II Kauleethaus 4:1-6
1 Vajtswv hlub peb heev nws thiaj muab tes haujlwm no rau peb ua, yog li ntawd peb thiaj tsis poob siab. 2 Peb yeej tsis zais siab thiab tsis ua tej uas yuav poob ntsejmuag; peb tsis tau dag ntxias leejtwg lossis peb tsis hloov Vajtswv txojlus. Vajtswv yeej pom hais tias peb qhia tseeb xwb, peb niaj hnub qhia tej uas yuav ua rau sawvdaws nyias paub nyias tej kev txhaum. 3 Rau qhov cov neeg uas tsis totaub Txojmoo Zoo uas peb qhia, tsuas yog cov neeg uas tabtom yuav raug puastsuaj xwb. 4 Lawv tsis ntseeg, rau qhov tus vajtswv uas kav ntiajteb no ua rau lawv lub siab ruam lawm. Nws ua kom lawv tsis pom qhov kaj uas ci tuaj rau lawv, qhov kaj ntawd yog Txojmoo Zoo uas qhia txog Yexus Khetos lub tshwjchim uas ci ntsa iab, nws muaj tus yamntxwv zoo li Vajtswv. 5 Peb yeej tsis qhia txog peb zaj; peb qhia hais tias Yexus Khetos yog tus Tswv, thiab peb yog nej cov tubtxib, rau qhov peb ua Yexus Khetos tes haujlwm. 6 Tus Vajtswv uas hais tias, “Qhov kaj cia li ci hauv qhov tsaus ntuj tuaj,” tus ntawd yog tus Vajtswv uas ua kom qhov kaj ci tuaj rau hauv peb lub siab, qhia kom peb paub Vajtswv lub tshwjchim uas ua rau Yexus Khetos lub ntsejmuag ci ntsa iab.
Nqi cim:
“Peb yeej tsis qhia txog peb zaj; peb qhia hais tias Yexus Khetos yog tus Tswv, thiab peb yog nej cov tubtxib, rau qhov peb ua Yexus Khetos tes haujlwm.” (II Kauleethaus 4:5).
Lus nug rau sawvdaws xav:
- Vim li cas Timthawj Paulus thiaj ua ncajncees rau kev qhia txog Tswv Yexus zaj hauv txhua lub sijhawm?
- Leejtwg ua rau cov tsis ntseeg lub siab ruam?
- Paulus tsom ntsees qhia hais tias Tswv Yexus yog leejtwg? – Peb tabtom qhia txog Tswv Yexus rau lwm tus licas?
Timthawj Paulus hais khov kho hais tias nws tau txais tes haujlwm tshajtawm Txojmoo Zoo yog los ntawm Vajtswv txojkev hlub. Yog li ntawd, txawm lubneej yuav tau zoo txomnyem, los nws yeej tsis poob siab tiamsis nws yuav tshajtawm txog Tswv Yexus mus li (nqi 1). Ua yog ib tug neeg ncaj ncees tshajtawm Txojmoo Zoo, Paulus yeej tsis siv tswvyim phem lossis tsis hloov Vajtswv Txojlus, tiamsis nws yeej qhia qhov tseeb thiab qhia ncaj txog qhov kaj txawm yuav raug lwm tus iab hiam thiab tawmtsam los ua cas. Nws ntseeg hais tias sawvdaws lub siab yuav txawj xeev thiab paub tseeb txog nws tes haujlwm tabmeeg Vajtswv (nqi 2).
Txawm yog li ntawd, los yeej muaj neeg tsis pom txog qhov kaj ntawm Txojmoo Zoo uas Timthawj Paulus tshajtawm, twb yog vim lawv lub siab raug ib daim ntaub tsis ntseeg thaiv ntis lawv lawm. Qhov kaj ntawm Txojmoo Zoo yeej ci ntsa iab li qub tiamsis vim “tus vajtswv uas kav ntiajteb no” yog Xatas ua rau lawv ruam lawm, lawv thiaj ntsia tsis pom txog qhov kaj ci ntsa iab ntawm tus Cawmseej. Timthawj Paulus hais khov kho hais tias, Tswv Yexus yog Vajtswv tus yamntxwv (nqi 4) tiamsis cov uas tabtom dig muag sab ntsujplig yuav saib tsis pom ib zaug li. Dhau los ntawm qhov ntawd, Timthawj Paulus paub meej nws tes haujlwm thaum tshajtawm Txojmoo Zoo yog pab cov neeg dig muag sab ntsujplig pom txog qhov tseeb, vim li ntawd nws txiavtxim siab hais tias: “Peb yeej tsis qhia txog peb zaj; peb qhia hais tias Yexus Khetos yog tus Tswv.” Vim Tswv Yexus, Paulus suav hais tias nws tus kheej zoo ib yam li tus tubtxib rau cov neeg uas nws mus qhia Txojmoo Zoo rau, thiab nws txaus siab ua haujlwm pab lawv (nqi 5).
Lub hauv paus ntawm tes haujlwm uas timthawj Paulus tshajtawm Tswv Yexus lub npe yog qhov uas nws ntsib Tswv Yexus thaum nws taug kev mus pem Damaxes (Tes Haujlwm 9). Paulus tau pom qhov kaj uas yog Tswv Yexus lub tshwjchim ci ntsa iab. Qhov kaj ntawd ci tuaj hauv nws lub siab thiab qhib nws lub tswvyim kom totaub txog Vajtswv lub tshwjchim uas ci ntsa iab. Txij thaum ntawd los, txhua zaus uas Paulus qhia Txojmoo Zoo, nws tsuas tsom ntsees thiab hais txog Cawmseej Yexus zaj xwb, tsis yog qhia nws zaj. Nws hais khov kho Tswv Yexus yog nws tus Tswv.
Thaum tshajtawm Txojmoo Zoo, peb tsis txhob hnov qab hais tias vim Vajtswv hlub peb, peb thiaj tau txais tes haujlwm no. Thiab qhov tseemceeb yuav tsum nco ntsoov hais tias; Tswv Yexus yog tus tshwjxeeb ntawm Txojmoo Zoo. Nws yog Vajtswv, yog tus Tswv thiab yog tus Vajntxwv ntawm peb lubneej. Peb yuavtsum tsom ntsees qhia hais tias “Yexus Khetos yog tus Tswv”, nws yog txojkev cawmdim tseeb rau cov neeg uas peb qhia lawv, kom xwv thaum lawv ntseeg Tswv Yexus ces yog lawv ntseeg tias Tswv Yexus yog tus Tswv tiag tiag tsis yog ntseeg vim lwm yam.
Peb hais khov kho hais tias Tswv Yexus yog tus Tswv los ntawm yam dabtsi?
Thov Vajtswv:
Tswv Yexus, Koj yog nyuamyaus tus Tswv. Thov koj pab nyuamyaus txaus siab hlo tshajtawm txog Koj lub npe rau cov neeg tabtom raug dab Ntxwgnyoog ua rau dig muag sab ntsujplig kom lawv pom qhov tseeb thiab tau cawmdim. Ameeg.
Email: kawmvajluskubtxhuahnub@gmail.com
Kênh Youtube BHKTHN:
