Klei Aê Diê Blŭ: Klei Bi Hriêng 13:24
Êlan kliăng: “Hlei pô amâo čăm mkra anak êkei ñu hŏng giê bi êmut kơ gơ̆ yơh, ƀiădah hlei pô khăp kơ gơ̆ kriăng mkra gơ̆.” (Klei Bi Hriêng 13:24)
Klei êmuh ksiêm mĭn: Ya ngă brei amĭ ama mkra mjuăt phung anak? Mkra mjuăt phung anak hŏng klei khăng kbiă mơ̆ng ya klei mtrŭt? Hlăm čar kwar mâo klei bhiăn amâo dưi yua giê čăm, si êlan amĭ ama mkra mjuăt anak pô?
Klei Bi Hriêng 13:24 mtô: “Hlei pô amâo čăm anak êkei ñu hŏng giê bi êmut kơ gơ̆ yơh, ƀiădah hlei pô khăp kơ gơ̆ kriăng mkra gơ̆”. Kyuadah čuê ba klei soh mơ̆ng klei jing aê aduôn amĭ ama, kyuanăn jih jang phung hđeh mâo sơăi klei jăk wăt mbĭt hŏng klei jhat, drei mni kơ klei jăk diñu ƀiădah ăt mtô mkra klei diñu ngă soh mơh, čiăng kơ diñu thâo kral ya klei soh wê brei lui hĕ. Tơdah diñu amâo thâo kral klei soh wê amâodah thâo ƀiădah ăt čŏng ngă mơh kyua amâo tuôm mâo klei bi kmhal ôh, snăn srăng čăt jing mnuih jhat ƀai. Mâo sa klei ksiêm dlăng mơ̆ng sang hră prŏng Colombia, ti čar My kơ êbeh sa êbâo čô hđeh hriăm hră dơ̆ng mơ̆ng 12 truh kơ 17 thŭn, bi mkă klei gŏ sang mđing uêñ amâodah amâo mâo mđing uêñ kơ klei hriăm hră leh anăn klei diñu yua si kê (ma tuý) amâodah hơăi. Boh mơ̆ng klei ksiêm bi êdah, phung hđeh kƀah klei gŏ sang mkra mjuăt yua si kê (ma tuý) kdlưn lu hĭn tlâo blư̆.
Hdruôm hră Klei Bi Hriêng mñă lu blư̆ kơ klei mkra mjuăt anak hŏng giê (Klei Bi Hriêng 13:24; 23:13; 29:15). Klei mđăo mgô phung anak hŏng giê jing klei mưng ngă hlăm đa boh čar, ƀiădah ară anei hlăm đa boh čar mkăn, boh nik nak đơ čar tŭ dhar kreh mơ̆ng krĭng yŭ, dlăng klei čăm anak hŏng giê jing klei ktư̆ juă phung hđeh, leh anăn klei bhiăn knŭk kna kăm ghă yap klei anăn jing soh. Jing klei dleh yơh kơ phung anak Aê Diê hdĭp hlăm čar anei amâo thâo ôh si srăng mtô phung anak, ngă hlue si Klei Aê Diê Blŭ mtô amâodah ngă hlue si klei mtrŭn mơ̆ng knŭk kna?
Boh sĭt gơ̆, klei yua giê čăm knŏng jing sa mta ênhă êlan, klei kñăm phŭn jing čiăng kơ hđeh mkra mlih đăm lŏ ngă soh ôh. Amĭ ama dưi yua lu mta ênhă êlan mkăn bi kmhal anak čiăng kơ diñu huĭ, amâo guôn yua giê čăm ôh; sitôhmô kăm diñu amâo dưi hiu hlăp hlăm hruê mdei, kăm amâo dưi dlăng rup hdră hlăm tivi diñu khăp… Blŭ mklin, drei kăm ghă bhiâo đơ mta klei diñu khăp čiăng tơl diñu mkra, mlih lui hĕ klei jhat.
Khua ƀĭng kna Y‑Pôl ăt mtă mơh kơ phung amĭ ama, boh nik nak kơ phung ama, “Ơ phung ama đăm mngal phung anak diih ôh, huĭdah diñu êdu ai” (Kôlôs 3:21). Ya mta klei phung amĭ ama čoh cuăn, amâo djŏ amâo năng, srăng atăt truh kơ klei phung anak srăng êdu ai. Klei mkra mđăo mgô brei kbiă hriê mơ̆ng ai tiê khăp (êlan 24b), čiăng ba klei jăk kơ anak, amâo djŏ ôh kyua klei drei ăl ngêñ, amâodah čiăng bi êdah klei jhŏng ktang pô hŏng anak. Mâo sa klei ksiêm dlăng hlăm pluh thŭn mơ̆ng sang hră prŏng Harvard, ti čar My, ti knhal tuč klah čŭn msĕ snei: Amĭ ama čiêm rông mtô lač phung anak čiăng mâo klei tŭ dưn, brei bi knar dua mta phŭn: klei khăp leh anăn klei mkra mjuăt khăng. Akâo kơ Aê Diê brei phung amĭ ama uêñ mĭn čiêm rông mtô lač phung anak leh anăn amâo wơr bĭt ôh mkra mjuăt phung anak tui si Klei Aê Diê Blŭ mtô, đru phung anak drei hriê kơ prŏng jing mnuih tŭ dưn kơ Khua Yang, hdĭp bi mơak kơ Ñu nanao, čiăng bi leh kluôm ênŭm klei drei ƀuăn hŏng Khua Yang hlăk knăm myơr anak drei.
Si ngă drei uêñ mĭn mkra mjuăt nanao phung anak drei hŏng klei khăp mơ̆?
Wah lač: Ơ Khua Yang, akâo Ih atăt gai leh anăn brei kơ kâo klei thâo mĭn čiăng thâo mkra mjuăt phung anak hŏng klei khăp, đru phung anak jing mnuih thâo huĭ mpŭ kơ Khua Yang leh anăn hdĭp bi mơak kơ Khua Yang.
Dlăng Klei Aê Diê Blŭ hlăm tlâo thŭn: Y‑Luk 14:25-15:32
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
