II Pêtrôs 1:1-2
“Inh Simôn Pêtrôs, bơngai đĭch đam Yêsu Krist, kư̆m pơm jơ̆ng ‘bang Sư mơ̆n. Inh chih hơpong kơ lu bơngai mă ‘Bok Kei-Dei hăm ‘Bok Dŏng Pơklaih bơ̆n Yêsu Krist krao lui kơ Sư thoi nhôn, yua kơ Sư pơm tơpăt kơ đĭ đăng.” (II Pêtrôs 1:1)
Nơ̆r jet tơchĕng pơwao:
– ‘Bok Pêtrôs pơma tơpă tơdrong kiơ lăm nơ̆r blŭng a lăm kơthơ II Pêtrôs âu?
– Sư krao khan kơ lu bơngai kư̆m hơdai đon lui lei lăi gĭt găl gô đei thim tơdrong kiơ? Yua kơ kiơ?
– Ih pơtrŭt ‘nhŏng mŏ oh minh đon lui đơ̆ng tơdrong krao khan thoi yơ?
‘Bok Pêtrôs chih kơthơ I Pêtrôs wă pơtrŭt kon pơlei Kră Yang oei chu iŏk pơmat kơplah pơtao Nêrô pơm kơnê̆ kơ Khul Bơngai Lui, păng sư chih kơthơ mă ‘bar âu lăm sơnăm đe hil areh, pơm kơnê̆ kang rai dêh. Sư ưh kơ pơma kơ tơdrong chu iŏk pơmat mă sư pơma gah tơdrong wei kơjăp đon lui kơplah đei tơdrong truh păng lu bơngai bơtho hơlĕnh năm blah. Yua kơ thoi noh, đơ̆ng tơm blŭng a sư đei chih “… inh chih hơpong kơ lu bơngai mă ‘Bok Kei-Dei hăm Yêsu Krist ‘Bok Dŏng Pơklaìh krao lui kơ Sư thoi nhôn, yua kơ Sư pơm tơpăt kơ đĭ đăng” (trong 11). Lu bơngai iŏk kơthơ ‘noh lu bơngai lui kư̆m sơng iŏk minh đon lui gĭt găl mă Kră Yang ăn thoi Sư ăn kơ ‘bok Pêtrôs mơ̆n, jơ̆ đon băt kơnăl kơ Kră Yang Yêsu jơ̆ Kră Yang ‘Bok Kei-Dei păng ‘Bok Dŏng Pơklaih. Tơdrong noh pơtrŭt lu sư thim đei jơhngơ̆m ‘mêm kơ Kră Yang kơplah đei tơdrong pơm kơnê̆, yua kơ đei lơ bơngai oei ‘blŏk păng krao khan tơgŭm lu sư. Kư̆m đei tơ’blŏk khan Kră Yang đei ăn đon lui kơ lu sư, gơh jô̆ ‘lơ̆ng tơpăt, gơh pơsĭt tơdrong dŏng pơklaih yua kơ đơ̆ng pham Kră Yang Yêsu Krist.
‘Bok Pêtrôs krao khan kơ lu bơngai lui đei tơdrong đe pơm kơnê̆ “Inh apinh ‘Bok Kei-Dei wei lăng iĕm hiôk hian wă kơ iĕm lui kơjăp, yua kơ iĕm băt kơnăl kơ Sư hăm băt kơnăl kơ Kră Yang bơ̆n Yêsu Krist” (trong 2). Bơngai lui lăp sơng iŏk tơdrong ăn ‘bĕnh blai tơdrong mơnat păng tơdrong hiôk hian “yua kơ băt kơnăl” kơ Kră Yang. Bơngai jơ̆ng ‘bang đei chih minh tơdrong sĭt tơpă gĭt kăl băt kơnăl kơ Kră Yang ưh kơ khan hlôh kiơ̆ kon bơngai noh yua đơ̆ng tơ’bưh kơjăp hăm Kră Yang kơplah bơ̆n pơnam kơ hŏk pơhrăm nơ̆r Kră Yang păng tơ’bưh hăm Sư. Kang rai oei jê̆ Kră Yang, tơdrong mơnat ăn păng hiôk hian đơ̆ng Kră Yang rai tuh ăn ‘bĕnh blai kơ lu bơ̆n.
Nơ̆r ‘bok Pêtrôs krao khan đei tơ’blŏk kơ lu bơ̆n minh tơdrong, phŏ bơ̆n đĭ jơhngơ̆m pơkă inh gô ‘blŏk kơ lu iĕm lăm tơdrong krao khan, mălei lăp brŏk tơhnam, bơ̆n ngăl hiơt kơ krao khan tơgŭm kơ lu ‘nhong oh bơ̆n. Yua kơ thoi noh, nơ̆r Kră Yang tơ’blŏk kơ lu bơ̆n ‘blŏk kơ ‘nhŏng oh lu bơ̆n minh jơhngơ̆m đon lui wă kơ krao khan tơgŭm dih băl. Tơm tơdrong pơtrŭt, ‘blŏk tơtăm, wă kơ krao khan tơgŭm gô đei tơdrong pơtrŭt păng đei jơhngơ̆m đơ̆ng Kră Yang wă kơ ‘nhŏng oh bơngai lui lăm Kră Yang huay kơ chơchă tơgŭm đơ̆ng lăm teh đak, na “gơnang kơ tơdrong ‘lơ̆ng tơpăt đơ̆ng Kră Yang ‘Bok Kei-Dei lu bơ̆n đơ̆ng ‘Bok Dŏng Pơklaih ‘noh jơ̆ Kră Yang Yêsu Krist” (trong 1).
Ơ Kră Yang, inh bơnê kơ Ih yua kơ Ih jơ̆ ‘Bok dŏng pơklaih inh ling lang mơnat kơ lu bơngai krao chă Ih. Apinh Ih thim ăn kơ inh tơdrong ‘mêm mơnat, tơdrong hiơ̆k tơtăm, păng krao khan kơ lu ‘nhŏng oh minh đon lui. Apinhh Ih ăn kơ lu nhôn tơ’bưh kơjăp hăm Ih, gơnang kơ Ih, wă kơ đei tơdrong mơnat păng tơdrong hiôk hian ‘bĕnh blai đơ̆ng Ih ăn, krao khan yua anăn Kră Yang Yêsu Krist, Amen.
Lu bơ̆n hăm ling lang krao khan tơgŭm kơ lu ‘nhŏng oh minh jơhngơ̆m đon lui ưh?
Đŏk Sơ̆p hla bơar ‘Bok Kei-Dei lăm pêng sơnăm: Markôs 9
Kênh Youtube BHKTHN:
