Klei Aê Diê Blŭ: Y-Yôsuê 6:1-5
Êlan kliăng: “Klei anei jing klei bi juh kâo hlăm klei knap mñai: klei ih ƀuăn brei klei hdĭp kâo.” (Klei Mmuñ Hđăp 119:50)
Klei Êmuh ksiêm mĭn: Si klei kjăp ƀuôn Yêrikô? Si klei Aê Diê mtă kơ Y-Yôsuê leh anăn phung ƀuôn sang mprăp čiăng plah mă ƀuôn Yêrikô? Ya klei brei drei ngă čiăng dưi hlăm klei bi blah hlăm klei hdĭp mngăt?
Phung Yêrikô kđăl kjăp ƀăng jang, gak răng kjăp, amâo mâo sa čô kbiă kăn mâo sa čô mŭt ôh kyua huĭ kơ phung ƀuôn sang Israel. Hlue si klei thâo ƀuh mơ̆ng đưm, mnư̆ ƀuôn Yêrikô kjăp snăk, mâo lu tal. Knhal ti gŭ hĭn jing mnư̆ hŏng lăn, lŏ pia jing guê, leh anăn truh sa tal mnư̆ mdơ̆ng dlông mơ̆ng 4 truh 5 met hŏng dŭm klŏ boh tâo prŏng. Nah dlông mnư̆ anei jing tal mnư̆ mkăn hŏng ƀrĭk lăn lŭ kpal 2 met, dlông hlăm brô 6-8 met. Dua tal mnư̆ anei bi klin dlông hlăm brô 10-12 met.
Tal dlông hĭn leh anăn nao êlam hĭn phă lam jing tal mnư̆ tal tlâo hŏng ƀrĭk lăn lŭ. Tơdah lač hlue si klei blŭ anak mnuih snăn phung ƀuôn sang Israel amâo dưi găn ôh tlâo tal mnư̆ kjăp anei.
Y-Yôsuê leh anăn phung ƀuôn sang mđing hmư̆ klei Aê Diê lač čiăng mâo klei mprăp bi djŏ guôp. Kơ ai tiê, diñu amâo dưi êdu ai leh anăn huĭ hyưt ôh ƀiădah brei thâo Aê Diê brei leh klei dưi kơ diñu. Aê Diê lač jao leh mtao leh anăn phung lĭng kahan jhŏng ktang ƀuôn prŏng anei hlăm kngan Y-Yôsuê. Kơ bruă ngă, Aê Diê mtrŭn asăp kơ jih jang phung êkei bi blah srăng dar ƀuôn anăn, grăp hruê sa blư̆ hlăm jih năm hruê. Kjuh čô khua ngă yang srăng nao êlâo kơ Hip Klei Bi Mguôp, êbat êjai ayŭ kjuh ƀĕ ki êjai, ki ngă hŏng ki biăp knô amâo djŏ hŏng msei ôh. Ki anei mguôp hŏng klei Aê Diê bi êdah (Klei Kbiă 19:16) leh anăn klei kkuh mpŭ (Bruă Lêwi 25:9). Êgao hruê tal kjuh, êpul mnuih srăng êbat dar jŭm ƀuôn prŏng kjuh blư̆ leh anăn kjuh čô khua ngă yang srăng ayŭ sa asăp ki ktang leh anăn sui. Leh mrâo hmư̆ ênai ki anei snăn jih jang phung ƀuôn sang ur driâo kraih ktang. Aê Diê ƀuăn hlăk anăn mnư̆ ƀuôn anăn srăng klưh. Phung ƀuôn sang srăng đĭ mnư̆ leh anăn grăp čô srăng nao phă ƀuôn prŏng.
Y-Yôsuê leh anăn phung ƀuôn sang amâo huĭ hyưt ôh, amâo kdŭn tluôn ôh hlăk tuôm hŏng klei truh ƀiădah diñu mđing hmư̆ klei Aê Diê blŭ čiăng mâo klei mđĭ ai leh anăn hlue ngă. Phung đăo kơ Krist ăt jing phung kahan Aê Diê. Drei bi blah čiăng bi kdơ̆ng hŏng lăn ala, kđeh leh anăn yang jhat (Êphêsô 2:1-3). Tlâo êpul anei bi mguôp mbĭt čiăng gang drei jing msĕ tlâo tal mnư̆ ƀuôn Yêrikô. Drei amâo dlăng ôh kơ hnơ̆ng dlông mnư̆ leh anăn huĭ hyưt, kdŭn tluôn. Tơdah mâo klei soh, klei mưng amâo jăk, klei đing amâodah klei gun kpăk, dleh dlan hlăm klei hdĭp jing dŭm mnư̆ ƀuôn dleh dưi găn, snăn êlâo hĭn brei drei mđing hmư̆ klei Aê Diê lač hlăm Klei Aê Diê Blŭ leh anăn wah lač čiăng akâo kơ Aê Diê atăt gai. Aê Diê ƀuăn srăng brei klei dưi (Klei Mtô Mñă Klei Bhiăn 20:4). Brei drei êbat hŏng klei đăo amâo djŏ hŏng klei ală ƀuh ôh. Brei duah Aê Diê grăp hruê hlăm bruă dlăng leh anăn hriăm Klei Aê Diê Blŭ čiăng thâo leh anăn mđing hmư̆ klei Aê Diê ƀuăn, mâo klei mđĭ ai, klei mtô leh anăn klei dưi.
Si hdră drei dôk tui duah Aê Diê grăp hruê?
Wah lač: Ơ Khua Yang, akâo kơ Ih đru kâo amâo huĭ hyưt, êdu ai tơdah tlă anăp hŏng klei dleh dlan kyua đăo Aê Diê bi blah brei kơ kâo. Akâo kơ Ih pŏk mblang ală kâo, pŏk knga kâo čiăng thâo klei Aê Diê dôk lač kơ ya klei kâo dôk găn hlăm Klei Aê Diê Blŭ. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sôphôni 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
