Klei Aê Diê Blŭ: II Kôrantô 10:4-8
Êlan kliăng: “Hmei bi rai klei bi mgăl leh anăn djăp mta klei mgao bi kdơ̆ng hŏng klei thâo kral Aê Diê, leh anăn atăt jih jang klei mĭn brei jing mnă gưt kơ Krist” (II Kôrantô 10:5)
Klei êmuh ksiêm mĭn: Khua ƀĭng kna Y-Pôl brei thâo ya mnơ̆ng bi blah ñu yua čiăng bi blah leh anăn bi blah hŏng ya klei? Ya hdră kñăm ñu ktưn hưn leh anăn ba yua mnơ̆ng bi blah mơ̆ng Aê Diê? Ya mnơ̆ng drei khăng yua čiăng msir mgaih klei rŭng răng hlăm Sang Aê Diê?
Phung bi kdơ̆ng hŏng Khua ƀĭng kna Y-Pôl lač ñu knŏng khăng hŏng klei blŭ hlăm hră, ƀiădah tơdah tlă anăp ñu lŏ êdu êun leh anăn blŭ ti gŭ. Ñu wĭt lač leh kơ phung đăo Kôrantô ñu amâo bi blah ôh hŏng mnơ̆ng bi blah mơ̆ng kđeh asăr, jing mơ̆ng klei hdĭp anei, ƀiădah hŏng klei myang Aê Diê (êlan 4).
Khua ƀĭng kna Y-Pôl mblang hŏng phung đăo Kôrantô mbĭt hŏng phung đăo dôk mâo klei mĭn soh čhuai kơ ñu pô jing klei myang Aê Diê jing klei myang mâo ai ktang “bi rai kđông kjăp” mơ̆ng sa satan, “bi rai klei bi mgăl” mơ̆ng yang jhat, “djăp mta klei mgao bi kdơ̆ng hŏng klei thâo kral Aê Diê, leh anăn atăt jih jang klei mĭn brei jing mnă gưt kơ Krist” (êlan 4-5), mbĭt anăn ñu ăt yua klei myang Aê Diê čiăng “bi kmhal jih jang klei amâo gưt asăp”. Leh anăn mnơ̆ng anăn jing klei wah lač, klei đăo, klei čang hmăng leh anăn klei khăp (Êphêsô 6:13-18). Phung roh drei jing yang jhat amâo djŏ anak mnuih ôh, kyua anăn wăt tơdah Khua ƀĭng kna Y-Pôl yua klei blŭ ktang bi êdah klei myang Aê Diê brei leh anăn yua mnơ̆ng bi blah mơ̆ng Aê Diê ƀiădah ñu knŏng jih ai tiê čiăng ba klei mđĭ ai kơ phung đăo ti Sang Aê Diê Kôrantô amâo djŏ hŏng hdră kñăm bi rai ôh (êlan 8); ñu amâo mâo ya klei hêñ ôh hŏng Aê Diê leh anăn hŏng ai tiê pô.
Phung mă bruă kơ Aê Diê mâo Ñu brei brei mnơ̆ng bi blah hŏng klei dưi Ñu pô čiăng drei nao mă bruă leh anăn mâo boh tŭ lu amâo djŏ čiăng bi blah hdơ̆ng pô ôh. Khua ƀĭng kna Y-Pôl sa blư̆ dơ̆ng bi mklă hŏng phung bi kdơ̆ng snei ñu jing dŏ Krist (êlan 7) tơdah ñu yua klei myang Aê Diê čiăng bi kdơ̆ng hŏng phung bi roh dôk ngă mgao bi kdơ̆ng hŏng ñu leh anăn phung mă bruă mbĭt. Drei ăt msĕ si Khua ƀĭng kna Y-Pôl mơh, mâo Aê Diê brei mnơ̆ng bi blah mơ̆ng Aê Diê čiăng bi blah hŏng mnêč yang jhat, mă klei myang Yang Mngăt Jăk hiu hưn Klei Mrâo Mrang Jăk leh anăn mă bruă kơ ñu (Bruă Phung Khua Ƀĭng Kna 1:8), bruă adôk jing drei yua mnơ̆ng anăn tơdah tlă anăp hŏng klei rŭng răng, bi kdơ̆ng hlăm Sang Aê Diê mơ̆ amâodah hơăi. Tơdah drei ăt knang hlăm kđeh asăr čiăng bi blah leh anăn bi lông hlei pô dưi snăn amâo djŏ knŏng amâo dưi msir mgaih klei amâo thâo bi djŏ ôh ƀiădah ăt kăn dưi bi guh kơang Anăn Aê Diê rei.
Diih khăng yua mnơ̆ng bi blah mơ̆ng kđeh asăr čiăng bi kdơ̆ng hdơ̆ng pô hlăm Sang Aê Diê mơ̆?
Wah lač: Ơ Aê Diê! Bi mni lač jăk kơ Ih brei leh kơ kâo mnơ̆ng bi blah hlăm mngăt. Akâo kơ Ih đru kâo thâo yua klei myang Aê Diê brei tơdah tlă anăp hŏng klei yang jhat mplư amâo yua ôh knuih kđeh asăr čiăng bi kdơ̆ng hdơ̆ng pô.
Dlăng Klei Aê Diê Blŭ hlăm tlâo thŭn: Y- Mathiơ 26:26-68
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
