Mathiơ 20:20-23
“Ala teh âu dôm tơdrong kon bơngi ‘maih iŏk gô răm, mă-lei dah bơngai bu pơm trŏ thoi ‘Bok Kei-Dei wă, bơngai ‘noh gô rih ling-lang” (I Yôhan 2:17)
Nơ̆r jet tơchĕng pơwao:
– Mĕ bre Yôhan păng Yakơ apinh Kră Yang tơdrong kiơ?
– Đơ̆ng nơ̆r Kră Yang tơl noh, Sư wă kơ lu bơngai pơhrăm kiơ̆ Sư băt kơnăl tơdrong kiơ kơplah kiơ̆ Kră Yang?
– ‘Bơ̆t tơdrong kiơ bơ̆n đei lu tơdrong ‘maih wă lei-lăi thoi ‘bok Yôhan păng ‘bok Yakơ noh?
Kơkuh kơ đĭ-đăng,
Mă khan lu jơ̆ng ‘bang mơ̆ng kơtơ̆ng bơih pêng wơ̆t Kră Yang roi ăn kơ lu sư gah tơdong Sư wă pŭ iŏk gleh pơmat, mă-lei lu jơ̆ng ‘bang oei tam mă hlôh ‘mơ̆i. Lu sư tơchĕng khan Kră Yang năm tŏk tơ pơlei Jêrusalem wă tơplih hơmet dêh char na Sư pơm pơtao pơgơ̆r dêh char noh. Lei na đe ei hrĕnh tĕnh jah apinh Kră Yang ăn lu sư pơm tih lăm anih pơtao Kră Yang pơgơ̆r. Nơ̆r bre Yôhan, Yakơ păng mĕ bre sư apinh noh thoi âu: “Inh wă kơ Ih ăn kơ ‘bar ‘nu kon inh âu oei minh ‘nu gah ‘ma minh ‘nu gah ‘ngieo, kơplah Ih pơm pơtao nhôn ning-mônh” (tr.21). ‘Nâu bơih ‘bar anih jang đei tơdrong pơgơ̆r tih, jê̆ tơtil ‘bok pơtao. Kră Yang Yêsu băt rơđah lê̆ ‘mơ̆i tơdrong ‘maih wă bre Yôhan păng Yakơ ‘bơ̆t Sư chă kơ bre ei anăn “Bôanet”, wă khan bre sư dang glaih yua kơ bre sư pơma ‘bơ̆r re (Markôs 3:17), Sư wă tơgŭm kơ bre ei klaih đơ̆ng hưch ham tơdrong ala teh noh. Mă minh, Kră Yang khan: “Lơliơ biĕm ưh kơ pơwao kơ tơdrong biĕm wă noh?”. Tơpă bre sư tam mă hlôh tơdă Kră Yang hơmet wă dŏng pơklaih huai iŏk kon bơngai đơ̆ng yoch, bre sư oei hlôh ngeh kơ Kră Yang thoi lu bơngai Juđê hlôh,lu sư tŏk-bŏk oei chang gô, ngeh kơ Kră Yang ‘Bok Mêsi truh wă tơgŭm dŏng lu sư klaih đơ̆ng’long ăt lu bơngai Rôm pơgŏ pơkep na ‘Bok Mêsi pơm hloi pơtao pơgơ̆r lu sư tơ teh âu. Mă ‘bar, Kră Yang khan: “Biĕm hăm kĕ iŏk tơdrong nat thoi Inh iŏk?” Kră Yang wă kơ bre sư băt trong kĕ jei noh trong chhŭr nuih, trong chu pơmat. Mă khan bre sư tam mă hlôh tơdrong pơmat mă Kră Yang wă chu iŏk noh, mă-lei dah bre sư ‘maih wă chu pơmat hơdai hăm Kră Yang lei noh tơdrong ‘lơ̆ng dêh (tr.22).
Kră Yang kư̆m ăn kơ bre sư băt kơ bre sư kơdih gô đei mơn pŭ pơmat hơdai Kră Yang mơ̆n (tr.23). Mă pêng, Kră Yang kư̆m tơbăt kơ bre sư tơdrong gĭt yom gơh đei hơoei gah ‘ma gah ‘ngieo kơ Kră Yang noh ưh trŏ đơ̆ng tơdrong ‘maih wă kiơ̆ kơdih ôh, mă-lei tơdrong noh Yang ‘Bă wă, lăng đơ̆ng tơdrong Sư sek tơlang tơpăt noh.
Dang ei đei lu bơngai mơ’nah awih awăn lăm Khul Lui, lu sư awih awăn hăm jơhngơ̆m ‘maih wă kiơ̆ kơdih, lu sư ‘maih wă đei tơdrong jang tih hloh kơ đe, wă kơ lơ bơngai băt kơ sư dah mă wă jang tơdrong jang tih kăl.v,v… Lu bơngai ‘nâu chă đon tôm tơdrong pơm liơ wă gơh đei anih jang,tơdrong jang kiơ̆ thoi sư ‘maih wă. Kră Yang Yêsu ưh kơ chrih hil tơdrăp kơ bre Yôhan păng Yakơ ôh yua kơ Sư wă dêh tơplih jơhngơ̆m bre noh đơ̆ng‘maih wă kiơ̆ kơ sĕch akar lăm teh đak jing ‘maih wă kiơ̆ kơ tơdrong Kră Yang tơ plĕnh ti. Kră Yang wă kơ bơ̆n ‘maih wă rai lei-lăi thoi Sư wă. Sư wă kơ bơ̆n ‘maih wă kơ chăl arih bơ̆n kơdih đei yua ăn kơ Dêh char Pơtao Sư pơgơ̆r ‘bơ̆t bơ̆n chă đei lơ bơhngol wih brŏk tơ Sư ‘nei. Kră Yang Yêsu hlôi tơplih bơih jơhngơ̆m bre Yôhan păng Yakơ đêl ‘maih wă kiơ̆ kơ sĕch akar jing ‘maih wă dêh pơyơ̆r akâu ăn kơ Dêh char Pơtao Sư pơgơ̆r; kư̆m lei-lăi mơ̆n, Sư gô pơm tơdrong noh kơ đĭ-đăng bơ̆n bơngai mă lui kơ Sư dang ei kư̆ kơ bơ̆n ‘noh lăp đon pơyơ̆r chăl arih bơ̆n ăn kơ Sư, mơ̆ng kơ Sư yua.
Kơkuh kơ Ih Kră Yang mă ‘bôh băt tôm tơdrong, Ih băt kơ inh oei awih awăn kơ Ih, tơdrong kiơ pơdrŭt inh awih awăn, Ih băt đĭ bơih, apinh Ih tơplih đơ̆ng tơdrong inh ‘maih wă kiơ̆ kơ sĕch akar jing ‘maih wă kiơ̆ thoi tơdrong ‘Bă wă tơ plĕnh ti, pơyơ̆r chăl arih inh kơ Ih, awih awăn tơdrong jang Ih. Inh krao khan yua anăn Kră Yang Yêsu Krist, Amen!
Bơ̆n hăm hơtai oei ‘maih wă kiơ̆ kơ sĕch akar dah ‘maih pơyơ̆r chăl arih awih awăn kơ Kră Yang?
Đŏk Sơ̆p Hlabơar ‘Bok Kei-Dei lăm pêng sơnăm: Êsai 22
Kênh Youtube BHKTHN:
