Klei Wah Lač Knhal Jih Thŭn – 31/1/2022

1116

 

Klei Aê Diê Blŭ: I Klei Yăl Dliê 4:9-10

Êlan kliăng: “Ơ, čiăng kơ Ih brei klei jăk jĭn kơ kâo leh anăn bi ƀai knông lăn kâo, leh anăn čiăng kơ kngan Ih dưi dôk mbĭt hŏng kâo, leh anăn čiăng kơ Ih srăng kiă kriê kâo kơ klei jhat čiăng kơ klei anăn đăm truh kơ kâo ôh!” Aê Diê brei kơ ñu klei ñu akâo leh” (Klei Yăl Dliê 4:10).

Klei êmuh ksiêm mĭn: Hlei jing Y‑Jabes leh anăn si ñu wah lač leh hŏng Aê Diê? Si Aê Diê wĭt lač klei ñu akâo? Lŏ dlăng wĭt sa thŭn leh êgao leh anăn êlâo kơ mŭt hlăm thŭn mrâo hlue mlan ƀlĕ, ya klei drei čiăng wah lač hŏng Aê Diê?

Drei amâo thâo lu ôh kơ Y‑Jabes, knŏng thâo ñu mơ̆ng êpul Yuđa leh anăn ñu jing sa čô khua djuê ana arăng mpŭ. Mơ̆ng klei Y‑Jabes wah lač mâo Aê Diê wĭt lač, drei mâo lu klei hriăm yuôm bhăn hlăm hruê knhal jih thŭn hlue mlan ƀlĕ.

Tal sa, ñu jing pô “wah lač” leh, boh blŭ anei jing kwưh akâo prŏng, mđing kơ Aê Diê čiăng akâo kơ Aê Diê. Tal dua, ñu akâo kơ Aê Diê “brei klei jăk jĭn”, hlăm hră phŭn boh blŭ “brei klei jăk jĭn” dưi mñă wĭt dua blư̆ hlăm êlan anei, bi êdah klei đăo klă sĭt Aê Diê srăng brei klei jăk jĭn. Tal tlâo, ñu akâo kơ Aê Diê “bi ƀai knông lăn”, hlăm hră phŭn mâo dua boh blŭ “ngă bi lu hĭn”, “bi ƀai knông lăn” leh anăn mjưh ruê̆ hŏng boh blŭ “srăng brei”. Tal pă, ñu akâo “kngan Aê Diê dưi dôk mbĭt hŏng ñu” amâo djŏ knŏng hơêč hmưi ôh ƀiădah lŏ răng mgang, kngan Aê Diê srăng ktŭng ñu mơ̆ng klei soh jhat. Y‑Jabes thâo klă “klei soh” srăng ngă ñu dôk hlăm klei ênguôt leh anăn ăt jing mta phŭn ngă kơ ñu luč klei Aê Diê hơêč hmưi. Aê Diê mơak wĭt lač klei ñu wah lač, “Aê Diê brei kơ ñu klei ñu akâo leh”.

Dlăng wĭt sa thŭn hlue mlan ƀlĕ êgao hŏng lu klei rŭng răng kyua klei ruă tưp, yan adiê ngă, bruă duh mkra… leh anăn dlăng kơ sa thŭn mrâo truh hŏng klei mâo drei ka dưi thâo êlâo ôh, ya klei drei srăng wah lač hŏng Aê Diê? Brei drei čuôn kơŭt leh anăn tui hlue klei Y‑Jabes bi hmô leh hlăm klei ñu wah lač, brei thâo kơ klei jăk jĭn Aê Diê brei leh hlăm thŭn êgao čiăng êbat hŏng Khua Yang hlăm thŭn mrâo hŏng klei đăo kjăp Aê Diê ăt srăng brei klei jăk jĭn. Wah lač bĕ hŏng Aê Diê “bi ƀai knông lăn” kơ pô, năng ai hlăm thŭn êgao drei amâo jăk kơ klei suaih pral, bruă knuă, kơ dŭm klei găl čiăng mă bruă kơ Aê Diê…, akâo kơ Aê Diê srăng lŏ brei thiăm kơ drei lu hĭn hlăm thŭn mrâo. Akâo kơ Khua Yang kiă kriê leh anăn răng mgang drei kyua jŭm gah drei ăt dôk mâo lu klei huĭ hyưt, klei rŭng răng leh anăn knŏng Aê Diê yơh dưi răng mgang drei hŏng klei kluôm ênŭm. Ăt brei drei nao kơ Aê Diê čiăng hưn hŏng Ñu kơ klei soh drei hlăm thŭn mlan êgao kyua klei soh jing mta phŭn ngă kơ drei luč klei jăk jĭn. Sĭt drei jih ai tiê wah lač msĕ si Y‑Jabes klă sĭt Aê Diê mđing hmư̆ leh anăn wĭt lač klei grăp čô drei akâo.

Ti anăp thŭn mrâo, ya klei drei akâo kơ Aê Diê? Diih wah lač msĕ si Y‑Jabes mơ̆?

Wah lač: Ơ Khua Yang, kâo bi mni lač jăk kơ Ih brei kâo êbat hŏng Ih hlăm thŭn êgao. Akâo Ih đru kâo păn kjăp nanao kơ Khua Yang hlăm thŭn mrâo kyua kâo thâo knŏng Ih jing Pô brei klei jăk jĭn, Pô bi ƀai knông lăn leh anăn Pô răng mgang leh anăn kiă kriê kâo.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Dlăng Klei Aê Diê Blŭ hlăm tlâo thŭn: II Klei Yăl Dliê 6:12-31

Kênh Youtube BHKTHN:

https://www.youtube.com/c/bhkthn

Bài trướcZaj Lus Thov Xaus Xyoo – 31/1/2022 
Bài tiếp theoLời Nguyện Cầu Cuối Năm – 31/1/2022