Klei Aê Diê Blŭ: Klei Mmuñ Hđăp 78:1-8
Êlan kliăng: “Čiăng kơ diñu čang hmăng kơ Aê Diê, leh anăn amâo wơr bĭt ôh bruă Aê Diê ngă, ƀiădah djă pioh klei Ñu mtă,” (Klei Mmuñ Hđăp 78:7)
Klei êmuh ksiêm mĭn: Ya klei pô čih iêô mthưr phung ƀuôn sang brei ngă? Si klei yuôm leh anăn klei kñăm ñu čiăng bi klă kơ klei mtô phung anak čô? Ya mta klei drei mtô kơ phung anak čô drei êlâo hĭn?
Klei Mmuñ Hđăp 78 jing hdruôm hră klei duê mơ̆ng Y-Asap, mnuih Lêwi čih mkra. Ñu jing khua gĭt gai leh anăn pô bi hriăm bruă mmuñ mpŭ mni, pĕ brô̆, ayŭ đĭng kliă, êyuh dang hlăm ênuk sang mtao Y-Đawit (I Klei Yăl Dliê 16:4-5). Kčưm dơ̆ng hdruôm hră Klei Mmuñ Hđăp anei, ñu iêô mthưr phung ƀuôn sang mđing hmư̆ klei ñu mtô lač, jing mta klei phung aê đưm lŏ yăl dliê wĭt kơ phung anak čô kơ klei guh kơang leh anăn klei myang Aê Diê, găn lu gưl ênuk. Bruă klam kơ phung ƀuôn sang Israel mơ̆ng ênuk anei kơ ênuk lŏ čuê jing brei mtô lač kơ phung anak čô drei pô leh anăn lŏ hưn yăl dliê kơ ênuk êdei anăp (Y-Yôel 1:3; Klei Mtô Mñă Klei Bhiăn 6:7-9).
Hlăk čih Klei Mmuñ Hđăp anei, mta klei pô čih uêñ mĭn tal êlâo hĭn, anăn jing kơ phung gưl ênuk lŏ čuê êdei anăp, brei thâo si hƀuê ênuk găp djuê pô mơ̆ng phung gưl ênuk êlâo mtô lač yăl dliê leh. Klei kñăm čiăng đăm lĕ hlăm klei soh amâodah lui wir ôh, ƀiădah brei đăo knang kơ Aê Diê hŏng jih ai tiê. Ñu kñăm kơ bruă mtô lač kơ phung anak čô čiăng đru phung anak čô amâo wơr bĭt ôh bruă Aê Diê ngă leh kơ phung aê đưm diñu, ƀiădah djă pioh klei Aê Diê mtă (êlan 7). Aê Diê amâo knŏng “Mjing leh sa klei hưn hlăm phung Yakôp, Ñu brei sa klei bhiăn kơ phung Israel”, ƀiădah wăt “Ñu mtă phung ama drei brei mtô klei anăn kơ phung anak digơ̆” (êlan 5). Anei jing sa klei mtă brei ngă! Aê Diê čoh čuăn kơ phung amĭ ama brei mâo bruă klam mtô lač kơ phung anak čô hlăm gŏ sang pô, čiăng đru digơ̆ thâo kral Aê Diê leh anăn hŏng jih ai tiê đăo knang kơ Ñu. Pô čih ăt lŏ bi hdơr mơh kơ klei phung aê đưm phung Israel tuôm bi kdơ̆ng leh hŏng Aê Diê. Diñu amâo dôk kjăp hlăm klei đăo leh anăn amâo dôk sĭt suôr hŏng Khua Yang. Leh anăn diñu tŭ leh boh jhat kyua klei diñu gao klei bhiăn.
Phung Sang Aê Diê hruê anei, čiăng snăk brei dưm êlâo hĭn bruă duh prăk kăk, ai ktang kơ klei mtô bi hriăm Klei Aê Diê Blŭ kơ phung hđeh phung hlăk ai. Leh anăn amâo wơr bĭt ôh mñă kơ phung amĭ ama, aê aduôn brei uêñ mĭn lu hĭn, wah lač hŏng jih ai tiê leh anăn mtô klei đăo kơ phung anak čô, diñu jing gưl ênuk lŏ čuê hruê êdei anăp kơ Phung Sang Aê Diê. Bruă mtô bi hriăm klei bhiăn Aê Diê kơ ênuk lŏ čuê jing yuôm leh anăn jêč êdimi, čiăng kơ phung anak čô dưi dôk kjăp hlăm klei đăo leh anăn thâo gưt asăp Aê Diê. Phung anak čô msĕ mơh brei thâo săng klei hƀuê ênuk phung ƀuôn sang Aê Diê, čiăng thâo bruă Aê Diê ngă leh anăn djă pioh klei Ñu mtô. Wăt kơ klei soh wê phung aê đưm ngă leh, klei khăng kŏ, klei bi kdơ̆ng, klei amâo dôk sĭt suôr hŏng Aê Diê, ăt kăn mdăp rei, ƀiădah anăn yơh jing klei hriăm đru kơ phung anak čô đăm lŏ ngă soh msĕ si phung aê đưm pô ôh (êlan 8). Hŏng klei anăn, phung anak čô drei amâo srăng knang kơ mnuih ôh ƀiădah “Čiăng kơ diñu čang hmăng kơ Aê Diê, leh anăn amâo wơr bĭt ôh bruă Aê Diê ngă, ƀiădah djă pioh klei Ñu mtă” (êlan 7).
Si ngă drei pô leh anăn Phung Sang Aê Diê wah lač leh anăn mtô lač kơ phung anak čô drei thâo đăo knang kơ Aê Diê djŏ tui si klei Aê Diê mtă mơ̆?
Wah lač: Ơ Khua Yang, akâo Ih mñă kơ kâo đăm wơr bĭt ôh mtô lač kơ phung anak čô djă pioh klei Aê Diê mtă, čiăng kơ tơl mduôn khua diñu ăt kăn kbưi mơ̆ng Klei Ih Blŭ rei. Akâo Khua Yang đru phung ênuk lŏ čuê thâo khăp kơ Khua Yang leh anăn hŏng jih ai tiê đăo knang kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
