Tơdrong Pơđơ̆k 3:31-32
“’Nĕ kơ gar hăm bơngai pơm kơnê̆, Păng ‘nĕ kơ kiơ̆ trong sư ôh.” (Tơdrong Pơđơ̆k 3:31)
Nơ̆r jet tơchĕng pơwao:
– Lăm tôm tơdrong, pơtao Sôlômôn bơtho kon sư tơdrong kiơ?
– Sư tơlĕch ăn dôm tơdrong ayơ?
– ‘Bai pơhrăm năr ‘nâu bơtho bơ̆n tơdrong kiơ lăm tơdrong pơjăng hăm bơngai nai?
Bơngai lui tơpă ling lang hơpơ wă pơjing tơiung khul bơngai lui minh jơhngơ̆m đon ‘mêm mơnat, păng hiôk hian. Mălei, lăm tơdrong arih rim năr, ưh kơ đei khul ayơ khan ưh kơ đei hơtŭt băl, tơdrong sư mưh đei tơdrong hơtŭt băl bơ̆n hơmet thoi yơ. Minh lăm dôm tơdrong ưh kơ ‘lơ̆ng mă lơ bơngai oei pơ̆k huŏng noh jơ̆ ‘maih pơm plơ̆, dah đe pơm kơnê̆ kơ bơ̆n, bơ̆n pơm tơwih kơ đe hloi. Pơtao Sôlômôn, sư đêl hlôi bơih, băt ‘bôh hlôh nhen tơdrong noh na sư bơtho kon drŏnglo sư athei weh ataih đơ̆ng tơdrong pơm plơ̆, pơm tơwih kơ đe lăm dôm tơdrong pơlong lăng truh. “’Nĕ kơ gar hăm bơngai pơm kơnê̆”. “Gar” wă khan monh klai păng ‘maih dêh. Đei bơngai ‘maih wă thoi lu “bơngai kơnê̆” yua kơ lăng ‘bôh dôm tơdrong lu sư đei đơ̆ng dôm tơdrong kơnê̆, păng đei ‘bôh dôm tơdrong chu hiong lu bơngai arih kiơ̆ nơ̆r Kră Yang.
Adrol kơ noh, trong 30 bơtho ‘nĕ kơ pơjah hăm đe tơdrong kơ đei “tơdah đe ưh kơ pơm kơnê̆ kơ ih”. Mălei tơdah lu sư pơm tơdrong kiơ ưh kơ ‘lơ̆ng kơ bơ̆n lei ‘bok Pôl bơtho: “inh krao khan apinh ‘Bok Kei-Dei ăn kơ iĕm rai đunh rai băt ‘mêm mơnat dih băl păng hlôh tôm tơdrong Sư” (Philip 1:9). Nơ̆r bơtho ‘nâu tơ’bôh ăn tơdrong ‘mêm đei ‘bar tơdrong. Tơdrong ‘mêm “rai đunh rai băt ‘mêm mơnat dih băl” wă khan ưh kơ đei tôch, păng tơdrong ‘mêm tơ’bôh “lăm tơdrong hlôh băt tôm tơdrong Sư” wă khan đei tôch ‘bơ̆t yơ noh. Đơ̆ng noh bơ̆n khan kư̆m đei tơdrong ayơ bơngai hli yom kơ Kră Yang oei gơh pơm tơwih hăm dôm tơdrong mă “bơngai pơmm kơnê̆ đei pơm, mălei mă đơ̆ng gơh pơm tơwih kơ lu sư lei kư̆m ưh kơ đei gơh pơm jơhngơ̆m thoi lu sư ôh. “păng ‘nĕ kơ trong lu sư ôh,” (trong 31).
Dang ei, bơ̆n oei arih lăm kon pơlei pơla bơ̆n ‘bôh, wă kơ kĕjei, lei athei mă pran, pran lăm tơdrong pơjei băl jơhngơ̆m pran, mălei pơjei băl jơhngơ̆m ưh kơ layơ jing trong hơmet wă tơiung ming tơpôl arih hiôk ‘lơ̆ng ôh, yua kơ kiơ kon pơlei Kră Yang ưh kơ rơih trong bơngai kơnê̆, “yua kơ Kră Yang areh kơ bơngai hơlĕnh”. “bơngai hơlĕnh” kư̆m dai “ bơngai pơm kơnê̆” păng ‘Bok Kei-Dei areh kơ lu sư. Bơ̆n juăt kơtơ̆ng khan: ‘Bok Kei-Dei areh kơ tơdrong yoch mălei ‘mêm kơ bơngai yoch. Mălei, kăl kơ pơ’lơ̆ng hăm tơdrong tơchĕng ‘nâu mưh yua kơ minh ‘nu bơngai oei arăng kơ̆l păng oei hơnơ̆ng kơ arih lăm tơdrong hơlĕnh lei ‘Bok Kei-Dei gô “areh” kơ sư. ‘Bok Pôl bơtho khan: “‘Bok Kei-Dei oei tơplĕnh ti, sư ‘bôh tôm tơdrong bơngai pơm yoch, pơm kơnê̆ tơpă, na Sư ơh wă phak kon bơngai. Kon bơngai lăp đon kơ tơdrong pơm kơnê̆ thoi noh na lu sư nŏng kơ pơgăn lê̆ bôl sư wă kiơ̆ tơdrong ‘Bok Kei-Dei” (Rôm 1:18). Bơngai nŏng kơ druh kiơ̆ tơdrong kơnê̆, tơdrong yoch ưh kơ layơ gơh “pơgơ̆p hơdai” (Hơriso 24: 3-4)
Ơ Kră Yang, apinh Ih wei lăng jơhngơ̆m păng đon tơchĕng inh lăm nơ̆r Ih wă kơ inh ling lang năm trong tơpăt, huay kơ pơm tơwih kơ bơngai pơm kơnê̆ kơ inh, mălei lăm dôm tơdrong đei truh athei ling lang pơm tơ’bôh tơdrong arih ‘lơ̆ng trŏ kơ kon Kră Yang. Krao khan yua Anăn Kră Yang Yêsu Krist, Amen.
Bơ̆n juăt kơ pơm tơwih thoi yơ hăm “bơngai pơm kơnê̆”.
Đŏk Sơ̆p Hla bơar ‘Bok Kei-Dei lăm pêng sơnăm: Jop 39
Kênh Youtube BHKTHN:
