Bơtho Khôi Juăt 32:34-43
“Ơ lu adrĕch adrung kon bơngai! Hiôk chơt bĕ hăm kon pơlei Kră Yang. Yua kơ Sư gô iung kơting, pơm ‘mong pham kơ đĭch đam Sư, Sư pơm ‘mong blah lu bơngai ayăt kơ Sư, mơnat ăn kơ dêh char Sư păng lu kon pơlei pơla Sư.” (Bơtho Khôi Juăt 32:43)
Nơ̆r jet tơchĕng pơwao:
– Kră Yang ‘Bok Kei-Dei pơm kiơ kơplah kon pơlei sư ưh pă đei jơhngơ̆m pran?
– Tơdrong ‘nâu tơ’bôh kiơ gah tơdrong ‘mêm Kră Yang hăm kon pơlei Sư?
– Bơ̆n kăl kơ pơm kiơ dah pơm yoch hăm Kră Yang?
Pơđĭ lu tơdrong hơri đơ̆ng Môis pơm tơ’bôh tơdrong ‘Bok Kei-Dei hil mĭl dêh kơ tơdrong yoch mă lu kon pơlei Isơrael đei pơm. Tơchĕng nơ̆r pơtôch tơdrong hơri ‘nâu bơih tơdrong pơrăm lu kon pơlei Kră Yang pơtŏ. Hăm tơdrong lu kon pơlei Kră Yang pơm hăm ‘Bok Kei-Dei, lu sư trŏ kơ iŏk tơdrong pơmat thoi noh. Mălei, tơdrong hlĭch hlăch dêh noh ‘Bok Kei-Dei wei lăng lu kon pơlei Isơrael ding truh tuch luch lăm tơdrong tơblah. Pơm pơrăm bơngai nai, lu bơngai tơmoi pơm kơnê̆.
Đơ̆ng jơ năr kon pơlei achăng Kră Yang wă kơkuh lu yang bơngai mă ưh kơ lui, Kră Yang băt hơđăl kon pơlei Kră Yang gô huŏng lăm tơdrong răm. Yua kơ đơ̆ng lu yang mă lu sư kơkuh, ưh kơ đei dŏng tơgŭm lu sư kơplah tơblah hăm bơngai ayăt. Mă khan ‘Bok Kei-Dei blĕk ơh dêh kơ tơdrong lu sư pơm kơnê̆ kơ Kră Yang, mălei ưh kơsĭ kơ đơ̆ng tơdrong noh na Kră Yang ưh pă lăng tơ lu sư kơplah lu sư đei tơdrong răm pơmat. Tơplơ̆ dơ̆ng, tơdrong ‘mêm Sư tih hloh kơ tơdrong Sư blĕk noh, thoi noh sư dŏng pơklaih kon pơlei Isơrael klaih đơ̆ng tơdrong lôch răm, mơnat ăn tơdrong yoch lu sư, blah ‘mong dŏng lu sư, păng sek tơlang tơpăt. Tơdrong ‘Bok Kei-Dei phak tih ‘măn kơ kon pơlei Isơrael noh weh đơ̆ng lu sư, pơjao lu sư kơ lu bơngai ayăt, mălei Kră Yang ưh kơ đei layơ lê̆ lu sư huŏng lăm tơdrong răm đơ̆ng lu bơngai ayăt. Tơdrong ‘mêm Kră Yang ‘mêm kơ lu kon pơlei Isơrael păng đĭ đăng kon bơngai kơ tơdrong tơchĕng păng hlôh băt kon bơngai.
Dang ei, lăm tơdrong Yang Bơhngol ‘Lơ̆ng pơchrang tơbăt, bơ̆n băt bơ̆n bơngai yoch yua kơ tơdrong tơchĕng, mălei yua kơ đơ̆ng tơdrong băt tơdrong ‘mêm ‘Bok Kei-Dei noh tơgŭm kơ bơ̆n hlôi đơ̆ng tơdrong pơ̆k huŏng, rơdu păng ưh kơ jing đơ̆ng akâu jăn wă adrin yak năm kiơ̆ trong Kră Yang. Lơ bơngai lui khan tơdrong yoch bơ̆n pơm tih dêh, lu sư tơchĕng ưh kơ hơnhŏ wă iŏk tơdrong ‘mêm tih đơ̆ng Kră Yang. Thoi noh đei rơih iŏk tơdrong dơ̆ng tơ’nguaih tơpang ti ‘mêm Kră Yang. Athei ‘blŏk kăl kơ năm tơ Kră Yang hăm jơhngơ̆m băt tơbral gah dôm tơdrong yoch bơ̆n pơm đĕch, na tơdrong dŏng tơgŭm, mơnat păng tơdrong ‘mêm noh tơdrong Kră Yang ling lang ‘măn kơ bơ̆n, thoi pơtao Đawit đei hlôi mơn, “… Ơ Kră Yang ‘Bok Kei-Dei! Jơhngơ̆m tơbral pơchah Ih kư̆m ưh kơ pơdê” (Hơriso 51:17b).
Kơkuh kơ Kră Yang, Tơ’ngla mă pơjing inh păng yua tơdrong ‘mêm ưh kơ tôch wă ‘mêm kơ inh. Apinh Ih tơgŭm inh băt tơbral đơ̆ng dôm tơdrong pơ̆k huŏng lăm chăl arih, wă kơ inh rai ‘mêm kơ Ih hloh păng arih kiơ̆ Kră Yang rim năr, yua anăn Kră Yang Yêsu Krist, Amen!
Bơ̆n tam đei mơn tơdrong ‘mêm tih Kră Yang ‘măn ăn kơ bơ̆n mă khan bơ̆n ưh kơ trŏ kơ wă iŏk?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 21
Kênh Youtube BHKTHN:
