Klei Ngă Jăk Kơ Mtao Y-Sôl – 5/6/2021

1334

 

 

Klei Aê Diê Blŭ: II Y-Samuel 1:1-12 

Êlan kliăng: “Đăm bi wĭt klei jhat kơ klei jhat arăng ôh, ƀiădah mĭn bĕ klei jăk ti anăp jih jang mnuih. Tơdah dưi, gĭr bĕ, dôk êđăp ênang hŏng jih jang mnuih.” (Rôm 12:17-18).

 

Klei êmuh ksiêm mĭn: Ya klei mrâo mrang Y-Đawit hmư̆ leh kơ Mtao Y-Sôl? Si ngă ênoh yuôm mơ̆ng klei mrâo mrang anei kơ Y-Đawit? Si knhuah ñu kdơ̆ng wĭt tơdah hmư̆ klei mrâo mrang anei? Si drei dưi hdĭp ngă jăk wăt kơ phung bi êmut ngă roh hŏng drei?

Khădah êkei dam Y-Đawit đru mtao Y-Sôl dưi leh hlăm klei bi blah hŏng Y-Gôliat mbĭt hŏng phung Philistin dưn, leh anăn wăt jing mah jiăng sĭt suôr hŏng Y-Jônathan anak êkei mtao, ƀiădah knŏng kyuadah mâo hĕ pruê̆ blŭ hlăm klei mmuñ phung mniê hơ̆k driâo drông: “Y-Sôl bi mdjiê leh lu êbâo čô, ƀiădah Y-Đawit lu pluh êbâo čô.” (I Y-Samuel 18:7) Anăn yơh, ngă hĕ kơ Mtao Y-Sôl nač ăl, leh anăn mơ̆ng năn yơh mtao amâo tuôm mdei ôh tiŏ čiăng bi mdjiê Y-Đawit. Êjai hlăk ñu tui tiŏ Y-Đawit, tăp năng mtao ăt tuôm mâo mơh mnĭt mmông djhưng ai tiê tơdah ñu hdơr mĭn wĭt kơ klei jăk êkei dam Y-Đawit ngă, dua bliư̆ ñu ngah amâo čiăng bi mdjiê mtao ôh wăt tơdah mâo mmông găl dưn (I Y-Samuel 24:1-8; 26:7-12). Khă snăn dưn, hlăk anăn klei nač iăng, klei bi êmut, klei ăl ngêñ yơh dôk bi kŭl atăt gai klei hdĭp Mtao Y-Sôl.

Hlăk anăn, êjai Y-Đawit mbĭt hŏng phung tui hlue ñu dôk hơ̆k kdơ̆k wĭt mơ̆ng klei dưi klei bi blah hŏng phung Amalek, snăn diñu kdjăt ñhăr hmư̆ sa klei “mrâo mrang mơak” mkăn, Mtao Y-Sôl leh anăn phung anak êkei ñu djiê leh hlăm klei bi blah. Pia gơ̆ “klei mrâo mrang mơak” kyuadah mơ̆ng hruê anei Y-Đawit amâo lŏ êran đuê̆ dăp kơ Mtao Y-Sôl ôh, leh anăn mâo klei dưi sĭt êmĭt dôk ti jhưng mtao yơh. Wăt pô êran nao hưn mthâo klei mrâo mrang ăt mĭndah snăn mơh, kyuanăn ñu bi plêč hĕ klei sĭt čiăng dưi mâo klei mưn kơ ñu, lač dah ñu pô yơh bi mdjiê leh Mtao Y-Sôl (êlan 2-10; II Y-Samuel 4:10). Mklăk wĭt hŏng klei pô hưn mthâo anăn hmăng hmưi, tơdah Y-Đawit hmư̆ hưn kơ Mtao Y-Sôl djiê leh, mbĭt hŏng klei phung ƀuôn sang Israel luč liê hlăm klei bi blah, “Snăn Y-Đawit djă ti ao ñu pô leh anăn hiêk gơ̆; leh anăn jih jang mnuih dôk mbĭt hŏng ñu ngă msĕ snăn mơh. Diñu kơŭ kyăm, hia, leh anăn kăm ƀơ̆ng huă tơl tlam” (êlan 11-12). Si ngă Y-Đawit kơŭ kyăm hia lĕ, kyua kơ hlei pô? “…kyua Y-Jônathan anak êkei gơ̆, kyua phung ƀuôn sang Yêhôwa, leh anăn kyua sang Israel, kyuadah diñu êbuh leh hŏng đao gưm.” Ƀiădah hlăm êlan 12 brei drei thâo, ñu ăt ruă ai tiê čŏk hia wăt “kyua Y-Sôl” mơh, kơ sa čô mnuih amâo thâo hdơr knga ôh, leh anăn dlăng kơ ñu msĕ si sa čô roh tơl amâo dưi đua mbĭt sa boh adiê ôh.

Bruă Y-Đawit ngă anăn, brei drei ƀuh ñu dôk dơ̆ng bŏ hŏng klei jăk, klei pap, ênuah ênô, wăt hŏng pô bi êmut ngă roh hŏng ñu. Mtao Y-Sôl dưi dlăng kơ Y-Đawit msĕ si roh ƀiădah Y-Đawit ăt ngă klei jăk kơ Mtao Y-Sôl nanao, thâodah êjai mtao dôk hdĭp amâodah djiê leh. Hlăm klei mmuñ čŏk hia kơ Mtao Y-Sôl leh anăn kơ Y-Jônathan anak mtao (êlan 17-27), amâo tuôm ƀuh ôh mâo hĕ sa boh blŭ pia čiăng bi hêñ amâodah bơ̆k bâo hĕ kơ klei soh Mtao Y-Sôl ngă, ƀiădah hrô kơ klei anăn jing klei bi mni kơ Mtao Y-Sôl jing sa čô “jhŏng ktang”.

Khua ƀĭng kna Y-Pôl mtô mtă kơ drei “Đăm bi wĭt klei jhat kơ klei jhat arăng ôh,” ƀiădah brei “mĭn bĕ klei jăk” leh anăn hŏng jih ai tiê gĭr dôk êđăp ênang hŏng jih jang mnuih. Akâo kơ Aê Diê pap brei, bi mtlaih drei mơ̆ng jih klei mĭn jhat, nač iăng leh anăn ăl ngêñ čiăng dưi hdĭp ngă klei jăk nanao, wăt kơ phung bi êmut ngă roh hŏng drei.

 

Si ngă drei dôk hdĭp thâo bi khăp, ngă jăk hŏng phung riêng gah drei leh mơ̆?

 

Ơ Khua Yang, akâo kơ Ih đru kâo hdĭp thâo bi khăp, ngă jăk kơ phung riêng gah kâo, wăt kơ phung dôk bi êmut čiăng ngă jhat kơ kâo. Akâo kơ Ih đru kâo bi êdah knhuah hdĭp jing sa čô anak Aê Diê.

 

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Dlăng Klei Aê Diê Blŭ hlăm tlâo thŭn: Klei Yap 24:15-25:18

Kênh Youtube BHKTHN:

https://www.youtube.com/channel/UCaSY8ebjVfMKhPups5jZ9yw

Bài trướcĐối Xử Nhân Từ Với Vua Sau-lơ – 5/6/2021
Bài tiếp theoUBYTXH – Thư Kêu Gọi Dự Phần Vào Quĩ Mua Vaccine