Ntawv Nkauj 1:1-2
Nqe cim:
“Cov neeg uas tau koob hmoov yog cov uas tsis ua raws li cov neeg siab phem tej lus haub ntxias, thiab tsis xyaum ua raws li cov neeg txhaum ua lossis tsis nrog cov neeg uas tsis hwm Vajtswv koom ua ib lub siab.” (Ntawv Nkauj 1:1).
Lus nug sawvdaws xav:
- Raws li hauv Ntawv Nkauj tshooj ib, tus neeg tau koob hmoov yog tus zoo li cas?
- Peb yuav ua li cas thiaj yog ib tug tau txais koob hmoov tsis tseg?
- Peb tab tom ntshaw kom yus tau koob hmoov dab tsi hauv lub xyoo tshiab no?
Peb tibneeg feem ntau yeej ntshaw tau “Koob hmoov” thiab kuj xav kom lwm tus foom “Koob hmoov” rau yus, tshwjxeeb yog hauv lub xyoo tshiab. Peb cov neeg nyob lub tebchaws Viet Nam no kev xav txog koob hmoov ces yog: kev nplua nuj, tau zoo nyob noj, muaj zog thiab muaj sia ua neej ntev…tiamsis hauv Ntawv Nkauj tshooj ib hais tias, Cov neeg uas tau koob hmoov yog cov uas tsis ua raws li cov neeg siab phem tej lus haub ntxias, thiab tsis xyaum ua raws li cov neeg txhaum ua lossis tsis nrog cov neeg uas tsis hwm Vajtswv koom ua ib lub siab. Qhov ntawd hais tau hais tias, tus tau koob hmoov yog tus tsis ua raws cov neeg phem thiab kev txhaum haub ntxias, tsis keeb lossis tsis muaj nplooj siab koom nrog cov neeg ua txhaum thiab cov neeg hais lus saib tsis taus Vajtswv ua ib nqag. Lub ntsiab ntawm lo lus “Koob hmoov” hauv nqe 1 yog hais txog lub neej uas tau txais Vajtswv koob hmoov. Yog li ntawd, tus sau xav qhia peb hais tias, lub neej uas ntsib tus Tswv thiab muaj kev pauv hloov lawm yog lub neej uas tau koob hmoov tseeb tiag.
Tus sau tshooj nkauj no taw qhia peb txog kev ceev lub neej tau txais koob hmoov kom pheej muaj nyob tsis tu ncua mus li. Nws sau hais tias, “Tiamsis cov uas tau kev kaj siab yog cov uas hwm tus TSWV txoj Kevcai thiab kawm txoj kevcai ntawd nruab hnub hmo ntuj.”(nqe 2). Muaj dua lwm phau sau hais tias: “Qhov uas ua rau nws zoo siab yog Yawmsaub txoj kevcai, nws tshawb nrhiav Yawmsaub txoj kevcai nruab hnub hmo ntuj” (nqe 2). “Zoo siab” lossis “kaj siab” yog muaj lub siab xav thiab ntshaw plias rau Vajtswv Txojlus, “kawm” lossis “tshawb nrhiav” yog taug xyuas, tag xyaum ua raws qab lossis nyeem thiab kawm xyaum Vajtswv Txojlus tsis tseg. Ntawd yog tus neeg uas ua lub neej ntawm kev ntseeg ntsigtxog Vajtswv Txojlus. Yog li ntawd, kom yuav ceev tau lub neej txais koob hmoov tsis tseg, ces yuav tau qaij deb kev txhaum, txuas nrog tus Tswv thiab kawm xyaum Vajtswv Txojlus nruab hnub hmo ntuj.
Ntxee mus rau lub xyoo tshiab, peb ntshaw yam dab tsi ntawm tus Tswv? Tej zaum lub xyoo tas los peb ntsib ntau yam teebmeem nyuaj siab, poob yam ub yam no lossis tsis muaj txaus kev noj haus…Tej zaum peb xav hais tias yus yog tus uas tsis tau Vajtswv foom koob hmoov, lub xyoo tshiab no xav kom tus Tswv pom txog yus ntau dua thiab foom koob hmoov rau yus ntau dua. Tiamsis, ua zoo tig mus saib lub xyoo dhau tas los, yog yus: “…tsis ua raws li cov neeg siab phem tej lus haub ntxias, thiab tsis xyaum ua raws li cov neeg txhaum ua lossis tsis nrog cov neeg uas tsis hwm Vajtswv koom ua ib lub siab” ces txhais tau hais tias yus yog tus ruaj siab rau tus Tswv, sawv ruaj khov ntawm txoj kev ntseeg txawm yuav ntsib teebmeem los xij, thiab muaj kev sib txuas zoo nrog tus Tswv ces cia siab hais tias yus tab tom nyob hauv tus Tswv txoj koob hmoov. Peb cia li zoo siab rau Vajtswv Txojlus, ua lub neej fwm Vajtswv kom tau txais Vajtswv koob hmoov ntau ntxiv. Yuav tsum paub meej hais tias, tau ntsib tus Tswv, ntseeg tus Tswv thiab tseem ua lub neej nrog tus Tswv sib raug zoo yog yam koob hmoov zoo ua tus Tswv muab pub rau peb.
Peb puas paub nco tus Tswv txiajntsig vim tseem tau nyob hauv Nws txoj koob hmoov uas zoo?
Thov Vajtswv,
Tus Tswv, nyuam yaus ua koj tsaug vim thaum nyuam yaus tseem nyob hauv txoj kev ntseeg ntawm Koj yog nyuam yaus tseem nyob hauv Koj txoj koob hmoov uas zoo. Thov Koj pab nyuam yaus paub meej txog qhov kom nyuam yaus ua lub neej zoo siab thiab txaus siab txhua hnub. Amees.
T Nyeem Vajluskub hauv peb lub xyoo: II.Xwmtxheej Vajntxwv 6:32-7:11
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
