Tơdrong Pơđơ̆k 3:29-30
“’Nĕ pơđâu chă đon wă pơm kơnê̆ kơ rông ‘bôt ih, Dah sư oei hiôk hơ-iă hăm ih.”
(Tơdrong Pơđơ̆k 3:29)
Nơ̆r jet tơchĕng pơwao:
– Wă kơ đei mơn tơdrong arih ‘nao, hơđơ̆ng. Pơtao Sôlômôn oei bơtho dơ̆ng kon sư tơdrong kiơ?
– Nơ̆r Kră Yang tơbăt ăn tơdrong ayơ mă kăl tơpă wă tơiung kon pơlei arih ‘lơ̆ng?
– Bơ̆n kăl kơ arih thoi yơ hăm bôl buăl bơ̆n?
Minh chăl arih đei Kră Yang păng arih gơh hơgei ưh kơ minh tơdrong pơm ‘lơ̆ng kơ bơngai đei tơdrong kăl wă mă kư̆m ưh kơ layơ đei tơdrong monh klai dah wă pơm kơnê̆ kơ đe. Pơtao Sôlômôn bơtho: “’Nĕ chă đon wă pơm kơnê̆ kơ rông ‘bôt ih” “pơđâu chă đon” jơ̆ minh tơdrong pơrơ̆ng. Sư bơtho kon ưh kơ pơrơ̆ng pơm kơnê̆ kơ bôl buăl. Măloi dơ̆ng, tơdrong chă đon wă pơm kơnê̆ kơ rông ‘bôt đei chih lăm âu kơplah bơngai rông ‘bôt oei “hiôk hơiă hăm ih” oei wă khan “lui gơnang”, bôl buăl ling lang mơn hơđơ̆ng, lui ngeh păng ưh kơ hli krê. Thoi noh, tơdrong yoch ‘nâu ưh kơ minh tơdrong pơm kơnê̆ đĕch, mă oei plơ̆ plĕch păng yua iŏk jơngơ̆m đe lui ngeh kơ bơ̆n, hơđơ̆ng kơ bơ̆n. Bơ̆n lăng ‘bôh yoch kơnê̆ ‘nâu hơđăl dêh đơ̆ng tơdrong plơ̆ plĕch ‘bok Juđa Ikariôt: “Juđa iŏk bĕng mi ei na lĕch hloi tơ’nguaih. Kơplah ei măng mu bơih yua kơ ‘năr mơ̆t bơih” (Yôhan 13:30). Ăn kơ bơngai ‘bĕng mi djrŭ lăm đak ‘nhĕm ‘noh jơ̆ tơ’bôh tơdrong pơyom păng tơdrong ‘mêm băl lam buăl juăt (Rut 2:14). Mălei ‘bok Juđa tơwih kơ Kră Yang Yêsu “oei hiôk hơiă” hăm Sư, tă tơ sư plơ̆ plĕch kơ Kră Yang dơ̆ng. Đei bơngai khan sư pơm thoi noh tĕch ‘bok thây sư, mălei sơ̆p hla bơar ‘Bok Kei-Dei khan sư jơ̆ minh ‘nu bơngai luch dêh păng ham kơ jên.
Tơdrng pơđơ̆k 3:27-30 đei tơ’bôh ăn wă pơjing tơiung lăm kon pơlei arih ‘lơ̆ng kăl kơ đei ‘bar tơdrong: Mă minh, hiơ̆k tơgŭm tơdrong kăl wă bơngai nai, ‘bok Pôl đei bơtho lu bơngai lui tơ pơlei Philip: “Iĕm ‘nĕ kơ pơm minh tơdrong kiơ mă ưh kơ ‘lơ̆ng kơ đe, thoi lĕ kơ tơdrong pơang, dah tơdrong ưh kơ băt mơnat kơ đe, iĕm athei pơm ‘lơ̆ng ling lang thoi bơngai dim jô̆ kơ đe bơngai ‘lơ̆ng hloh kơ iĕm. Iĕm athei pơhiôk jơhngơ̆m đe mơ̆n, ‘nĕ kơ pơhiôk jơhngơ̆m kơdih đĕch ôh.” (Philip 2:3-4). Mă ‘bar, arih tơpăt, ‘mêm mơnat. Tơdrong lui ngeh jơ̆ tơmam tơklep tơgŭm kon pơlei jing pơgơ̆p dih băl: Wă kơ gơh bơwei tơdrong ‘lơ̆ng lăm kon pơlei Kră Yang, kăl kơ lui ngeh dih. Nơ̆r Kră Yang bơtho: “Bơ̆n athei adrin pơm jơhngơ̆m đon dim hiôk hơiă kơ đĭ đăng bơngai. Păng athei adrin pơm ‘lơ̆ng tơpăt ling lang. Tơ̆ng ưh, bơ̆n ưh kơ gơh ‘bôh Kră Yang ôh.” (Hêbrơ 12:14).
Dang ei, đei tơ’bôh lu tơm lăm mang kon pơlei pơla lăm teh đak tơgŭm ăn kơ bơngai “arih chă pơm đĕch ưh kơ tơpă” pơm yua iŏk rup ‘lơ̆ng rŏ wă hơlĕnh bơngai nai, dah yua iŏk tơdrong noh thoi tơmam tơblah wă pơrăm đe, pơm kơ lu bơngai mă ưh kơ ‘maih wă “pơjah hăm tơdrong kơ đei”! ‘Bơ̆t âu, pơtao Sôlômôn ưh kơ wă pơma hămm kon sư khan dôm tơdrong glăi ngăl ôh, mălei sư khan ưh kơ lăp kơ lu bơngai ‘maih pơjah, ‘maih chă tơdrong, ‘maih tơgar tơdrong ưh kơ trŏ. Lu bơngai mă gah Kră Yang păng arih gơh hơgei, bơ̆n athei chă tơdrong hiôk hơiă dih băl (Mathiơ 5:9) păng “bơ̆n ‘nĕ kơ pơm dôm tơdrong kơnê̆ wă kơ bơ̆n oei hiôk hơiă hăm đĭ đăng bơngai” (Rôm 12:18).
Ơ Kră Yang, apinh Ih tơgŭm inh arih ‘lơ̆ng tơpăt păng ‘mêm mơnat kơ lu bơngai jum dăr inh wă kơ đơ̆ng noh lu sư ‘bôh Ih lăm tơdrong arih inh. Krao khan yua anăn Kră Yang Yêsu Krist, Amen.
Bơ̆n pơm kiơ wă tơgŭm bơwei tơdrong arih ‘lơ̆ng lăm kon pơlei Kră Yang?
Đŏk Sơ̆p hla bơar ‘Bok Kei-Dei lăm pêng sơnăm: Jop 38
Kênh Youtube BHKTHN:
