Klei Aê Diê Blŭ: Klei Mmuñ Hđăp 1:1-3
Êlan kliăng: “Ñu jing msĕ si sa ƀĕ ana kyâo pla giăm êa hnoh, mboh tơdah truh yan gơ̆; wăt hla ñu amâo thâo krô ôh, leh anăn jih klei ñu ngă srăng jing” (Klei Mmuñ Hđăp 1:3).
Klei êmuh ksiêm mĭn: Si phung Việt Nam drei bi mĭn kơ klei hdĭp êbeh dlai? Klei Mmuñ Hđăp mrô sa brei drei ƀuh si ngă klei hdĭp êbeh dlai tơdah dôk hlăm Khua Yang? Mơ̆ng ya klei drei dưi tui hlue Khua Yang hŏng ai tiê kjăp mŭt hlăm thŭn mrâo?
Phung Việt Nam drei bi mĭn “êbeh dlai” jing hlăk êjai dôk hlăm klei đĭ kyar bŏ ênŭm hĭn: Hlăm klei suaih asei mlei, boh blŭ anei čiăng lač kơ gưl thŭn mâo klei suaih ktang hĭn hlăm klei hdĭp sa čô mnuih; hlăm klei hing ang, bruă mă boh blŭ anei čiăng lač kơ gưl thŭn mâo klei đĭ kyar mdrŏng sah hĭn hlăm klei hdĭp sa čô mnuih. Anak mnuih hmăng hmưi nanao čiăng dưi djă krơ̆ng klei jing “mdrŏng sah prŏng prĭn hĭn” ktang sui ktang jăk. Tinei, pô čih Klei Mmuñ Hđăp mrô sa hưn mdah kơ drei ƀuh mnuih mâo klei hdĭp êbeh dlai sĭt hlăm Khua Yang jing pô mă tŭ boh bhiăn mâo mơ̆ng klei hdĭp ñĕ đuĕ kbưi mơ̆ng klei soh yơh, mâo klei bi mguôp sĭt suôr hŏng Khua Yang leh anăn hŏng Klei Blŭ Ñu hruê leh anăn mlam (êlan 1-2). Klei hdĭp pô anăn mtah mda leh anăn mboh lu nanao msĕ si kyâo pla giăm êa hnoh, đĭ hriê kơ prŏng hlue si thŭn mlan, bi mnga leh anăn mâo boh djŏ yan, leh anăn amâo tuôm dliu krô amâodah êwiêt êbah ôh. Boh blŭ “jing” mblang jing mâo klei hơêč hmưi, kjăp mră, amâodah blŭ mdê ƀiă, jih jang bruă ngă mâo klei Aê Diê hơêč hmưi sơăi. Klei mdrŏng đĭ kyar hlăm Khua Yang hriê mơ̆ng klei Khua Yang rơ̆ng leh anăn răng mgang.
Rup ana kyâo mtah mda mboh lu brei drei thâo kral kơ mnuih mâo klei hdĭp êbeh dlai sĭt hlăm Khua Yang ăt bi êdah msĕ snăn mơh, leh anăn jih jang phung riêng gah, ênưih snăk thâo kral klei bi knăl êbeh dlai hlăm pô anăn. Leh anăn drei ăt ƀuh mơh, pô čih Klei Mmuñ Hđăp mrô sa amâo kñăm knŏng kơ klei hdĭp kđeh ôh kyuadah klei bhiăn jih jang anak mnuih srăng hriê kơ mduôn sơăi, grăp thŭn êgao asei mlei kđeh drei ƀrư̆ awăt hĭn. Ƀiădah tĭng kơ klei hdĭp myang drei dưi bi knal kơ klei hdĭp êbeh dlai hĭn nanao msĕ si khua ƀĭng kna Y‑Pôl čih leh hlăm II Kôrantô 4:16 “Kyuanăn hmei amâo êdu ai ôh. Wăt tơdah asei mlei hmei dôk rai ƀrư̆ ƀrư̆, knuih hlăm lam hmei arăng lŏ bi mrâo grăp hruê.” Ktang tui hlue Khua Yang sui thŭn, ktang ksiêm mĭn Klei Aê Diê Blŭ hruê mlam, drei ktang hĭn mơh bi knal ai ktang mrâo Aê Diê brei, leh anăn mâo boh lu hĭn kơ bruă Sang Aê Diê.
Lŏ dlăng wĭt kơ sa thŭn êgao, si ngă drei ktang hĭn mơ̆, mâo boh tŭ dưn hĭn mơ̆, hriê kơ prŏng hĭn mơ̆ hlăm klei hdĭp klei đăo drei? Akâo kơ Aê Diê brei kơ drei hlăm thŭn mrâo kdlưn hĭn nanao hlăm klei đăo, ktang kjăp êbat hlăm klei mă bruă kơ Aê Diê, čiăng kơ phung riêng gah ƀuh Khua Yang mơ̆ng klei hdĭp drei. Adôk yơh ti anăp klei dleh dlan, klei bi kgăn ngă kơ drei amâo dưi ktang kjăp čiăng êbat tui hlue Khua Yang, ƀiădah bi kjăp bĕ ai tiê kyuadah Khua Yang yơh jing Pô rơ̆ng leh anăn răng mgang drei srăng hơêč hmưi kơ drei.
Si ngă klei hdĭp drei mâo klei ktang hĭn, mâo boh tŭ dưn hĭn leh anăn đĭ hriê kơ prŏng hĭn mơ̆ gao leh lu thŭn mlan tui hluê Khua Yang?
Wah lač: Ơ Khua Yang, bi mni lač jăk kơ Ih wăt tơdah asei mlei kđeh kâo nao kơ klei rai ƀrư̆ ƀrư̆ hlue si thŭn mlan, ƀiădah tơdah ăt dôk nanao hlăm Khua Yang, kâo bi knal hĭn êjai klei hdĭp êbeh dlai, đĭ hriê kơ prŏng hlăm klei hdĭp myang čiăng kơ klei hdĭp kâo mâo boh tŭ dưn kơ Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 7:12 – 8:18
Kênh Youtube BHKTHN:
