ceg kaum: Xanpalas thiab cov Xamalis nyob sab qaumteb, Tunpias thiab cov Amoos nyob sab hnubtuaj, Nkesees thiab cov Alav nyob sab qabteb, thiab cov Asedaus nyob sab hnubpoob. Yam cuabyeej uas lawv siv los tawmtsam Nehemis thiab cov neeg hauv nroog yog lo lus thuam (nqe 1), yog yam yoojyim tshajplaws ua rau lwm tus qaug zog vim tej lus ntawd ua rau puastsuaj hauv nruab siab thiab rhuav tshem tes haujlwm uas lwm tus ua. Ib tug tub sau ntaub ntawv neeg Akiv npe hu ua Thomas Carlyle muab tej lus thuam lwm tus hu ua “dab ntxwsnyoog tej lus”. Cov yeebncuab no tau thuam hais tias cov Yudas “txomnyem ntsuav” lossis tsis muaj zog li ntawd yuav ua licas ua tau tes haujlwm loj. Lawv kuj thuam cov Yudas lub homphiaj ua li ntawd yog ua vim cov Yudas tus kheej xwb, tsis yog ua vim tus Tswv thiab tsis ua rau tus Tswv tau koobmeej. Lawv kuj twv tus Tswv haivneeg txojkev ntseeg thiab hais lus saib tsis taus cov Yudas (nqe 2-3). Tsis tas li ntawd xwb, lawv tseem hem tias yuav tuaj tua lub nroog Yeluxalees thiab tua cov Yudas kom lawv txhob txhim kho tus ntsa yeej ntxiv lawm (nqe 7, 11).
Tsis yog tsuas muaj yeebncuab sab nraud xwb, nyob kiag hauv tus Tswv haivneeg, cov neeg uas yog xeem Yudas tau hais tej lus tsis zoo ua rau cov pejxeem qaug zog (nqe 10). Xeem Yudas yog xeem coj thawj, yog xeem npuab siab thiab muaj zog tshajplaws (Chivkeeb 49:8-10), tiamsis nyob ntawm no, lawv ho ua rau tus Tswv haivneeg qaug zog tshajplaws. Tshaj ntawd, cov neeg Yudas uas nrog yeebncuab nyob sib xyaw ua ke kuj pheej tuaj qhia tej yam ua rau sawvdaws txhawj ntshai (nqe 12). Cov pejxeem pib mus mloog tej lus thuam hloov pauv qhov uas mloog Vajtswv lus; thiab cov neeg Yudas no, txawm yog txhob txwm thiab tsis txhob txwm, los lawv tau dhau mus ua yam cuabyeej uas yeebncuab siv los tawmtsam tus Tswv haivneeg.
Kev tawmtsam yim hnub yim loj zuj zus rau qhov yeebncuab yim coob thiab yim txaus ntshai tuaj. Tej no muaj nyob hauv Nehemis thiab cov Yudas tiam ntawd, kuj muaj nyob hauv cov ntseeg tus Tswv txhua tiam. Nehemis tau txib neeg mus zov tus ntsa yeej licas, ces peb kuj yuav tsum xyuamxim thiab ceevfaj peb tej yeebncuab li ntawd (Mathais 7:15). Yam tseemceeb tshajplaws yog tseg sijhawm thov Vajtswv pab, tsis yog tawmtsam raws li peb siabnyiam (nqe 9, 14). Peb yuav tsum kawm Nehemis thiab tus Tswv haivneeg tus qauv nyob hauv kev taij thov thiab cia siab rau Vajtswv thiaj yuav kovyeej cov tawmtsam sab hauv thiab yeebncuab sab nraud.
Thov Vajtswv,
Tus Tswv, txhua hnub nyuam yaus yuav ntsib tej kev sim siab, txomnyem, tawmtsam, thov Koj qhia nyuam yaus pom tias Koj tabtom tswjkav txhua yam hauv nyuam yaus lubneej, kom nyuam yaus ntsia ntsoov Koj, ua rau nyuam yaus muaj kev ntseeg ruaj khov. Nyuam yaus tuav Yexus Khetos lub npe thov, Amees.
Tej uas Nehemis ua thaum ntsib kev tawmtsam pab tau peb yam dabtsi?
Nyeem Vajluskub hauv peb lub xyoos: Lukas 4
Kênh Youtube BHKTHN:
