Klei Aê Diê Blŭ: Y‑Mathiơ 11:16‑19
Êlan kliăng: “Jăk mơak yơh diih tơdah arăng dlao wač, ngă jhat, leh anăn mčeh lu mta klei jhat kyua Kâo” (Y‑Mathiơ 5:11)
Klei êmuh ksiêm mĭn: Hŏng hlei pô Khua Yang Yêsu bi msĕ djuê ana phung Israel? Ya ngă Ñu bi msĕ snăn? Ya jing hdră kñăm mơ̆ng klei mưč mač leh anăn ƀuah ăl kơ Y‑Yôhan pô ngă ƀaptem leh anăn Khua Yang Yêsu? Ya knuih brei drei mâo sĭt tuôm hŏng klei bi kdơ̆ng snăn?
Khua Yang Yêsu bi msĕ djuê ana Israel hlăm ênuk Ñu msĕ si hđeh dôk hlăp lêñ ti krah sang mnia, diñu jăk ƀiădah tăp năng ăt mâo klei amâo thâo bi djŏ, leh phung hđeh anei čiăng hlăp klei mơak ƀiădah phung hđeh mkăn lŏ čiăng hlăp klei ênguôt. Diñu bi mneh msao, bi tăng ngă ngañ bañ kơ sa wăl sang mnia.
Djuê ana Israel hlăm ênuk Khua Yang Yêsu bi kdơ̆ng hŏng jih jang phung arăng čhal lač leh anăn lač kơ klei soh diñu. Diñu ktưn hưn kơ klei bhiăn djuê ana Yuđa leh anăn yua nanao klei bhiăn msĕ si sa kdrăp đru kơ mgang kơ klei dưi diñu. Diñu mčeh luar kơ Y‑Yôhan pô ngă ƀaptem yang jhat ngă kyua ƀuh gơ̆ “amâo ƀơ̆ng huă kăn mnăm rei”, drei thâo Y‑Yôhan pô ngă ƀaptem jing mnuih hdĭp hlăm kdrăn tač, khăng kăm ƀơ̆ng huă leh anăn knŏng ƀơ̆ng ktuôp hŏng êa hnuê dliê (Y‑Mathiơ 3:4). Hlăk êjai Khua Yang Yêsu hlai pô mbĭt hŏng phung ala ƀuôn ñĕ đuê̆ snăn diñu lŏ lač kơ Khua Yang “sa čô ră ƀơ̆ng leh anăn ră mnăm, mah jiăng hŏng phung rĭng jia leh anăn phung soh.” Hdră kñăm mơ̆ng klei lač leh anăn klei diñu ƀuah ăl jing čiăng mdăp klei jhat pô kyua klei Y‑Yôhan pô ngă ƀaptem leh anăn Khua Yang Yêsu lač ktrâo kơ klei ngă mgưt leh anăn klei soh diñu anăn diñu čiăng mdlưh kơhưm Y‑Yôhan pô ngă ƀaptem leh anăn Khua Yang Yêsu. Bruă phung khua čih hră leh anăn phung Pharisi amâo mdê ôh hŏng bruă phung hđeh ngă, kyua mnuih prŏng leh anăn thâo mĭn amâo ngă ôh bruă snăn.
Hruê anei, drei ăt khăng tlă anăp hŏng klei ƀuah ăl, mưč mač, mčeh luar mơ̆ng phung amâo čiăng hmư̆ drei blŭ sĭt drei lač kơ klei soh, klei kmhal leh anăn klei hdĭp lă lar. Tăp năng drei ƀuh ênguôt, ngêñ leh anăn čiăng bi kdơ̆ng; khădah snăn, Khua Yang čiăng kơ drei hdĭp kpă ênuah čiăng bi êdah klei kpă ênô Aê Diê mơ̆ng bruă pô ngă grăp hruê. Drei amâo guôn mblang amâodah bi tăng ôh kơ hdră pô hdĭp ƀiădah brei drei hdĭp hlue si klei Khua Yang mtô, anăn jing hdră bi kdơ̆ng thâo mĭn mơ̆ng phung tŭ leh klei kpă leh anăn hriê kơ prŏng hlăm klei sĭt nik. Brei drei hdơr Khua Yang Yêsu lač leh, sĭt drei jih ai tiê hdĭp kơ Khua Yang ƀiădah arăng ăl ngêñ, ngă jhat leh anăn mčeh luar djăp mta klei, snăn brei drei mơak, leh anăn jih ai tiê hơ̆k mơak kyua pô dôk hlăm klei bi mguôp jăk mơak hŏng Khua Yang (Y‑Mathiơ 5:11‑12).
Diih dôk blŭ tlao thâo mĭn hlue si klei Khua Yang mtô mơ̆ sĭt tuôm hŏng klei arăng ngă jhat, ƀuah ăl leh anăn bi kdơ̆ng?
Wah lač: Ơ Khua Yang, akâo kơ Ih đăm brei kâo uêñ mĭn ôh ti anăp klei ƀuah ăl, čhal lač mơ̆ng phung mkăn sĭt kâo hưn anăn Khua Yang. Akâo kơ Ih đru kâo kƀĭn ai tiê hlăm Khua yang čiăng hdĭp leh anăn hlue ngă ya klei Ih čiăng kâo ngă.
Dlăng Klei Aê Diê Blŭ hlăm tlâo thŭn: Y‑Êsai 42:10‑43:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
