Ntawv Nkauj 1:1-3
Nqe cim:
“Lawv zoo ib yam li tej ntoo uas cog ze rau ntawm ntug dej uas txi txiv raws caij raws nyoog tej nplooj los tsis qhuav li. Thiab txhua yam uas lawv ua puavleej tiav” (Ntawv Nkauj 1:3).
Lus nug rau sawvdaws xav:
- Peb kheev xav li cas txog lub neej nplua mias?
- Ntawv Nkauj tshooj ib qhia peb pom txog lub neej nplua mias ntawm tus Tswv yog li cas?
- Los ntawm dab tsi peb thiaj ruaj siab rau tus Tswv hauv lub xyoo tshiab?
Ua ib tug tibneeg, feem ntau sawvdaws yeej xav hais tias lub neej “nplua mias” ces yog thaum yus nyob rau lub tsamthawj uas muaj kev vam meej, muaj txaus txhua yam: Hais txog dag zog ces yog ncua caij nyoog uas yus muaj zog khov kho; hais txog koob npe ces yog ncua caij nyoog ntawm ib tug neeg lub neej uas nce qib, muaj txiag nplua nuj. Tibneeg pheej xav kom ceev tau lub neej “muaj txiag nplua nuj tshaj plaws” yim ntev yim zoo. Hauv ntu Vajluskub no, tus sau Ntawv Nkauj tshooj ib tau ua rau peb pom txog tus neeg muaj nplua mias tseeb taig hauv tus Tswv yog tus muaj lub neej qhia tshwm txog qhov uas qaij deb kev txhaum, txuas nrog tus Tswv thiab ua raws li Vajtswv Txojlus txhua hnub (nqe 1-2). Tus neeg ntawd muaj lub neej zoo li txooj ntoo nyob ntawm ntus dej, tej nplooj hlav ntsuab xiab loj hlob raws caij nyoog, tawg paj txi txiv raws cai nyoog thiab tsis ntsws tsis qhuav ib zaug li. Lo lus “ua tiav” lossis muaj lwm phau hais tias “vam meej” txais hais tias tau txais koom hmoov, tau yam ruaj khov, lossis hais tias, txhua yam uas tus neeg ntawd ua puavleej tau Vajtswv foom koob hmoov. Kev vam meej hauv tus Tswv yog los ntawm tus Tswv ua tab pov rau thiab nyob hauv tus Tswv kev pov puag.
Qhov uas tej nplooj hlav ntsuab xiab thiab txi txiv raws caij nyoog ua rau peb pom hais tias, tus neeg uas muaj lub neej nplua mias hauv tus Tswv yuav qhia tshwm rau tej neeg ib ncig txog tej yam uas lawv muaj lub neej nplua mias. Thiab peb yuav tsum paub hais tias, tus sau Ntawv Nkauj tshooj ib tsis yog hais hnyav txog tibneeg lub cev ntaj ntsug, vim tibneeg lub cev yuav ntsib kev laus, ib xyoos dhau yus lub zog ntaug lawm ntau. Tiamsis tus sau xav hais txog lub neej sab ntsujplig yuav tau txais yam nplua mias ib yam li uas timthawj Paulus hais hauv II-Kauleethaus 4:16 hais tias: “Twb yog vim li ntawd peb thiaj tsis poob siab. Txawm peb lub cev yuav tsaug zuj zus los peb lub siab tseem muaj zog ntxiv”. Yim ntseeg tus Tswv ntev xyoo, yim kawm Vajtswv Txojlus, peb yim tau saj lub dag zog tshiab uas tus Tswv pub thiab yim ua tau haujlwm ntau muaj qab hau rau tus Tswv lub tsev.
Tig saib lub xyoo dhau los, peb puas tseem sawv khov kho hauv kev ntseeg, ua tau haujlwm muaj nqis ntau dua qub, sab kev ntseeg puas loj dua qub lawm tau? Thov tus Tswv pab kom xyoo tshiab peb kheev hlob ntawm sab kev ntseeg, muaj lus siab khov kho mus ua Vajtswv haujlwm thiab teev tiam Nws, ua neej rau lwm tus pom tus Tswv los ntawm peb. Yeej yuav muaj kev khwv tuaj tab kaum peb, ua rau peb tsis muaj zog nrog tus Tswv mus, tiamsis cia li ruaj siab rau qhov Vajtswv yog tus uas ua tab pov rau peb thiab yog tus Tswv uas pov puag peb, Nws yuav foom hmoov rau peb.
Peb lub neej puas khov kho dua qub, ua haujlwm muaj qab hau dua qub thiab sab ntsujplig puas kheev hlob dua qub, hauv tej niaj xyoo uas ntseeg tus Tswv?
Thov Vajtswv,
Tus Tswv, nyuam yaus ua Koj tsaug, txawm nyuam yaus lub cev yuav laus mus raws niaj xyoo tiamsis thaum nyuam yaus pheej nyob hauv Koj, nyuam yaus yim pom lub neej nplua mias ntawm sab ntsujplig, yim loj hlob hauv sab ntsujplig kom ua lub neej muaj qab hau rau Koj. Amees.
T Nyeem Vajluskub hauv peb lub xyoo: II.Xwmtxheej Vajntxwv 7:12-8:18
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
