Klei Aê Diê Blŭ: Klei Bi Hriêng 24:3-4
Êlan kliăng: “Hŏng klei thâo mĭn arăng mdơ̆ng sang, leh anăn hŏng klei thâo săng sang anăn jing kjăp. Hŏng klei thâo săng lu adŭ bŏ hŏng djăp mta ngăn drăp yuôm leh anăn siam.” (Klei Bi Hriêng 24:3-4)
Klei êmuh ksiêm mĭn: Bi msĕ hŏng Klei Bi Hriêng 3:19, ya klei dua êlan Klei Bi Hriêng hruê anei bi êdah? Si Boh blŭ “sang” lŏ mblang jing? Si tur gŏ sang phung đăo kơ Krist brei mdơ̆ng? Ya klei brei drei ngă čiăng krơ̆ng kjăp leh anăn ba klei mdrŏng sah kơ gŏ sang?
Gŏ sang jing êpul êya ala ƀuôn yuôm bhăn Khua Yang mkŏ mjing mơ̆ng hruê mphŭn hrih mjing, êlâo kơ ƀuôn prŏng, knŭk kna, amâodah sang yang. Klei Bi Hriêng 24:3 bi mguôp hŏng dua boh blŭ “thâo mĭn”, “thâo săng”. Klei anei djŏ hŏng klei Yêhôwa dưm ti tur lăn ala, mkŏ mjing hlăm dŭm tal adiê: “Hŏng klei knhâo Yêhôwa mdơ̆ng atur lăn ala, hŏng klei thâo săng Ñu bi kjăp phung adiê” (Klei Bi Hriêng 3:19). Snăn, dua êlan Klei Bi Hriêng drei dlăng hruê anei brei ƀuh pưk sang mdơ̆ng “lu adŭ bŏ hŏng djăp mta ngăn drăp yuôm leh anăn siam” lač kơ klei mdrŏng sah, ƀiădah klei mdrŏng sah sui brei mdơ̆ng mơ̆ng tur huĭ mpŭ kơ Aê Diê, kyua Aê Diê jing phŭn mơ̆ng klei thâo mĭn, “Klei huĭ mpŭ kơ Yêhôwa jing klei kčưm kơ klei thâo săng” (Klei Bi Hriêng 1:7).
Hlăm klei blŭ Hêbrơ, “sang” lŏ yua čiăng lač kơ gŏ sang, djuê ana amâodah jih êpul (Bruă Phung Khua Ƀĭng Kna 18:8; Hêbrơ 8:8…). Msĕ si Khua Yang ƀuăn brei klei hơêč hmưi kơ “sang” Mtao Y-Đawit tơdah anak čô ñu huĭ mpŭ kơ Aê Diê leh anăn gưt kơ klei bhiăn Ñu (II Y-Samuel 7:16). Klei kjăp leh anăn klei mdrŏng sah mơ̆ng djuê ana amâo djŏ knŏng hlăm mnơ̆ng dhơ̆ng ôh, ƀiădah wăt hlăm mngăt. Tơdah sa gŏ sang amâo dưi mdơ̆ng ti dlông tur klei thâo mĭn Aê Diê bi êdah leh, jing amâo hriăm leh anăn hlue ngă Klei Aê Diê Blŭ snăn amâo mdê ôh hŏng sang mdơ̆ng ti lăn čuah, tơdah mâo adiê hjan, êa lip, angĭn êbŭ thut ktang, sang anăn srăng êbuh, rai jih (Y-Mathiơ 7:24-27).
Hruê anei, Satan dôk kăp ngă hlăm gŏ sang lu snăk. Diñu duah mnêč bi rai ênoh yuôm klei khăp, dlăng hơăi mang klei ƀuăn rơ̆ng, leh anăn amâo mđing ôh klei doh jăk hlăm klei bi dôk ung mô̆. Phung ƀuôn sang Aê Diê brei răng mgang gŏ sang ti anăp klei yang jhat bi rŭng. Kdrăp bi blah leh anăn bi kdơ̆ng jăk hĭn drei mâo jing Klei Aê Diê Blŭ. Gŏ sang brei hriăm Klei Aê Diê Blŭ, wah lač hrăm mbĭt čiăng mâo klei mtô thâo mĭn mơ̆ng Yang Mngăt Jăk. Brei drei ăt răng hŏng klei mĭn, klei ngă mâo klei bi knăl kah mbha hlăm gŏ sang. Grăp čô phung đăo kơ Khua Yang ăt brei djă pioh kjăp klei ƀuăn rơ̆ng plah wah ung, mô̆ hŏng Khua Yang Yêsu, leh anăn brei hdơr Ñu jing mta phŭn leh anăn tur kơ gŏ sang drei. Brei drei jih ai tiê duah klei thâo mĭn Khua Yang čiăng mkŏ mjing gŏ sang kjăp ktang, mdrŏng sah leh anăn jăk mơak.
Si boh klei gŏ sang drei ară anei? Ya klei brei drei bi mlih čiăng ba klei kjăp, mdrŏng sah hlăm klei Khua Yang čiăng kơ gŏ sang?
Wah lač: Ơ Khua Yang, kâo bi mni kơ Ih kyua Ih jing Khua kơ gŏ sang kâo. Akâo kơ Yang Mngăt Jăk mñă kơ kâo ñĕ kơ klei yang jhat mplư, jih ai tiê hriăm Klei Aê Diê Blŭ, leh anăn bi mguôp hŏng Khua Yang čiăng mâo klei thâo mĭn hlăm bruă mkŏ mjing leh anăn răng mgang gŏ sang. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
