Klei Aê Diê Blŭ: Klei Mmuñ Hđăp 1:1-2
Êlan kliăng: “Jăk mơak yơh mnuih amâo êbat ôh tui si klei phung ƀai kčĕ, kăn dôk rei hlăm êlan phung soh, kăn dôk gŭ rei mbĭt hŏng phung mưč” (Klei Mmuñ Hđăp 1:1).
Klei êmuh ksiêm mĭn: Tui si pô čih hră Klei Mmuñ Hđăp mrô sa, si mnuih mâo klei jăk mơak jing? Si drei ngă čiăng dưi êbat nanao hlăm klei jăk mơak? Si klei drei dôk čang hmăng dưi mâo klei jăk mơak hlăm thŭn mrâo?
Phung Việt Nam drei khăng čang hmăng dưi mâo “Klei Jăk Mơak” leh anăn čiăng mơh arăng hmưi kơ drei mâo “Klei Jăk Mơak”, boh nik nak hlăm dŭm hruê kŏ thŭn mrâo. Klei Jăk Mơak tui si klei mĭn phung Việt Nam drei jing klei mdrŏng sah, đĭ kyar, jing suaih pral asei mlei leh anăn dôk hdĭp sui thŭn, ƀiădah bi hŏng pô čih Klei Mmuñ Hđăp mrô sa, mnuih mâo Aê Diê brei klei jăk mơak jing mnuih amâo êbat ôh tui si klei phung ƀai kčĕ mbĭt hŏng klei mtrŭt mơ̆ng klei soh, jing mnuih amâo dôk dơ̆ng hlăm êlan klei soh ôh, amâo êbat mbĭt hlăm êlan hŏng phung soh ôh, leh anăn kăn dôk gŭ mbĭt amâodah ư ai mbĭt hŏng phung mâo klei blŭ amâo huĭ mpŭ, mưč kơ Aê Diê. Klei mblang boh blŭ “jăk mơak” hlăm êlan 1 jing klei hdĭp mâo Aê Diê brei klei jăk mơak. Snăn, pô čih brei kơ drei thâo knŏng sa klei hdĭp bi tuôm hŏng Khua Yang leh anăn mâo leh klei bi mlih jing sa klei hdĭp mâo klei jăk mơak sĭt.
Pô čih ăt đru kơ drei thâo dŭm hdră êlan čiăng dưi djă pioh nanao klei jăk mơak hlăm klei hdĭp drei. Ñu čih “Ƀiădah ñu mơak hlăm klei bhiăn Yêhôwa, leh anăn ñu dôk mĭn kơ klei bhiăn anăn hruê mlam” (êlan 2). “Mơak” jing khăp čiăng, hơ̆k kdơ̆k, jing ai tiê bi êdah klei khăp kơ Klei Aê Diê Blŭ, “dôk mĭn” jing răk wĭt răk nao, čiăng lač mđruĕ mđrông nanao hlăm klei dlăng leh anăn hriăm Klei Aê Diê Blŭ. Anăn yơh jing mnuih dôk hdĭp hŏng klei đăo kơ Khua Yang. Kyuanăn, drei knŏng dưi êbat nanao hlăm klei jăk mơak tơdah drei weh đuĕ kbưi mơ̆ng klei soh leh anăn djă păn kjăp kơ Khua Yang leh anăn Klei Ñu Blŭ hruê mlam.
Čhuang mŭt hlăm thŭn mrâo hlue si mlan ƀlĕ, ya klei drei hmăng hmưi sĭt mơ̆ng Khua Yang? Năng ai sa thŭn găn êgao drei tlă anăp hŏng lu klei huĭ hyưt, luč liê, klei kƀah… Tăp năng drei mĭndah drei jing mnuih Aê Diê ka brei klei jăk mơak, leh anăn thŭn mrâo anei drei hmăng hmưi dưi mâo klei Aê Diê mđing uêñ hĭn, hơêč hmưi lu hĭn. Ƀiădah, tơdah lŏ dlăng wĭt kơ sa thŭn êgao leh, tơdah drei ăt “…amâo êbat ôh tui si klei phung ƀai kčĕ, kăn dôk rei hlăm êlan phung soh, kăn dôk gŭ rei mbĭt hŏng phung mưč”, čiăng lač ăt dôk hdĭp sĭt suôr hŏng Khua Yang, kjăp phĭt hlăm klei đăo wăt tơdah tlă anăp hŏng lu klei dleh dlan, leh anăn ăt dôk hlăm klei bi mguôp sĭt suôr hŏng Khua Yang, snăn brei drei đăo sĭt nik drei jing phung dôk leh, hlăk hlê dôk hlăm klei jăk mơak Khua Yang. Brei drei ăt hơ̆k mơak čhuang êbat hlăm klei khăp kơ Klei Aê Diê Blŭ leh anăn dôk hdĭp huĭ mpŭ kơ Ñu čiăng bi knal nanao klei jăk mơak hlăm Khua Yang lu êbeh hĭn êjai. Brei thâo snei, dưi bi tuôm hŏng Khua Yang, đăo kơ Khua Yang leh anăn ăt dôk êbat tui hlue Ñu êjai ară anei hin jing sa klei jăk mơak prŏng Khua Yang brei.
Si ngă drei hdơr knga bi mni kơ Aê Diê mơ̆ êjai dôk hlăm klei jăk mơak Ñu brei?
Wah lač: Ơ Khua Yang, kâo bi mni kơ Ih kyuadah êjai kâo dôk hlăm klei đăo kơ Ih jing kâo hlăk dôk hlăm klei jăk mơak Ih, akâo kơ Khua Yang đru kâo thâo săng klei anei nanao čiăng kơ kâo dôk hdĭp hơ̆k mơak leh anăn hrăp ai tiê grăp hruê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 6:32 – 7:11
Kênh Youtube BHKTHN:
