Klei Aê Diê Blŭ: Klei Bi Hriêng 11:16-17
Êlan kliăng: “Arăng srăng mpŭ kơ mniê mâo knuih jăk, ƀiădah phung êkei jhŏng ƀai mâo knŏng klei mdrŏng” ( Klei bi hriêng 11:16)
Klei êmuh ksiêm mĭn: Ya klei Mtao Y-Salômôn bi hriăm kơ mniê leh anăn êkei ? Si ngă jing“mniê mâo knuih jăk”? Si ngă bruă klam phung mniê leh anăn êkei hlăm gŏ sang leh anăn hlăm ala ƀuôn? Ya klei drei akâo kơ Khua Yang đru pô bi mlih čiăng kơ gŏ sang mâo thiăm klei jăk mơak leh anăn bi mơak kơ Aê Diê?
Mtao Y-Salômôn brei anak ñu bi mĭn kơ ênoh yuôm mơ̆ng klei hdĭp anei mơ̆ng klei bi hmô kơ mniê leh anăn êkei. Boh blŭ “mniê mâo knuih jăk” jing “mniê mâo klei khăp”. Mniê anăn dưi mpŭ mơ̆ng klei mưn năng kơ bruă kngan ñu ngă leh anăn djăp bruă ñu ngă dưi bi mni ti ƀăng jang ti anăp phung ƀuôn sang (Klei Bi Hriêng 31:31). Dŭm klei tŭ dưn mơ̆ng mniê mâo knuih jăk ngă amâo djŏ knŏng đru kơ lăn ala anei jăk siam hĭn ôh, ƀiădah lŏ bi msiam leh anăn tŭ dưn kơ mngăt pô (êlan 17a). Mbĭt hŏng klei bi hmô kơ mniê mâo knuih jăk snăn klei bi hmô kơ êkei “jhŏng ƀai” (êlan 16b). Boh blŭ “jhŏng ƀai” jing jhŏng leh anăn ăt dưi mblang jing ktang. Phung êkei kyua mơ̆ng ai ktang pô čiăng dưi mâo ngăn drăp. Ƀiădah kyua jih ai tiê duah ngăn drăp bi rŭng kđeh ñu pô (êlan 17b).
Mtao Y-Salomôn bi hriăm anak ñu ƀuh hnơ̆ng yuôm bhăn mơ̆ng phung mniê hlăm gŏ sang. Khă gơ̆ phung mniê năng ai amâo mâo ai ktang ôh sĭt mă bruă amâo dah amâo dưi ngă lu ngăn drăp msĕ si ung ôh, ƀiădah kyua klei gĭr, kriê dlăng ung, anak, bi hriăm anak čô jing mnuih tŭ dưn, boh nik bi hriăm phung anak hdĭp thâo mpŭ kơ Aê Diê, ba leh klei mpŭ kơ ñu leh anăn kơ gŏ sang. Klei kriê dlăng, đru mơ̆ng mô̆ bi hrŏ klei suaĭ êmăn, dleh dlan kơ ung hlăm grăp hruê. Klei bi hriăm mơ̆ng Mtao Y-Salômôn brei ƀuh hnơ̆ng yuôm bhăn hlăm bruă mkŏ mjing sa gŏ sang hơĭt kjăp brei mâo klei thâo khăp êdu êun mơ̆ng phung mniê leh anăn klei ai ktang mơ̆ng phung êkei, msĕ si phung hlăm lăn ala khăng lač: “Ti tluôn klei tŭ jing mơ̆ng sa čô êkei mâo klei kăp đru mơ̆ng phung mniê”. Amĭ Mtao Y-Lemuêl bi mni kơ phung mniê năng mpŭ “Ñu jing yuôm hĭn kơ boh tâo mngač” (Klei Bi Hriêng 31:10). Phung mniê đaŏ kơ Krist hlăm gŏ sang brei êdu êun, mâo klei khăp, jih ai tiê kriê dlăng gŏ sang. Phung êkei đaŏ kơ Krist brei akâo kơ Aê Diê brei kơ mô̆ klei thâo khăp, êdu êun ƀiădah êlâo hĭn, phung êkei ăt thâo gĭr mă bruă leh anăn hriăm hdĭp huĭ mpŭ kơ Aê Diê kjăp čiăng năng hŏng mniê năng mpŭ Aê Diê brei. Leh mkŏ mjing gŏ sang, ung mô̆ brei hdĭ tui si Klei Aê Diê Blŭ: “Ƀiădah brei grăp čô diih khăp kơ mô̆ ñu msĕ si ñu khăp kơ ñu pô, leh anăn brei mô̆ mpŭ kơ ung ñu.” (Êphêsô 5:33).
Drei ksiêm mĭn kơ pô jing mniê mâo knuih jăk, thâo khăp, êdu êun, amâo dah êkei jhŏng ktang mơ̆ ?
Ơ Khua Yang, kâo bi mni lač jăk kơ Ih kyua Klei Ih Blŭ mñă kơ kâo čiăng jing phung anak êkei, anak mniê tŭ dưn kơ Ih. Akâo kơ Ih bi hriăm kâo ƀuh klei kƀah, leh anăn brei kâo thâo gĭr čiăng bi mlih, mđĭ kyar kâo pô čiăng jing mô̆, ung jăk hlăm gŏ sang leh anăn bi guh kơang Anăn Aê Diê ti krah ƀuôn sang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: 30 Klei Yap 20
Kênh Youtube BHKTHN:
