Klei Aê Diê Blŭ: II Y-Samuel 9:1-13
Êlan kliăng: “Gơ̆ kkuh leh anăn lač, “Ya dĭng buăl ih jing tơl ih uêñ hĕ kơ sa drei asâo djiê msĕ si kâo?” (II Y-Samuel 9:8)
Klei êmuh ksiêm mĭn: Hlei jing Y-Mêphibôset leh anăn si klei truh kơ gơ̆? Si klei Mtao Y-Đawit ngă kơ Y-Mêphibôset? Ya ngă? Mơ̆ng klei yăl dliê anei si drei ƀuh kơ klei pap Aê Diê ngă jăk leh kơ drei? Si drei ngă čiăng bi êdah klei jăk hŏng phung riêng gah drei?
Y-Mêphibôset jing anak êkei Y-Jônathan anak mtao, leh anăn čô Mtao Y-Sôl. Hlăk aê leh anăn ama ñu djiê, Y-Mêphibôset mrâo mâo 5 thŭn leh anăn gơ̆ êwiên kyuadah pô rông bi lĕ gơ̆ êjai êran đuê̆ dăp (II Y-Samuel 4:4). Tơdah Mtao Y-Đawit duah ƀuh Y-Mêphibôset, gơ̆ mâo hlăm brô 21 thŭn, leh anăn mâo sa čô anak điêt (II Y-Samuel 9:12). Klei hdĭp Y-Mêphibôset truh kơ hruê anăn bŏ hŏng klei hêñ mlâo huĭ hyưt, tơl hlăk bi tuôm hŏng Mtao Y-Đawit, gơ̆ kŭp ƀô̆ ti lăn kkuh leh anăn pia kơ gơ̆ pô jing “sa drei asâo djiê” (êlan 8). Tĭng kơ klei hdĭp myang, Y-Mêphibôset jing rup bi ala kơ phung mnuih. Aê Diê hrih mjing leh anak mnuih jăk siam hlăm găp djuê mtao, ƀiădah jing gui hĕ klei “ruă êwiên” leh êbuh, lĕ hlăm klei mplư ti war Êđen, leh anăn dơ̆ng mơ̆ng năn yơh dôk hdĭp nanao hlăm klei huĭ hyưt kơ Mtao diñu ka tuôm ƀuh ƀô̆ mta ôh.
Hlăm klei truh msĕ snăn, Mtao Y-Đawit bi êdah klei jăk kơ Y-Mêphibôset tơdah mtao čŏng čiăng tui duah leh anăn bi êdah klei jăk kơ mnuih knap mñai anei. Sa čô dĭng buăl anăn gơ̆ Y-Siba hưn mthâo, Y-Mêphibôset jing mnuih “êwiên jih dua nah jơ̆ng” (êlan 3), leh anăn phung čih klei hƀuê ênuk lŏ mñă sa bliư̆ mơh hlăm êlan 13, ƀiădah mklăk wĭt hŏng klei anăn, Mtao Y-Đawit amâo tuôm bơ̆k bâo djŏ sa bliư̆ kơ klei gơ̆ êwiên ôh. Blŭ mdê hĭn, Mtao Y-Đawit knŏng uêñ kơ asei Y-Mêphibôset pô, bi phung lu mkăn hdơr kơ gơ̆ jing sa čô mnuih êwiên. Drei msĕ mơh, lu mta klei ênguôt hnĭng hlăm hruê êgao, klei jhat klei hêñ tui tiŏ drei ti djăp anôk drei nao, ƀiădah mâo knŏng hjăn păn sa Pô dôk dlăng nanao kơ drei tui si klei jing drei pô, dlăng nanao hŏng klei khăp hơiêng čiăng guôm jih klei phĭ, klei ênguôt hêñ mlâo drei, anăn yơh jing Mtao, jing Aê Diê drei. Ñu jing Pô “Ñu amâo ngă kơ drei tui si klei soh drei ôh, kăn bi kmhal rei tui si klei wê drei. Kyuadah msĕ si jih adiê dlông hĭn kơ lăn ala, snăn mơh klei khăp ñu jing prŏng kơ phung huĭ mpŭ kơ ñu.” (Klei Mmuñ Hđăp 103:10-11).
Mtao Y-Đawit ngă klei jăk kơ Y-Mêphibôset kyuadah êlâo kơnăn, Y-Jônathan ăt khăp hơiêng leh anăn ngă jăk kơ ñu mơh. Khădah mnuih kreh ngă krưh bi kdơ̆ng nanao hŏng Aê Diê, ƀiădah Pô jăk “bi êdah klei Ñu khăp kơ drei snei, êjai drei ăt jing mnuih soh Krist djiê kyua drei” (Rôm 5:8). Bi ti gŭ bĕ drei pô čiăng akâo kơ Khua Yang msĕ si Y-Mêphibôset tuôm lač leh hŏng Mtao Y-Đawit: “Ơ Khua Yang, ya kâo jing tơl ih uêñ hĕ kơ sa drei asâo djiê, msĕ si kâo anei?”
Si ngă drei thâo kral mơ̆ klei jăk amâo mâo knhal Khua Yang ngă leh kơ drei?
Ơ Khua Yang, bi mni kơ Ih kơ klei jăk Ih duah leh anăn bi mtlaih leh kâo, atăt ba kâo mŭt hlăm găp djuê Ih. Akâo kơ Ih đru kâo thâo hdơr knga kơ Khua Yang leh anăn dôk hdĭp ngă jăk kơ jih jang mnuih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 26:38-65
Kênh Youtube BHKTHN:
