Bơtho Khôi Juăt 32:44-47
“Na sư khan kơ kon pơlei: Lăm jơhngơ̆m lu iĕm athei wei răk bĕ đĭ dôm nơ̆r inh roi ăn kơ lu iĕm lăm năr ‘nâu, wă kơ lu iĕm gơh bơtho ăn kơ lu kon sâu iĕm pơm kiơ̆ dôm nơ̆r lăm khôi juăt noh.”
(Bơtho Khôi Juăt 32:46)
Nơ̆r jet tơchĕng pơwao:
– ‘Bok Môis đei pơkă kơ kon pơlei Isơrael kăl kơ pơm ‘bar tơdrong gĭt kăl hơyơ đang kơ mơ̆ng bơngai đŏk tơdrong hơri ‘nâu?
– Yua kơ kiơ Môis pơtŏ ting lu nơ̆r lăm tơdrong hơri ‘nâu thoi tơdrong arih kon pơlei Isơrael?
– Bơ̆n kăl kơ đei jơhngơ̆m thoi yơ hăm nơ̆r Kră Yang?
Đang kơ đŏk lu nơ̆r lăm tơdrong hơri, ‘bok Môis pơkă kơ lu kon pơlei Isơrael kăl kơ đei jơhngơ̆m păng pơm kiơ̆ mă trŏ thoi nơ̆r đei tơ’blŏk lăm tơdrong hơri noh. ‘Nâu ưh kơsĭ lăp tơdrong hơri đĕch na ‘nâu kư̆m nơ̆r tơdrong arih (Bơtho Khôi Juăt 4:1), yua kơ nơ̆r ‘bok Môis noh bơih lu nơ̆r đơ̆ng ‘Bok Kei-Dei ăn kơ sư. Kơlih kơ thoi noh, sư tơ’blŏk kơ kon pơlei Kră Yang kăl kơ athei “lăm jơhngơ̆m lu iĕm athei wei răk bĕ” “bơtho” păng “pơm kiơ̆” dôm nơ̆r lăm Khôi juăt ‘nâu (trong 46). Nơ̆r “lăm jơhngơ̆m lu iĕm athei wei răk lăm jơhngơ̆m dôm nơ̆r lăm Khôi juăt noh. ‘Nâu bơih tơdrong mă rim ‘nu wei răk hăm ‘Bok Kei-Dei. Nơ̆r Kră Yang ưh kơsĭ lăp wă “păng bơ̆n ‘nĕ kơ mơ̆ng lăm đon đĕch, khan ‘Bok Kei-Dei kư̆m iŏk” mălei rim ‘nu athei sơng iŏk kơdih kơdih, mơ̆t hrơm jơ̆p lăm jơhngơ̆m bơ̆n wă kơ wei răk păng pơm kiơ̆ (Yakơ 1:22).
Minh tơdrong hiơ̆k bơngơ̆t trăp đơ̆ng noh kon pơlei Isơrael ưh kơsĭ wei răk nơ̆r Kră Yang bơtho đĕch ôh, na lu sư athei ră roi dơ̆ng, bơtho dôm lu nơ̆r noh kơ kon sâu lu sư kơdih. Tơdrong pơm kiơ̆ khôi juăt ưh kơsĭ lăp dơ̆ng ‘bơ̆t chăl lu yă ‘bok dah mĕ ‘bă đĕch ôh, mălei athei bơwei hơnơ̆ng đơ̆ng chăl ‘nâu truh chăl nai lăm kon pơlei Kră Yang, năr ayơ khôi juăt Kră Yang. Nơ̆r Môis pơkă kơnhăm tơgŭm kơ kon pơlei Isơrael klaih đơ̆ng jơhngơ̆m mă oei trăp trĭn dah mă hli tơtăm đơ̆ng rŏng kơ mơ̆ng dôm nơ̆r mơ̆ng ‘brơ̆k mơnat đơ̆ng tơdrong hơri Môis pơm. Yua kơ kon pơlei Kră Yang pơm kiơ̆ dôm nơ̆r Môis pơkă đĕch, lei na lu sư gơh arih sot đunh tơ anih pơkă Kră Yang ăn (trong 47).
Dang ei, wă kơ gơh pơm kiơ̆ nơ̆r Kră Yang, adrol hloh bơ̆n kăl kơ chih răk Kră Yang lăm jơhngơ̆m klơm klak. Tơdrong noh kăl kơ bơ̆n ‘măn jơ năr đŏk tơchĕng nơ̆r Kră Yang păng thuơk răk. Tơpă, lơ bơngai lui truh năr tơpơh chĕp Sơ̆p hla bơar ‘Bok Kei-Dei năm tơ hnam akŭm, gô brŏk tơ hnam ming lê̆ minh ‘bôt, truh năr tơpơh đơ̆ng rŏng chĕp ba dơ̆ng! Lơ bơngai yua kơ hrăt hrot gah tơdrong arih ding mah ưh kơ đei jơ năr đŏk nơ̆r krao khan rim năr. Dah bơ̆n ưh kơ pơhrăm păng wei răk nơ̆r Kră Yang lei na liơ gơh bơtho kơ kon sâu bơ̆n băt nơ̆r Kră Yang. Kăl kơ ‘blŏk thoi âu tơdrong hŏk pơhrăm, pơm kiơ̆ păng bơtho nơ̆r Kră Yang kơ chăl đơ̆ng rŏng ‘bơm truh tơdrong arih dah lôch rim kơ bơ̆n păng hnam dơnŏ bơ̆n.
Ơ Kră Yang, apinh Ih ăn kơ inh đei jơhngơ̆m rơhing ‘maih chă nơ̆r Kră Yang. Apinh Ih tơgŭm inh băt pơjuăt lăm tơdrong ‘măn jơ đŏk, tơchĕng pơwao nơ̆r Kră Yang wă kơ inh arih hăm nơ̆r Kră Yang bơtho kơ kon sâu arih kiơ̆ nơ̆r Ih. Yua anăn Kră Yang Yêsu Krist, Amen!
Bơ̆n hăm ‘măn jơ rim năr wă đŏk păng tơchĕng pơwao nơ̆r Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 22
Kênh Youtube BHKTHN:
