II Timautes 2:1-4, 14-15
Nqe cim
“Cia kuv piav Koj lub hwjchim rau tiam uas tseem yuav los tom ntej no, piav txog koj tej txujci tseemxeeb rau txhua tus uas tseem yuav yug los.” (Phau Ntawv Nkauj 71:18b – phau txhais tshiab).
Lus nug rau sawvdaws xav:
– Timthawj Paulus twb qhia thiab cob haujlwm li cas rau tus xibhwb hluas Timautes?
– Paulus lub siab cob qhia cov yuav los ua haujlwm txuas ntxiv zoo li cas?
– Pawg Ntseeg nimno kawm Timthawj Paulus tus qauv li cas?
Timthawj Paulus zeem paub qhov tseemceeb ntawm kev cob qhia cov tibneeg yuav los ua tes haujlwm qhia Txojmoo Zoo tom qab uas nws “khiav mus txog qhov kawg lawm” (II Timautes 4:6-7). Yog li ntawd, thaum nws ntsib thiab zeem paub tus tub hluas Timautes muaj lub neej ua tau haujlwm, Paulus pib cob qhia thiab npaj haujlwm rau Timautes lub neej (Tes Haujlwm 16:1-3). Timthawj Paulus lub homphiaj uas npaj rau Timautes pib los ntawm kev sim siab (Tes Haujlwm 17:14). Thaum nws tseem tabtom qhia hauv lub nroog Npele-as, muaj ib txhia neeg Yudais tuaj ua ntxhov rau cov pejxeem. Lub sijhawm ntawd, Timthawj Paulus khiav tawm tsis nrog tus tub hluas Timautes thiab Xilas nyob lawm, tom qab ntawd Paulus kom nkawd mus ntsib nws hauv lub nroog Athees. Lub sijhawm nyob tos, tus tub hluas Timautes thiab Xilas tau txib ua tes haujlwm saib xyuas ib Pawg Ntseeg yau uas Timthawj Paulus twb tsa tau nyob hauv nroog Npele-as. Tom qab uas cob qhia tus tub hluas Timautes loj hlob txaus lawm, Paulus cob Timautes saib xyuas Pawg Ntseeg Efexus (I Timautes 1:3).
Timthawj Paulus kuj sau ob tsab ntawv xa mus rau tus xibhwb hluas Timautes, txhawb zog thiab qhia kom nws rau siab ntso ua tes haujlwm tau txais. Hauv ntu Vajluskub no, Paulus hais kom Timautes yuav tsum vamkhom Tswv Yexus txoj koob hmoov ua kom yus muaj zog thiab ua tiav feem xyuam raug txib (nqe 1). Ib qhov tseemceeb uas xibhwb Timautes yuav tsum ua, txawm yog nws hluas los yuav tsum xaiv cov neeg uas ntseeg siab tau los qhia thiab muab haujlwm rau lawv ua (nqe 2). Paulus kuj txhawb xibhwb Timautes lub zog kom txaus siab hlo nyiaj kev txomnyem ua tus Tswv tus tubrog, thiab zoo ib yam li nws ua (nqe 3). Hauv Timthawj Paulus cov lus ntuas, feem ntau yog ntuas xibhwb Timautes, ntuas kom rau siab ntso qhia qhov tseeb, qhia Vajtsw Txojlus raws li txoj koob hmoov nws tau txais (nqe 14-15). Vim qhov uas qhia Vajtswv Txojlus thiaj muaj cov fij tus kheej ua haujlwm.
Qhov uas cob qhia tibneeg los ua haujlwm txuas ntxiv ntawm Timthawj Paulus yog ib tug qauv zoo rau cov Pawg Ntseeg Vajtswv nimno. Cheemtsum mob siab nrhiav cov tibneeg muaj peevxwm, muab haujlwm rau cov neeg tau xaiv nrog ua zus kom kawm tau cov neeg ua ntej tej kev ua haujlwm. Txuas ntxiv yog cob qhia thiab coj cov neeg los ua haujlwm kom paub ua haujlwm. Thiab muab haujlwm rau lawv ua, kom muaj sijhawm siv tej koob hmoov los ua haujlwm. Ntxiv qhov ntawd yog Timthawj Paulus lub siab uas tsimnyog peb kawm xyaum. Qhov ntawd yog lub siab hlub, saib taus thiab paub ua cov ntseeg tsaug, tsis yog tus hlob pub koob hmoov rau tus yau.
Thov Vajtswv,
Tus Tswv, thov Koj ntuas nyuam yaus thiab cov kwvtij ntseeg hauv Pawg Ntseeg kom paub mob siab txog tes haujlwm cob qhia neeg ua haujlwm ntxiv los ntawm kev hlub thiab lub siab saib taus kom Pawg Ntseeg niaj hnub muaj tibneeg ua haujlwm. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb koomtes li cas rau tes haujlwm cob qhia tibneeg ua haujlwm ntxiv nyob hauv Pawg Ntseeg?
Nyeem Vajluskub hauv peb lub xyoo: Yakaunpaus 4:1-5:20
Kênh Youtube BHKTHN:
