Klei Aê Diê Blŭ: Hêbrơ 13:5-6
Êlan kliăng: “Đăm khăp kơ prăk ôh; leh anăn dôk mơak bĕ hŏng mnơ̆ng diih mâo leh; kyuadah Aê Diê lač leh, “Kâo amâo srăng lui ih amâodah hngah kơ ih ôh.” (Hêbrơ 13:5).
Klei êmuh ksiêm mĭn: Kdrêč Klei Aê Diê Blŭ anei mtô si knhuah brei drei mâo hŏng prăk kăk? Ya ngă? Si phung đăo ngă čiăng dưi dôk mơak, đăm khăp kơ prăk ôh?
Hlăm sa lăn ala knư̆ hruê knư̆ bi mđĭ myuôm klei hdĭp kơ mnơ̆ng mnuă, snăn prăk kăk blư̆ jing giê treh pioh mkă ênoh yuôm anak mnuih. Lu mnuih dlăng prăk yơh jing phŭn kơ klei hdĭp, leh anăn klei kñăm kơ klei hdĭp diñu amâo lŏ mâo klei mkăn êngao hĭn kơ klei duah prăk ôh. Drei ăt khăng hmư̆ klei blŭ mưč čhưč msĕ snei, “Ya mta mnơ̆ng amâo dưi blei hŏng prăk srăng dưi blei hŏng lu lĭn prăk !” Klei sĭt, klei jing prăk kăk gơ̆ amâo jhat ôh leh anăn Klei Aê Diê Blŭ amâo tuôm lač ôh mâo prăk jing klei soh. Ƀiădah Klei Aê Diê Blŭ phat kđi klei khăp kơ prăk, “Kyuadah klei khăp kơ prăk jing agha kơ jih jang klei jhat” (I Y‑Timôthê 6:10a). Kyuanăn, pô čih hră Hêbrơ mtă mtăn kơ phung đăo, “Đăm khăp kơ prăk ôh”. Tui si klei blŭ phŭn hlăm klei Grek, pruê̆ blŭ anei čiăng lač “knhuah hdĭp ayŏng adei đăm khăp kơ prăk ôh”.
Hrô kơ klei khăp kơ prăk, kơ mnơ̆ng mnuă, brei phung đăo “dôk mơak bĕ hŏng mnơ̆ng diih mâo leh”, mblang jing dôk mơak hŏng ya mta mnơ̆ng Aê Diê brei. Lač msĕ snăn amâo djŏ ôh phung đăo amâo gĭr ktưn ôh, amâo mă bruă ôh, dŭm mâo dŭm yua jih… leh anăn dôk mang yơh ! Ktuê jih Klei Aê Diê Blŭ, Khua Yang mtô drei brei kriăng kreh, gĭr ktĭr mă bruă, brei thâo duh hŏng klei thâo mĭn čiăng lŏ bi mnga, thâo mkăm pioh msĕ mơh. Snăn klei kñăm lač tinei jing knhuah klei hdĭp sa čô đăo, brei dôk mơak, đăm tluh čiăng đei, prăk amâo dưi jing mta klei drei dưm êlâo hĭn ôh. Ya ngă msĕ snăn? Klei wĭt lač klă mngač leh hlăm klei blŭ tui tluôn: “Kyuadah Aê Diê lač leh, Kâo amâo srăng lui ih amâodah hngah kơ ih ôh. Snăn drei dưi lač hŏng klei knang, Khua Yang jing Pô đru kâo, kâo amâo srăng huĭ ôh; ya mnuih dưi ngă kơ kâo?” (êlan 5b-6). Prăk kăk amâodah mnơ̆ng mnuă, lač kluôm amâo dưi rơ̆ng kơ klei hdĭp drei hlăm hruê ti anăp ôh, kăn dưi bi hrăp kơ klei hdĭp drei rei. Knŏng hjăn Aê Diê, Pô drei kkuh mpŭ leh anăn mă bruă yơh dưi ngă klei anăn. Khua Yang Pô ƀuăn leh Ñu dôk mbĭt hŏng drei leh anăn đru dŏng drei nanao.
Mâo sa čô knhâo hing ang anăn Epicurus tui ksiêm klei klă sĭt hlăm klei hdĭp tuôm lač snei, “Đăm bi rai ôh mnơ̆ng ih dôk mâo hŏng klei tluh čiăng kơ mnơ̆ng ih ka mâo; brei hdơr mnơ̆ng ih dôk mâo, tuôm jing mnơ̆ng ih hmăng hmưi”. Mnuih tui tiŏ prăk kăk amâo tuôm thâo djăp ôh kyua “klei tluh čiăng amâo mâo knhal” kyuanăn srăng jing nanao hlŭn kơ prăk yơh, amâo tuôm thâo hrăp ôh. Phung đăo brei hriăm knhuah hdĭp amâo khăp kơ prăk čiăng dôk mơak hlăm Khua Yang nanao.
Ya mta klei drei dôk tui tiŏ hlăm klei hdĭp? Si ngă hruê anei diih dưi mơ̆ ngă mta klei tui si knhuah hdĭp amâo khăp kơ prăk?
Wah lač: Ơ Khua Yang, bi mni kơ Khua Yang kyuadah Ih Pô yơh ƀuăn leh, amâo srăng lui kâo amâo hngah kơ kâo ôh, dôk mbĭt hŏng kâo leh anăn đru dŏng kâo nanao. Hlăm klei khăp Khua Yang, kâo mâo klei rơ̆ng kluôm ênŭm. Jih jang klei mdrŏng sah kdrưh kơang lăn ala amâo dưi mkă ôh hŏng klei hdĭp hlăm Khua Yang kyuadah mâo Khua Yang ai tiê kâo dôk mơak leh.
Dlăng Klei Aê Diê Blŭ hlăm tlâo thŭn: Klei Bi Hriêng 12:1‑28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
