Mathais 13:34-43
Nqe cim:
“Yav tas los thaum nej tseem tsis tau paub Vajtswv, nej niaj hnub nyiam ua txhaum, tiamsis nimno nej yuav tsum mloog Vajtswv lus, nej tsis txhob cia tej kev phem kev qias kav nej lub siab” (I Petus 1:14).
Lus nug rau sawvdaws xav:
– Timthawj Mathais sau txog Tswv Yexus kev qhuab qhia zoo licas?
– Tus Tswv txhais zaj lus pivtxwv hais txog nplej thiab txhauv rau leejtwg?
– Vim licas Nws txhais rau lawv li ntawd?
– Peb kawm tau yam dabtsi rau tus kheej dhau zaj kawm hnub no?
Ua ntej sau txog tus Tswv tej lus txhais zaj lus pivtxwv hais txog nplej thiab txhauv, Timthawj Mathais qhia paub hais tias Tswv Yexus tsuas ua lus pivtxwv los qhia xwb “…tsis muaj ib zaj uas nws tsis ua lus pivtxwv qhia li” (nqe 34b). Nws siv Ntawv Nkauj 78:2 los hais txog qhov uas Tswv Yexus ua tiav tej lus cev tseg, Nws siv lus pivtxwv los qhia thiab Nws tej lus qhia muaj lub ntsiab tob kawg li “…kuv yuav qhia tej uas tsis muaj neeg paub txij thaum tsim lub ntiajteb los rau lawv mloog” (nqe 35b).
Tomqab tso cov neeg coob coob tseg, cov thwjtim thiaj los nug tus Tswv txog lub ntsiab ntawm zaj lus pivtxwv hais txog nplej thiab txhauv, lawv xav paub lub ntsiab tob ntawm zaj lus pivtxwv no yog dabtsi thiab Tswv Yexus tau teb lawv tej lus nug. Dhau ntawm Tswv Yexus tej lus txhais lub ntsiab, peb pom txog qhov xaus sib txawv ntawm nplej thiab txhauv yog nyob rau hnub kawg, yog hnub uas leejtwg yog dab ntxwsnyoog tug yuav raug pov rau hauv lub cubtawg uas muaj kev quajntsuag tom hniav qees, tiamsis cov uas yog tus Tswv tug yuav ci ntsa iab ib yam li lub hnub hauv Leej Txiv lub Tebchaws.
Thaum nyeem ntu Vajluskub no peb pom tau hais tias tus Tswv tsis xav kom peb mus ua tus txiav txim, tiamsis Nws xav kom peb mus ua tus qhia Txojmoo Zoo, cia li tso “cov neeg uas yog dab Ntxwgnyoog cov” rau tus Tswv ua tus txiav txim nyob rau hnub kawg. Peb kuj pom hais tias thaum txog sijhawm kawg cov neeg ua phem thiab cov neeg ua zoo yuav raug cais tawm, thiab cov neeg phem yuav raug pov rau hauv lub cubtawg, nyob qhov ntawd lawv yuav quaj qw tom hniav qees (nqe 42). Peb yuav tsum zeem tseeb meej saib tamsim no peb tus kheej puas yog tus Tswv cov menyuam tiag tiag lawm, vim qee zaug peb tseem ntseeg raws ib txojkev ntseeg thiab pehawm raws txojcai xwb tiamsis qhov tseeb peb tseem tsis tau Tswv Yexus cov ntshav ntxuav peb lub txim. Yog li ntawd yuav ua cas thiaj paub hais tias tus kheej tabtom yog Vajtswv cov menyuam? Cov thwjtim thaum hnov tus Tswv ua lus pivtxwv los qhia txog Ntuj Ceebtsheej, lawv thov tus Tswv hais tias: “Thov koj txhais zaj lus pivtxwv uas koj hais txog cov txhauv hauv daim teb ntawd rau peb mloog saib yog li cas” (nqe 36), qhov no qhia tshwm lawv lub siab uas xav paub ntau yam, xav totaub meej heev ntxiv txog Tswv Yexus tej lus, thiab tus Tswv txaus siab hlo txhais qhia rau lawv totaub. Thaum uas peb tseem tabtom nyiam Vajtswv Txojlus, xav kom peb yim hnub yim paub tus Tswv heev ntxiv kom paub meej tus Tswv lub siab nyiam thiab ua lub neej haum Nws siab. Thaum ua li ntawd peb thiaj tseeb yog Vajtswv cov menyuam, uas yog menyuam saum ntuj Ceeb Tsheej.
Thov Vajtswv
Tus Tswv, thov pab nyuam yaus muaj lub siab ntshaw paub Koj heev dua qub, zeem paub Koj tej lus ceebtoom kom nyuam yaus paub lees kev txhaum, niaj hnub mloog lus thiab ua neej tsimnyog yog me nyuam saum ceeb tsheej. Amees.
Peb puas tabtom xav paub ntau heev ntxiv txog tus Tswv thiab Nws Txojlus kom ua tau raws li tej uas Nws qhia?
Nyeem Vajluskub hauv peb lub xyoos: Yauhas 2:13-3:21
Kênh Youtube BHKTHN:
https://www.youtube.com/c/bhkthn
