Loos 16:21-24
Nqe cim:
“Timautes tus uas nrog kuv ua haujlwm ua ke, nws hais noj qab nyob zoo rau nej; thiab Luki-us, Yaxoos thiab Xauxipates uas yog kuv cov kwvtij Yudais, lawv hais noj qab nyob zoo rau nej thiab” (Loos 16:21)
Lus nug rau sawvdaws xav:
– Leejtwg yog cov uas xa lus noj qab nyob zoo hauv feem kawg ntawm tsab ntawv Loos no?
– Peb pom dabtsi dhau ntawm daim ntawv teev npe cov neeg uas xa lus noj qab nyob zoo ntawd?
– Peb yuav siv zaj kawm no li cas hauv kev ua haujlwm rau tus Tswv?
Timthawj Paulus tau sau tsab ntawv Loos no thaum nws nyob hauv ib lub nroog ntawm qab teb tebchaws Kilis uas yog lub nroog Kauleethaus. Tom qab uas qhia ntau yam txog txojkev ntseeg, nyob rau feem kawg ntawm tsab ntawv no zoo li ib lo lus ntxiv rau tomqab, Timthawj Paulus tau tseg sij hawm rau cov phoojywg uas ua haujlwm nrog nws xa lus noj qab nyob zoo rau Vajtswv cov menyuam uas nyob hauv Pawg Ntseeg Loos. Muaj tag nrho 8 leej uas tau teev npe tseg ntawm no, yog: Timautes, Luki-us, Yaxoos, Xauxipates, Teti-us, Nkayus, Elaxetus thiab Khualetus.
Dhau ntawm daim ntawv teev npe 8 leej uas xa lus noj qab nyob zoo hauv feem xaus ntawm tsab ntawv Loos, peb pom tias Timthawj Paulus muaj ib pab pawg phoojywg ua haujlwm nrog nws uas muaj coob leej heev, muaj qee leej uas peb paub lawm vim twb muaj hais txog hauv Vajluskub, tiamsis kuj muaj ntau leej uas peb tsis tau paub vim lawv lub npe tsis pom hais nyob hauv lwm tsab ntawv. Txawm li ntawd los, lawv txhua tus yeej koom tib lub siab, lawv yog cov phoojywg kub siab ua Vajtswv haujlwm nrog Timthawj Paulus. Yim leej uas xa lus nyob ntawm no muaj kev sib txawv ntawm chaw yug, chaw nyob, hnub nyoog, peevxwm, meejmom, sijhawm ntseeg tus Tswv; muaj tus yog Timthawj Paulus cov txheebze, muaj tus yog nws tus tub sab ntsujplig, thiab muaj tus yog nws cov phoojywg zoo,… Txawm li ntawd los, lawv muaj kev sib koom siab zoo heev. Lawv txhua tus yog cov uas hlub thiab hwm tus Tswv, koom ib lub siab ua haujlwm rau tus Tswv, pab Timthawj Paulus hauv tes haujlwm tshajtawm Txojmoo Zoo thiab txhim tsa Pawg Ntseeg tshwjxeeb rau lwm haiv neeg. Dhau ntawm no, Timthawj Paulus kuj xav qhuas lawv thiab ua tsaug rau lawv txojkev koom tes pab ua Vajtswv haujlwm.
Nyob hauv tus Tswv Pawg Ntseeg nimno, tsis muaj leejtwg ntawm peb uas yuav ua tau Vajtswv haujlwm ib leeg es ho tawg paj txi txiv heev dua. Tus Tswv tso peb nyob hauv ib pab pawg uas muaj cov tibneeg sib txawv ntawm ntau sab. Tus Tswv xav kom peb mus ua ke hauv txojkev raws Nws qab, sib koom siab hauv kev ua Nws haujlwm, thiab sib pab ua raws li txoj koob hmoov uas nyias tau. Yuav ua tau li ntawd, peb tsis txhob muab ib leeg piv rau ib leeg, sib txeeb lossis sib tw, tiamsis yuav tsum koom tig mus rau tib lub homphiaj uas yog ua haujlwm pub tus Tswv thiab pab peb cov kwvtij. Ib leeg yuav tsum rau nqi, mloog lus thiab ua tsaug rau ib leeg, kom xwv peb Pawg Ntseeg, peb pab pawg thiab peb lub cuabyig tau txhim kho thiab huamvam.
Thov Vajtswv,
Tus Tswv, nyuam yaus ua Koj tsaug rau tej phoojywg uas Koj cia los nrog nyuam yaus ua Koj tes haujlwm. Thov pab nyuam yaus hlub Koj kawg siab thiab sib txhawb ua Koj tes haujlwm. Thov pub kom nyuam yaus muaj kev koom siab, txo hwjchim, saib taus lwm tus thiab sib ua tsaug kom muaj kev sib koom hauv kev raws Koj qab thiab ua Koj haujlwm tawg paj txi txiv. Nyuam yaus tuav Yexus Khetos lub npe thov, Amees.
Tus Tswv tau cia cov neeg tshwjxeeb twg nrog peb nyob hauv lub neej nrog tus Tswv mus thiab ua Nws haujlwm? Peb yuav tsum hloov yam dabtsi thiaj li ua tau haujlwm tawg paj txi txiv ntau ntxiv rau tus Tswv?
Nyeem Vajluskub hauv peb lub xyoos: II Xwmtxheej 28
Kênh Youtube BHKTHN:
