Klei Aê Diê Blŭ: I Kôrantô 7:12-16
Êlan kliăng: “Kyuadah ung amâo đăo anăn jing doh jăk kyua mô̆ ñu, leh anăn mô̆ amâo đăo jing doh jăk kyua ung ñu” (I Kôrantô 7:14a)
Klei Êmuh ksiêm mĭn: Si Khua ƀĭng kna Y-Pôl mtă kơ mnuih mâo mô̆ amâodah ung ka đăo kơ Khua Yang? Ya dua klei ñu lač kơ bruă lŏ hdơ̆ng hdĭp mbĭt? Ya klei brei drei ngă čiăng kơ ung mô̆ pô bi êdah klei khăp Aê Diê?
Phung Sang Aê Diê Kôrantô hruê êlâo ăt msĕ si hruê anei mâo nanao mnuih đăo kơ Aê Diê leh mkŏ mjing gŏ sang, hlăk êjai mô̆ amâodah ung diñu ka tŭ ư đăo kơ Aê Diê, kyua anăn Khua ƀĭng kna Y-Pôl mâo klei ktrâo lač kơ phung anei, amâo djŏ brei kơ phung đăo leh dơ̆ng mŭt hlăm klei bi dôk ung mô̆ hŏng phung ka đăo ôh.
Khua ƀĭng kna Y-Pôl lač tơdah phung đăo mâo mô̆ amâodah ung amâo đăo kơ Aê Diê, snăn bruă lŏ dơ̆ng hdĭp hŏng ung/mô̆ anăn amâodah hơăi jing klei bi mklă tĭng kơ ung amâodah mô̆ amâo đăo. Tơdah pô anăn tŭ ư hdĭp hŏng pô, “đăm brei ñu lui gơ̆ ôh” (êlan 12-13). Bi tơdah pô anăn čiăng bi ktlah, snăn “brei bi ktlah”, pô đăo kơ Aê Diê amâo mâo ya klei đuôm ôh (êlan 15). Tơdah čih dŭm klei anei, Khua ƀĭng kna Y-Pôl răng mphŭn kčưm hŏng êlan “amâo djŏ ôh Khua Yang lač, ƀiădah kâo lač”, brei ƀuh anei jing klei mtô ba yua hlăm boh klei sĭt Phung Sang Aê Diê dôk tuôm. Mâo phung amâo đăo kơ Aê Diê ôh ăt kăn čiăng bi lui ƀiădah diñu ngă kơ klei hdĭp ung/mô̆ mrâo đăo kơ Aê Diê knap mñai hŏng bruă yua klei čăm biêng, boh blŭ amâodah čăm amâo hơiêng hơưi ôh, kjham hĭn lŏ tlĕ piu hưn mdah. Aê Diê bi êmut kơ klei bi lui ung mô̆ leh anăn Ñu ăt bi êmut kơ klei bi čăm biêng hlăm gŏ sang amâo mdê ôh hŏng klei bi lui ung mô̆ (Y-Malaki 2:16).
Dua mta phŭn mâo Khua ƀĭng kna Y-Pôl hưn mdah kơ bruă lŏ dơ̆ng hdĭp mbĭt. Tal sa, anăn jing “ung amâo đăo anăn jing doh jăk kyua mô̆ ñu, leh anăn mô̆ amâo đăo jing doh jăk kyua ung ñu” (êlan 14a), jing năng ai ung/mô̆ srăng đăo kơ Aê Diê mơ̆ng bruă dlăng klei hdĭp bi mlih leh anăn klei blŭ mơ̆ng ung/mô̆ đăo leh. Leh anăn klei yuôm bhăn jing anak čô diñu ăt srăng thâo kral Aê Diê (êlan 14b). Êlan 16 ăt thiăm kơ klei anei, ƀiădah bruă lŏ mñă wĭt boh hră “thâodah” dua blư̆, brei ƀuh anei amâo djŏ jing sa klei ƀuăn ôh. Khădah snăn, mâo leh lu ung/mô̆ đăo kơ Aê Diê mơ̆ng knuih hdĭp mlih mrâo mơ̆ng ung/mô̆ mrâo đăo kơ Aê Diê. Mta phŭn tal dua kơ bruă mnuih ka đăo bi mklă lŏ dơ̆ng hdĭp mbĭt amâodah amâo djŏ tuôm kơ klei Aê Diê iêô mthưr kơ mnuih ka đăo kơ Aê Diê: “Kyuadah Aê Diê iêu leh drei kơ klei êđăp ênang” (êlan 15). Klei êđăp ênang kơ drei, leh anăn klei êđăp ênang, jăk mơak kơ ung/mô̆ ka đăo kơ Aê Diê mơ̆ng phung drei msĕ mơh. Wăt tơdah si klei ung mô̆ drei dôk găn dưn, klei yuôm bhăn jing brei jih ai tiê wah lač akâo kơ Khua Yang atăt êlan, mtrang mngač čiăng kơ klei hdĭp gŏ sang pô bi êdah nanao klei khăp Aê Diê.
Drei dưm Klei Aê Diê Blŭ jing tur tơdah bi mklă ya klei hlăm klei jing ung mô̆ pô mơ̆?
Wah lač: Ơ Khua Yang, kâo hdơr knga kơ Khua Yang kyua Ih mđing kơ phung mâo ung/mô̆ ka đăo leh anăn mâo dŭm klei ktrâo lač klă klơ̆ng. Akâo kơ Aê Diê kiă kriê klei jing ung mô̆ kâo čiăng kơ gŏ sang kâo êbat hlăm klei Ih ktrâo atăt. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sôphôni 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
