Klei Aê Diê Blŭ: II Kôrantô 4:1-6
Êlan kliăng: “Kyuadah hmei amâo mtô kơ hmei pô ôh, ƀiădah hmei mtô klei Yêsu Krist jing Khua Yang, leh anăn hmei pô jing dĭng buăl diih kyua Yêsu.” (II Kôrantô 4:5).
Klei êmuh ksiêm mĭn: Mơ̆ng klei mâo tơl khua ƀĭng kna Y‑Pôl sĭt suôr hưn mtô kơ Khua Yang Yêsu hlăm jih jang klei truh? Hlei pô bi mmăt klei mĭn phung amâo đăo? Ñu kñăm hưn mtô kơ hlei Khua Yang Yêsu jing? Si ngă drei hưn mtô Khua Yang Yêsu kơ arăng?
Khua ƀĭng kna Y‑Pôl hưn klă bruă ñu mă tŭ hiu hưn mtô Klei Mrâo Mrang Jăk jing mơ̆ng klei Aê Diê pap. Kyuanăn, khădah tuôm hŏng ya mta klei truh dưn ñu amâo êdu ai ôh ƀiădah ăt dôk sĭt suôr hưn mtô kơ Khua Yang Yêsu (êlan 1). Jing sa čô mnuih hưn mtô kpă ênô, ñu amâo ngă klei mnêč amâodah bi msoh klei Aê Diê blŭ ôh, ƀiădah hŏng ai tiê kpă ênuah ñu bi êdah klă mngač klei sĭt nik, khă arăng mčeh luar, bi kdơ̆ng dưn. Ñu đăo sĭt hŏng ai tiê kpă hlăm mnuih, diñu srăng ksiêm leh anăn thâo săng djŏ kơ bruă ñu dôk hưn mtô ti anăp Khua Yang (êlan 2).
Khă snăn dưn, mâo phung amâo thâo ƀuh ôh klei mngač Klei Mrâo Mrang Jăk khua ƀĭng kna hưn mtô, kyuadah ai tiê klei mĭn diñu mâo čhiăm guôm klei amâo đăo bi mmăt. Klei mngač Klei Mrâo Mrang Jăk ăt mtrang mngač guh kơang, ƀiădah kyua “yang ênuk anei” jing Satan guôm hĕ leh klei mĭn diñu, ngă kơ diñu amâo dưi thâo săng ôh klei mngač guh kơang Yang Krist. Ñu hưn klă Khua Yang Yêsu Pô yơh jing rup Aê Diê (êlan 4) ƀiădah phung mâo klei hdĭp myang dôk bum ală amâo dưi thâo ƀuh ôh. Mơ̆ng anăn, khua ƀĭng kna Y‑Pôl hưn klă bruă klam ñu êjai hưn mtô Klei Mrâo Mrang Jăk jing đru kơ phung bum ală klei hdĭp myang dưi thâo ƀuh klei sĭt nik, kyuanăn ñu lač hŏng klei khut khat, “hmei amâo mtô kơ hmei pô ôh, ƀiădah hmei mtô klei Yêsu Krist jing Khua Yang”. Kyua Khua Yang Yêsu, snăn ñu dlăng kơ ñu pô jing dĭng buăl kơ phung ñu hưn mtô leh anăn kăp čiăng mă bruă kơ diñu (êlan 5).
Atur kơ bruă khua ƀĭng kna Y‑Pôl hiu hưn Anăn Khua Yang jing mơ̆ng klei bi tuôm hŏng Khua Yang Ñu hlăk ti êlan ñu nao kơ Damas (Bruă Phung Khua Ƀĭng Kna 9). Ñu ƀuh klei mngač guh kơang Khua Yang Yêsu. Klei mngač anăn yơh mtrang mngač kơ ai tiê leh anăn pŏk mblang klei mĭn ñu čiăng kơ ñu dưi thâo săng klei guh kơang Khua Yang. Dơ̆ng mơ̆ng anăn, grăp blư̆ ñu hưn mtô Klei Mrâo Mrang Jăk, ñu knŏng kñăm kơ Khua Yang Yêsu Pô Bi Mtlaih, amâo djŏ kơ ñu ôh. Ñu blŭ klă Khua Yang Yêsu jing Khua Yang ñu.
Tơdah hiu hưn Klei Mrâo Mrang Jăk, drei đăm wơr bĭt ôh kyua klei Aê Diê pap yơh drei dưi mâo bruă jao anei. Leh anăn klei yuôm brei hdơr, Khua Yang Yêsu jing phŭn nanao kơ Klei Mrâo Mrang Jăk. Ñu jing Aê Diê, jing Khua leh anăn jing Mtao kơ klei hdĭp drei. Brei drei kñăm hưn bi êdah klei sĭt nik klei bi mtlaih mơ̆ng “Yêsu Krist jing Khua Yang” kơ phung drei dôk hưn mtô, čiăng kơ diñu ư ai đăo kơ Khua Yang jing đăo knang sĭt kơ Khua Yang Yêsu jing Khua Yang, amâo djŏ ôh kyua mơ̆ng ya mta klei mtrŭt amâodah phŭn knhal mkăn.
Hŏng si êlan drei hưn klă kơ Khua Yang Yêsu jing Khua Yang kơ drei pô?
Wah lač: Ơ Khua Yang Yêsu, Ih jing Khua Yang kâo. Akâo Ih brei kâo kăp čiăng hiu hưn kơ Ih Pô kơ phung dôk hlăm klei Satan bi bum ală ai tiê čiăng kơ diñu thâo ƀuh klei sĭt nik leh anăn dưi mâo klei bi mtlaih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 7
Kênh Youtube BHKTHN:
