Klei Aê Diê Blŭ: I Y-Timôthê 5:3-16
Êlan kliăng: “Tơdah sa čô mniê đăo mâo hlăm găp djuê ñu phung mniê djiê ung, brei ñu đru digơ̆; đăm bi ktrŏ kơ Phung Sang Aê Diê ôh, čiăng kơ Phung Sang Aê Diê dưi đru phung mniê djiê ung sĭt” (I Y-Timôthê 5:16)
Klei êmuh ksiêm mĭn: Ya klei Khua ƀĭng kna Y-Pôl mtă kơ Khua Pô mtô Y-Timôthê ngă hŏng phung mniê djiê ung? Mâo dŭm êpul mniê djiê ung lač tinei? Ya klei brei drei leh anăn Phung Sang Aê Diê ngă hŏng phung mniê djiê ung riêng gah pô?
Hlăm trăn Klei Aê Diê Blŭ hruê anei, Khua ƀĭng kna Y-Pôl đru kơ Khua pô mtô hlăk ai Y-Timôthê bi mklă dŭm êpul phung mniê djiê ung leh anăn klei bhiăn đru, kyua ngăn prăk Phung Sang Aê Diê brei yua djŏ anôk (êlan 16), ăt msĕ mơh čiăng kơ mnuih mâo klei đru amâo jing dôk hơăi mang ôh tơl ngă bruă jhat (êlan 13).
Mâo tlâo êpul phung mniê djiê ung mâo lač tinei. Êpul tal sa jing phung mniê djiê ung mâo anak čô (êlan 4, 8, 16), bruă klam kriê dlăng jing kơ anak čô hlăm sang. Klei anei “đăm bi ktrŏ kơ Phung Sang Aê Diê ôh” (êlan 16), ăt jing bruă ngă “hdơr knga”, “ngă klei mpŭ”, “bi mơak kơ Aê Diê” (êlan 4, 8). Hlei phung anak čô amâo mđing, amâo kriê dlăng kơ găp djuê dôk hjăn păn hlăm gŏ sang dlăng jing bruă “hngah kơ klei đăo” (êlan 8).
Êpul mniê djiê ung tal dua jing “phung mniê djiê ung hlăk ai” (êlan 11-15). Hŏng phung anei, tơdah Phung Sang Aê Diê đru, diñu srăng jing “dôk hơăi mang”, ênưih lĕ hlăm klei mplư “hiu sang anei sang adih”, “djưč leh anăn hiu yăl dliê kơ bruă arăng”, “blŭ klei amâo năng blŭ ôh.”, leh anăn tŭ kơ klei “bi ktlah mơ̆ng Krist” jing prŏng snăk. Kyua anăn, čiăng diñu pô amâo jing klei găl kơ “pô roh klei dưi blŭ jhat kơ drei”, amâo “lui wir” kyua klei kđeh tluh, snăn klei Khua ƀĭng kna Y-Pôl mtă jing “lŏ dôk ung, mâo anak, thâo kiă kriê sang diñu pô” (êlan 14).
Êpul phung mniê djiê ung tal tlâo, Khua ƀĭng kna Y-Pôl mtă kơ Khua pô mtô hlăk ai Y-Timôthê brei mđing uêñ, jing “mniê djiê ung sĭt” (êlan 3, 5, 9-10, 16). Anei jing phung khua thŭn amâo mâo anôk knang. Kyua ala ƀuôn hlăk đưm amâo mâo ôh dŭm êpul bruă, êpul đru kơ klei hdĭp mda ala ƀuôn, kyua anăn phung mniê djuê ung khua thŭn dleh dlan snăk hlăm bruă duh ƀơ̆ng, kyua anăn, Phung Sang Aê Diê brei mđing uêñ “đru digơ̆” (êlan 16).
Mơ̆ng ênuk Klei Bi Mguôp Hđăp, kriê dlăng kơ phung mniê djiê ung jing sa akŏ khăng mâo mtô lač (Klei Mtô Mñă Klei Bhiăn 14:29; Klei Mmuñ Hđăp 94:6; Y-Malaki 3:5). Khua Yang Yêsu bi mguôp hŏng phung dleh dlan: “Sĭt nik kâo lač kơ diih, êjai diih ngă leh klei anăn kơ sa čô hlăm phung ayŏng adei Kâo đơ điêt anei jing klei diih ngă leh kơ Kâo yơh” (Y-Mathiơ 25:40). Kyua anăn, bruă klam kriê dlăng phung mniê djiê ung dôk hjăn păn, dleh dlan, kƀah lu mta jing bruă klam amâo dưi kƀah ôh mơ̆ng phung đăo. Grăp čô drei ăt msĕ si Phung Sang Aê Diê brei mđing uêñ kơ phung dleh dlan hlăm gŏ sang, mnuih ƀuôn sang, phung mniê djiê ung khua thŭn, phung dôk hjăn păn hlăm Phung Sang Aê Diê čiăng đru kơ digơ̆ hŏng klei klă mngač, đru mđĭ klei đăo ăt msĕ mơh klei hdĭp digơ̆ dưi ƀiă klei dleh dlan.
Drei tuôm mđing uêñ đru mơ̆ kơ phung mniê djiê ung knap mñai riêng gah pô?
Wah lač: Ơ Khua Yang, akâo kơ Ih pŏk ai tiê kâo, mblang kngan kâo čiăng đru kơ phung mâo klei čiăng mjêč, phung kƀah lu mta, phung mniê djiê ung dôk hjăn păn jŭm dar kâo čiăng kâo đru bi juh ayŏng amai adei kâo hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniêl 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
