Klei Aê Diê Blŭ: I Y‑Samuel 15:1-9, 19-23
Êlan kliăng: “Nĕ anei, klei gưt asăp jing jăk hĭn kơ klei ngă yang, leh anăn klei dôk hmư̆ jing jăk hĭn kơ prăi biăp knô. Kyuadah klei bi kdơ̆ng jing msĕ si klei soh mdian, leh anăn klei khăng kŏ jing msĕ si klei wê leh anăn klei kkuh rup yang.” (I Y‑Samuel 15:22b-23a).
Klei êmuh ksiêm mĭn: Dơ̆ng mơ̆ng hruê đĭ jing mtao, ya klei soh mtao Y‑Sôl ngă leh? Grăp blư̆ ngă soh, si klei ñu dŏng mgang kơ klei ñu ngă? Ya jing boh tŭ mơ̆ng klei ñu amâo kmhal hưn klei soh ôh? Ya klei mñă kơ drei mơ̆ng klei hriăm anei?
I Y‑Samuel kdrêč 13 čih leh klei soh tal êlâo hĭn mtao Y‑Sôl ngă jing klei ñu pô čŏng myơr mnơ̆ng myơr čuh êlâo kơ Y‑Samuel truh. Tơdah êmuh: “Ya klei ih ngă leh?” Y‑Sôl wĭt lač, “Tơdah kâo ƀuh phung ƀuôn sang dơ̆ng bra đuĕ mơ̆ng kâo, leh anăn ih amâo truh ôh tui si hruê bi kčah leh, leh anăn phung Philistin bi kƀĭn leh ti ƀuôn Mikmas, kâo lač, ‘Ară anei phung Philistin srăng trŭn ngă kơ kâo ti ƀuôn Gilgal, leh anăn kâo amâo tuôm kwưh kơ klei Yêhôwa pap ôh.’ Snăn kâo mâo klei mgô̆ kâo pô leh anăn myơr hĕ mnơ̆ng myơr čuh.”(I Y‑Samuel 13:11-12). Mmông anei, hlăm kdrêč 15, mtao lŏ ngă klei soh tal dua. Hlăm ênuk mtao Y‑Sôl, phung kahan Amalek jing phung djuê mơ̆ng Y‑Êsau, jhat ƀai snăk sơưn kyuanăn Aê Diê mtă brei mtao Y‑Sôl bi rai mliêt jih jang mnơ̆ng phung ƀuôn sang anei, wăt êmô, biăp, aseh samô leh anăn aseh dliê msĕ si bi doh hĕ mta klei ruă bŏk brŭ hlăm asei mlei, đăm lui adôk sa mta ôh huĭdah diñu ngă jhat kơ phung ƀuôn sang Aê Diê (êlan 2-3). Ƀiădah mtao Y‑Sôl pioh dôk hdĭp mtao Amalek jing Y‑Agak, leh anăn phung biăp, êmô, hlô mnơ̆ng êmŏng, êđai biăp jăk hĭn, ngă mnơ̆ng plah mă, knŏng bi rai jih jang mnơ̆ng arăng bi êmut leh anăn mnơ̆ng amâo mâo yuôm ôh. Tơdah khua pô hưn êlâo Y‑Samuel êmuh, mtao Y‑Sôl amâo tŭ ư ôh klei ñu ngă soh leh ƀiădah wĭt lač ñu ngă djŏ leh tui si klei Yêhôwa mtă, ñu lŏ mplĕ kơ phung ƀuôn sang djă pioh hlô mnơ̆ng êmŏng čiăng yua ngă mnơ̆ng myơr ngă yang kơ Yêhôwa (êlan 21).
Jih dua blư̆ ñu ngă soh, mtao Y‑Sôl amâo tŭ ôh kơ klei soh ñu ngă ƀiădah lĕ lŏ dŏng mgang kơ klei soh ñu ngă. Tal êlâo ñu mplĕ kơ khua pô hưn Y‑Samuel kyua truh êla, ñu rŭng răng brei kơ phung ƀuôn sang kyuanăn yơh ñu myơr hĕ mnơ̆ng myơr čuh. Tal dua, ñu amâo djŏ knŏng mplĕ klei soh kơ phung ƀuôn sang ôh ƀiădah lŏ yua klei blŭ myang snăk mgang kơ klei djă pioh hlô mnơ̆ng jăk anăn kyua čiăng ngă mnơ̆ng myơr ngă yang kơ Yêhôwa! Mtao Y‑Sôl mĭndah ñu dưi mplư khua pô hưn êlâo Y‑Samuel tơdah dŏng mgang msĕ snăn, ƀiădah mtao wơr bĭt kơ Aê Diê jing Pô Thâo Jih, ya klei mtao ka blŭ ôh, Ñu thâo jih leh mơh (Klei Mmuñ Hđăp139:4). Boh tŭ mơ̆ng klei hngah kơ Klei Aê Diê Blŭ mtô lač, khăng kŏ amâo kmhal hưn klei soh ôh jing klei Aê Diê hngah leh anăn ñu amâo dưi lŏ jing mtao Israel ôh (êlan 23).
Klei jing anak mnuih tơdah ngă soh khăng duah êlan dŏng mgang pô ƀiădah amâo tŭ ôh klei soh pô ngă leh, amâo kmhal leh anăn hưn klei soh pô ngă ôh snăn mâo dưi mă tŭ ôh klei pap brei klei soh. Aê Diê thâo jih klei soh drei ngă ƀiădah Ñu čiăng kơ drei thâo hưn klei soh drei, kmhal sĭt leh anăn lui êlan soh snăn Ñu srăng pap brei klei soh leh anăn lŏ bi mrâo drei.
Si ngă drei kmhal sĭt, hưn klei soh leh anăn lui klei soh drei ngă leh mơ̆?
Wah lač: Ơ Khua Yang, bi mni kơ Ih kyuadah Ih lač klă leh wăt tơdah klei soh kâo jing hrah jŭ dưn Ih ăt bi kô̆ msĕ si mlâo biăp. Akâo kơ Ih đru kâo jhŏng hưn leh anăn lui klei soh kâo, čiăng Khua Yang pap brei leh anăn hơêč hmưi.
Dlăng Klei Aê Diê Blŭ hlăm tlâo thŭn: Y‑Êsra 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
