Lub Phiab Tooj – 31/5/2022

932

 

 

Khiavdim 30:17-21

Nqe cim

“Lawv yuav tsum nco ntsoov ntxuav tes thiab ntxuav taw, lawv thiaj yuav tsis tuag. Qhov no ua ib txoj kevcai rau lawv thiab lawv tej xeebntxwv coj mus ibtxhis li” (Khiavdim 30:21).

Lus nug rau sawvdaws xav:

  • Lub phiab tooj tau ua licas, txawb rau qhov twg thiab siv los ua dabtsi?
  • Ntxuav tes ntxuav taw yog ua yamntxwv txog yam dabtsi?
  • Vim licas Vajtswv hais kom Aloos thiab tej xeebntxwv yuav tsum ntxuav tes taw ua ntej mus cuag Nws?
  • Zaj kawm no muaj yam dabtsi ntsistxog peb?

Vajtswv qhia kom Mauxes muab tooj los ua ib lub phiab tooj thiab lub taw phiab, coj mus txawb rau ntawm lub Tsevntaub sib ntsib thiab lub thaj kem nruab nrab thiab nqa dej mus hliv rau. Cov povthawj yuav tsum siv cov dej ntawd los ntxuav tes ntxuav taw kom huv ua ntej uas mus lawm hauv lub Tsevntaub lossis mus ze ntawm lub thaj ua tej kevcai fij khoom rau Vajtswv.

Txawm yog Vajtswv twb qhia cov Yixalayees paub hais tias lawv tau zamtxim, tau dawbhuv los ntawm tus tsiaj theej txhoj, ua yamntxwv txog tus Tswv Yexus txojkev tuag theej txhoj, los ua ntej uas cov povthawj yuav ua kevcai fij khoom theej txhoj lossis khoom ua kev sib raug zoo rau tus Tswv, lawv yuav tsum tu kom lawv dawbhuv thiaj tau sawv ua Vajtswv tus uas Dawbhuv tes haujlwm raws li Vajtswv Txojlus qhia. Ntxuav tes ntxuav taw yog ua yamntxwv rau kev dawbhuv, qhuab ntuas lawv yuav tsum ceev txuag lawv tus kheej kom dawbhuv. Qhov uas ua saib tsis taus thaum mus cuag tus Tswv yuav ua rau lawv raug txim tuag (Khiavdim 19:21-25; 28:35). Cov povthawj thiab tus Tswv haivneeg yuav tsum xyuamxim thiab ceevfaj ua txhua tes haujlwm hauv lub Tsevntaub vim lawv tabtom mus cuag Vajtswv tus uas Dawbhuv kawg nkaus.

Thaum Tswv Yexus tsis tau los hauv ntiajteb, Nws txib Yauhas tus uas muab neeg ua kevcai raus dej los kho kev, nqua hu sawvdaws tso kev txhaum tseg, npaj lub siab txais yuav Tus Cawmseej. Niaj hnub nimno, peb cov ntseeg tau txais yuav Cawmseej Yexus ua peb tus Tswv kav peb lubneej lawm, peb tau tus Tswv zam lub txim thiab tau tsa los ua Vajtswv cov povthawj, “…Yexus Khetos tus uas hlub peb thiab tuag theej peb lub txhoj, thiab nws pab peb kom peb dim peb tej kev txhaum, thiab nws tsa peb ua povthawj ua Vajtswv tus uas yog Yexus Khetos Leej Txiv tes haujlwm tau koob meej. Thov kom Yexus Khetos tau lub tshwjchim uas ci ntsa iab thiab lub hwjchim mus ibtxhis li! Amees.” (Tshwmsim 1:5-6). Yog li ntawd peb tau pub cai los nyob ze tus Tswv hauv peb kev sib txuas lus nrog Nws txhua hnub, xws li thaum: Pehawm, thov Vajtswv, thov pab lwm tus, kawm Vajtswv Txojlus thiab thaum koom Yexus Rooj Mov lossis thaum tshajtawm tus Tswv Txojmoo Zoo rau lwm tus. Tus Tswv tus yamntxwv uas dawbhuv kawg nkaus taij kom peb yuav tsum hwm tus Tswv kawg nkaus. Peb tsis ntxuav tes ntxuav taw zoo li thaum ub lawm tiamsis peb yuav tsum thov lees kev txhaum thiaj tau tus Tswv zamtxim, thiaj tsimnyog mus nyob ze tus Tswv uas Dawbhuv kawg nkaus (I Yauhas 1:9).

Peb ntxuav tus kheej kom “huv” thiab npaj licas thaum sawv tabmeeg tus Tswv uas Dawbhuv?

 

Thov Vajtswv

Vajtswv tus uas dawbhuv kawg nkaus, thov Koj zam txim rau nyuam yaus tej kev txhaum txhua hnub uas nyuam yaus tau ua. Thov pab nyuam yaus txawj txav deb tej yam phem qias, ua neej ncajncees tabmeeg Koj, kom nyuam yaus muaj cuabkav los cuag Koj txhua hnub nyob hauv kev sib raug zoo thiab ua tes haujlwm povthawj tabmeej Koj. Amees.

Nyeem Vajluskub peb lub xyoos: Ntawv Nkauj 49

Tshooj Youtube BHKTHN: https://www.youtube.com/c/bhkthn

Bài trướcThư Phân Ưu Cùng Tang Quyến Cụ Bà Bùi Diêm
Bài tiếp theoThŭng Êa Pioh Rao Hŏng Kông – 31/5/2022