Pajlug 13:24
Tus uas tsis siv rab nplawm kuj yog ntxub nws tus tub,
tus uas hlub nws tus tub yeej yuav ua tib zoo nplawm qhuab qhia.
Lus nug rau sawvdaws xav:
– Vim licas niam txiv yuav tsum qhuab qhia menyuam los ntawm nplawm?
– Nplawm menyuam yog cai yuav tsum ua li cas?
– Nyob hauv tej tebchaws uas muaj txojcai txwv siv rab nplawm, niam txiv yuav tsum qhuab qhia menyuam licas?
Pajlug 13:24 qhia hais tias: “Tus uas tsis siv rab nplawm kuj yog ntxub nws tus tub, tus uas hlub nws tus tub yeej yuav ua tib zoo nplawm qhuab qhia”. Vim yog kev txhaum raws roj ntsha thiaj ua rau txhua tus menyuam muaj yam zoo yam phem, qhuas lawv thaum ua tej yam zoo tiamsis kuj yuav tsum nplawm thaum lawv ua tej yam phem, lawv thiaj paub qhov txhaum thiab muab tso povtseg. Yog lawv tsis paub qhov txhaum lossis paub kev txhaum tiamsis pheej mus ua vim tsis raug nplawm ces yuav ua rau lawv piam neeg, ua neeg ywj siab. Muaj ib rooj ntsuam xyuas ntawm Tsevkawm qib siab Colombia, Amelikas teb rau ntawm 1000 tug tub kawm uas hnub nyoog txij 12 mus txog 17 xyoo, muab tej cuabyig uas mob siab rau menyuam kev kawm ntawv thiab txwv haus yaj yeeb piv rau tej cuabyig uas tsis quavntsej. Thaum kawg pom tau hais tias cov tub kawm uas siv yaj yeeb coob tshaj peb npaug tshwm nyob hauv cov cuabyig uas tsis muaj kev nplawm menyuam qhia rau qhov zoo.
Phau Pajlug hais ntau zaug txog kev siv rab nplawm los qhuab qhia menyuam (Pajlug 13:24; 23:13; 29:15). Qhov uas siv nplawm los qhuab qhia menyuam yog yam ibtxwm muaj hauv ntau lub tebchaws, tiamsis nimno muaj ib txhia tebchaws, uas xyaum coj raws li kevcai coj ntawm sab hnub poob, lawv saib kev siv nplawm los qhuab qhia menyuam ces yog tsimtxom menyuam thiab yuav raug teem txim. Qhov no ua rau tus Tswv cov menyuam nyob hauv tej tebchaws sab no xav khwv, xyov yuav ua raws Vajluskub qhia lossis yuav ua raws tebchaws txojcai?
Qhov tseeb, rab nplawm tsuas yog ib yam cuabyeej, thiab homphiaj yog siv los pab cov menyuam hloov siab thaum ua txhaum. Niam txiv muaj cuabkav siv lwm yam cuabyeej los rau txim ua rau menyuam ntshai kom lawv hloov pauv, tsis yog yuav tsum siv rab nplawm xwb; xws li txwv lawv mus ua si ib ntus, txwv tsis pub saib tej duab yees uas lawv nyiam,… Muab xaus lus hais ces yog txwv tsis pub lawv tau tej yam uas lawv ntshaw, txog thaum lawv kam pauv hloov tsis ua tej yam phem lawm.
Timthawj Paulus kuj qhuab ntuas cov ua niam ua txiv, tshwjxeeb yog leej txiv hais tias “nej tsis txhob lam tau lam ua rau nej cov menyuam chim, nyob tsam lawv tu siab” (Kaulauxais 3:21). Tej kev yuam cai li tus kheej pom zoo lossis ua raws siab nyiam tsim kev nyuaj rau tej menyuam tsis txaus siab yog yam tsis tsimnyog muaj ntawm tej ua niam ua txiv. Kev nplawm qhuab qhia ncaj ncees yuav tsum pib hauv txojkev hlub tuaj (nqe 24b), yog xav kom cov menyuam tau yam zoo, tsis yog nplawm vim ua twm, vim chim npau taws lossis xav tsav hwjchim. Muaj ib rooj ntsuam xyuas hauv ib ntu caij nyoog li 10 xyoo ntawm Tsev kawm Qib siab Harvard, Amelikas teb, tau xaus lus hais tias: Cov niam txiv uas txawj qhuab qhia menyuam yuav tsum muaj ob yam ua ke, yog kev hlub thiab kev nplawm. Thov tus Tswv pab kom cov ua niam ua txiv txhawj txog kev qhuab qhia menyuam thiab nplawm qhuab ntuas raws li Vajtswv Txojlus qhia, pab cov menyuam dhau los ua neeg muaj nqis pub rau tus Tswv thiab ua lub neej haum Nws siab thiaj yuav ua tiav tej lus cogtseg thaum uas muab menyuam fij rau tus Tswv.
Thov Vajtswv
Tus Tswv, thov taw qhia thiab pub tswvyim rau nyuam yaus paub nplawm qhuab qhia tej menyuam los ntawm kev hlub, pab tej menyuam dhau los ua cov neeg hwm thiab paub ua lub neej haum Koj siab. Amees.
Peb puas siv kev nplawm qhuab qhia menyuam los ntawm kev hlub lawm tau?
Nyeem Vajluskub hauv peb lub xyoos: Lukas 14:25-15:32
Kênh Youtube BHKTHN:
