Tơdrong Pơđơ̆k 3:28
“’Nĕ kơ khan ôh kơ rông ‘bôt ih, Brŏk bĕ dơning năm tơ âu dơ̆ng, inh gô ăn kơ ih.”
(Tơdrong Pơđơ̆k 3:28)
Nơ̆r jet tơchĕng pơwao:
– Pơtao Sôlômôn tơ’bôh ăn tơdrong glăi ayơ kơplah bơ̆n wă tơgŭm bơngai nai?
– Dah tơdrong tơgŭm bơngai nai hloh kơ bơ̆n kĕ lei liơ?
– Pơm thoi yơ wă kơ bơ̆n arih trŏ hăm tơdrong tơ’blŏk ‘nâu?
Kơplah minh ‘nu bơngai đei tơdrong mơnat đơ̆ng Kră Yang ăn, gơh đei tơdrong gơh hơgei đơ̆ng plĕnh, đei tơdrong gơh hơgei bơwei, na sư gô ‘bôh kơdih trŏ kơ hiơ̆k tơgŭm lu bơngai jum dăr. Kon bơngai bơ̆n hmă ưh kơ asong tơdrong lu sư ưh kơ đei, păng tơdrong lu sư ưh kơ đei ‘noh jơ̆ tơdrong ‘mêm mơnat (I Yôhan 4:7). Mălei kơplah bơ̆n lui sơng iŏk Kră Yang, đei tơdrong gơh hơgei, đei Kră Yang tơplih lei bơ̆n đei jơhngơ̆m pran wă arih băt ‘mêm mơnat păng băt tơgŭm trong tơdrong pơđơ̆k năr ‘nâu tơ’bôh ăn kơ bơ̆n pơm yoch dih băl ưh kơ sĭ yua kơ sơngah kơ pơm ‘lơ̆ng dih băl đĕch ôh mă noh kư̆m yua kơ pơhiơ̆ pơm ‘lơ̆ng hai mơ̆n. Pơhiơ̆ jơ̆ minh tơdrong sơngah, păng pơhiơ̆ gô tơ hiong tơdrong trŏ lăp pơm tơdrong lơ̆ng kơ bôl buăl. ‘Bok bơtho 3:6 tơbăt ăn: “Đei khei năr răk mong, đei năr hŭt lê̆”. Tôm tơdrong đei trŏ kơ jơ năr sư ngăl. Dah bơ̆n pơhiơ̆ ưh kơ “hŭt lê̆” trŏ jơnăr, lei dôm tơdrong kiơ bơ̆n “hŭt lê̆” đơ̆ng rŏng kơ noh phŏ ưh pă yua bơih. ‘Bok Pôl bơtho khan: “Na dang ei bơ̆n oei arih tơ ala teh, bơ̆n athei pơm ‘lơ̆ng kơ đe ling lang. Măloi athei pơm ‘lơ̆ng kơ bơngai lui bơ̆n”. ‘Nguaih kơ noh, trong tơdrong pơđơ̆k ‘nâu kư̆m bơtho khan bơ̆n ưh kơ trŏ kơ tơgŭm bơngai nai dôm tơdrong mă bơ̆n ưh kơ đei. Bơ̆n tơgŭm hloi ưh kơ pơhiơ̆ ôh kơplah “ih đei ‘bơ̆t anih ih tơmam rông ‘bôt đei apinh….” Pah nao kư̆m bơtho: “Mă đơ̆ng ‘maih ra jên hơdai bôl ră, mă iĕm ưh kơ đei, noh huay ôh, ‘Bok Kei-Dei kư̆m hiôk mơ̆n”. (II Kôrintô 8:12). Phŏ lơ ‘măng bơ̆n sơngah kơ tơgŭm ưh kơ trŏ yua ưh kơ đei “tơmam mă rông ‘bôt apinh” noh yua kơ bơ̆n tơchĕng khan bơ̆n đei mălei ưh kơ tôm mah dah mă ưh kơ đei rơkah wă kơ klah asong, đơ̆ng noh na tơchĕng kơdih khan: La yơ inh mơdrŏng, tôm mah rơkah rơkai, inh gô tơgŭm bơngai nai!
Bơngai lui kăl kơ ‘blŏk nơ̆r Kră Yang khan Inh athei tơgŭm lu bơngai đei tơdrong kăl wă kơ lu sư gơh apinh dah trŏ kơ iŏk tơdrong tơgŭm, păng yua kơ dôm tơdrong kăl kiơ Kră Yang ăn kơ inh jơ̆ wă kơ pơm dôm tơdrong noh. Tơdrong bơtho ‘nâu ưh kơ trŏ pơma ‘bơ̆r đĕch, tơchĕng đĕch, ưh kơ tơpă. Bơ̆n ưh kơ la yơ arih thoi noh tơ̆p mă tơdrong mơsêh Kră Yang tơplih bơ̆n, păng mưh tơdrong gơh hơgeí Sư hơmet bơ̆n păng pơm kơ bơ̆n băt kơnăl tơdrong sĭt ‘nâu! Bơ̆n oei lê̆ tơdrong ala teh wơ̆l jrok đei lăm bơ̆n tơchĕng kiơ̆ kơ bơ̆n kơdih, păng nơ̆r Kră Yang đĕch gơh tơplih tơdrong tơchĕng lu bơ̆n, ăn lăm jơhngơ̆m đon tơchĕng bơ̆n tơplih ‘nao gah tơdrong arih wă kơ bơ̆n arih kiơ̆ nơ̆r Kră Yang bơtho.
Ơ Kră Yang apinh Ih tơgŭm inh wơ̆ ‘lŏ lăm Ih rai đunh rai hloh, păng tơgŭm inh tơ’bôh tơdrong ‘mêm kơ lu bơngai jum dăr inh lăm tơdrong tơgŭm lu sư trŏ kơ jơnăr păng trŏ kơ tơdrong kăl wă. Krao khan yua anăn Kră Yang Yêsu Krist, Amen.
Bơ̆n đei tơ’blŏk kơ bơngai bu kăl tơgŭm?
Đŏk Sơ̆p hla bơar ‘Bok Kei-Dei lăm pêng sơnăm: Jop 37
Kênh Youtube BHKTHN:
