Klei Aê Diê Blŭ: Klei Mphŭn Dơ̆ng 12:1‑5
Êlan kliăng: “Hŏng klei đăo Y‑Abraham gưt tơdah Aê Diê iêô ñu brei nao kơ anôk ñu srăng mă tŭ jing ngăn dưn. Snăn ñu đuĕ nao, amâo thâo ôh ti anôk ñu nao.” (Hêbrơ 11:8).
Klei êmuh ksiêm mĭn: Ya klei kñăm čuăn dleh dlan ti anăp Y‑Abraham? Ti anôk ñu knang čiăng kñăm čuăn? Ya klei bi mguôp Aê Diê brei kơ ñu? Ya klei mă hriăm kơ drei mơ̆ng Y‑Abraham bi hmô kơ klei đăo knang gưt asăp?
Klei Mphŭn Dơ̆ng kdrêč 12 jing trăn êdah kdlưn kơ klei Aê Diê iêô mthưr mdê hĭn pioh kơ Y‑Abraham. Mơ̆ng ñu kbiă hriê sa găp djuê doh jăk jing găp djuê Israel Aê Diê ruah, mơ̆ng anăn kkiêng kơ Yang Krist.
Êjai dôk hdĭp mbĭt hŏng găp djuê hlăm čar ñu pô, Y‑Abraham thâo kral klei Aê Diê iêô. Aê Diê iêô ñu kbiă mơ̆ng čar ñu, nao kơ čar Aê Diê srăng ktrâo ƀiădah amâo thâo ôh ti anôk leh anăn si jing. Y‑Abraham dôk ti anăp sa klei kñăm čuăn dleh dlan snăk jing klei kbiă đuĕ mơ̆ng anôk pô dôk hơĭt ênang mơ̆? Ti anôk ñu knang čiăng kñăm čuăn? Ti knhal tuč, hŏng klei đăo kjăp rơ̆ng kơ Aê Diê, ñu kñăm čuăn gưt asăp Aê Diê iêô. Pô čih hră Hêbrơ lač klă: “Hŏng klei đăo Y‑Abraham gưt tơdah Aê Diê iêô ñu brei nao kơ anôk ñu srăng mă tŭ jing ngăn dưn. Snăn ñu đuĕ nao, amâo thâo ôh ti anôk ñu nao” (Hêbrơ 11:8).
Ƀiădah lĕ, Aê Diê mâo nanao klei bi mguôp mđrăm mbĭt hŏng klei Ñu iêô mthưr. Ñu ƀuăn srăng hơêč hmưi kơ ñu, srăng brei kơ ñu mâo klei hing ang, srăng brei kơ ñu jing sa găp djuê prŏng, leh anăn srăng jing phŭn klei jăk jĭn kơ jih jang găp djuê mnuih ti lăn ala (êlan 2‑3). Klei bi mguôp srăng mkŏ mjing ti krah Aê Diê hŏng ñu tơdah ñu gưt asăp, Aê Diê srăng hơêč hmưi kơ ñu. Ñu đăo knang leh anăn gưt asăp Aê Diê iêô leh hŏng klei kñăm čuăn atăt ba mô̆, amuôn leh anăn dĭng buăl ñu nao mbĭt tui hlue si klei Aê Diê ktrâo atăt (êlan 4‑5).
Y‑Abraham hmiêt mkăp kñăm čuăn gưt asăp leh anăn tui hlue klei Aê Diê iêô, wăt tơdah kâo amâo thâo ôh ti anôk srăng nao. Anei jing sa klei đăo prŏng snăk bi êdah hŏng klei gưt asăp. Kơ êdei, drei thâo ñu ăt lŏ bi êdah klei đăo hŏng klei gưt asăp Aê Diê tơdah hmiêt mkăp ba myơr anak ñu Y‑Isăk jing mnơ̆ng myơr ngă yang. Aê Diê hưn klă klei đăo ñu hŏng klei sa čô dĭng buăl jăk blŭ snei: “ară anei hin kâo thâo ih huĭ mpŭ kơ Aê Diê” (Klei Mphŭn Dơ̆ng 22:1-12). Y‑Abraham jing aê đưm klei đăo kơ grăp čô drei kyua klei ñu đăo knang gưt asăp. Sĭt yơh amâo êlưih ôh gưt asăp tơdah săn asei klei yuôm hĭn drei mâo leh anăn amâo thâo ôh si boh tŭ srăng jing. Ƀiădah hŏng klei đăo kơ Khua Yang kluôm dhuôm, Y‑Abraham hmiêt mkăp kñăm čuăn gưt asăp.
Ktuê êlan tui hlue Khua Yang, amâo ƀiă blư̆ ôh drei dôk ti anăp klei kñăm čiăng dleh dlan msĕ si Y‑Abraham. Si ngă drei đăo knang kơ klei Aê Diê ƀuăn amâodah knang kơ klei tĭng yap luč liê tŭ dưn kơ pô srăng kñăm čuăn? Klei Aê Diê čiăng ƀuh kơ phung anak Ñu jing klei đăo leh anăn gưt. Brei drei hriăm leh anăn kpĭ mjuăt drei hlăm klei gưt asăp Khua Yang grăp hruê.
Si ngă drei hmiêt mkăp čuăn gưt asăp Khua Yang hlăm jih jang klei truh mơ̆?
Wah lač: Ơ Khua Yang, akâo Ih thiăm klei đăo kơ kâo čiăng kâo hmiêt mkăp kñăm čuăn gưt hlue klei Khua Yang ktrâo atăt pioh brei kơ klei hdĭp kâo. Akâo Ih đru kâo đăo knang leh anăn djă păn nanao kơ klei Khua Yang ƀuăn čiăng êbat nao.
Dlăng Klei Aê Diê Blŭ hlăm tlâo thŭn: Y‑Êsai 28:23‑29:12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
