Klei Aê Diê Blŭ: Klei Mtô Mñă Klei Bhiăn 13:6-11
Êlan kliăng: “Đăm gưt kơ ñu amâodah dôk hmư̆ ñu ôh, kăn dlăng kơ ñu hŏng klei pap, kăn hơưi kơ ñu, kăn mdăp ñu rei” (Klei Mtô Mñă Klei Bhiăn 13:8).
Klei êmuh ksiêm mĭn: Trăn Klei Aê Diê Blŭ anei brei thâo mơ̆ng klei mplư hriê? Si Aê Diê mtă kơ phung ƀuôn sang Ñu ngă sĭt tlă anăp hŏng klei mplư anei? Ya klei bi kmhal kơ phung nao mplư găp djuê lui Aê Diê? Si drei khăng ngă sĭt tuôm hŏng klei găp djuê ngă jhat kyua klei đăo?
Y-Môis lač kơ klei mplư hriê mơ̆ng phung găp djuê siă suôr hlăm gŏ sang leh anăn phung ƀĭng găp sĭt suôr. Bi kngăr snăk leh ƀuh klei mplư amâo djŏ knŏng hriê mơ̆ng phung amâo thâo kral ôh ƀiădah ăt dưi hriê mơ̆ng phung mâo klei bi mguôp siă suôr hlăm sang. Klei mplư anei dưi ngă hgăm ƀiădah mâo klei hmăi leh anăn klei hmaĭ prŏng snăk. Kyua phung arăng mplư khăng amâo mđing gang mkhư̆ ôh kơ phung pô sĭt suôr anăn ênưih lĕ hlăm klei mplư. Kyua anăn, phung ƀuôn sang Israel brei păn kjăp tur knơ̆ng čiăng bi mklă klei soh jing: “Đăm ih lŏ mâo yang mkăn ôh ti anăp kâo” (Klei Kbiă 20:3). Tơdah găp djuê mplư drei lui Aê Diê čiăng kkuh mpŭ kơ yang mkăn snăn khut khat đăm hmư̆, amâo hlue ngă leh anăn ăt kăn mdăp rei kơ klei diñu ngă soh. Kyua klei soh bi kdơ̆ng hŏng Aê Diê jing sa klei soh kjham snăk, ngă soh hŏng Klei bhiăn tal sa hlăm klei bhiăn Aê Diê, leh anăn amâo hdơr knga ôh hŏng Pô bi mtlaih leh diñu mơ̆ng klei jing hlŭn čar Êjip.
Klei čŏng ngă soh hŏng klei bhiăn Aê Diê leh anăn bi kdơ̆ng hŏng Aê Diê jing sa klei soh kjham; mplư găp djuê pô nao hlăm êlan luč rai jing sa čô mnuih soh jhat. Kyua anăn brei diñu tŭ mă klei bi kmhal kjham hĭn. Aê Diê mtă brei kbhĭr boh tâo leh anăn phung tŭ klei arăng mplư jing pô kbhĭr klŏ boh tâo tal êlâo, leh anăn truh phung ƀuôn sang. Klei bi kmhal anei ăt jing klei kpĭ mjuăt kơ phung ƀuôn sang huĭ amâo jhŏng ngă soh msĕ snei ôh. Brei phung ƀuôn sang Aê Diê thâo săng klei bi mguôp plah wah diñu hŏng Aê Diê dưm mrô sa hĭn kơ klei bi mguôp hlăm gŏ sang leh anăn ƀĭng găp.
Hruê anei, lu mnuih čiăng đăo kơ Aê Diê ƀiădah huĭ kơ klei bi kdơ̆ng mơ̆ng gŏ sang. Lu mnuih ƀuh ruă ai tiê kyua bi ênguôt amĭ ama kyua đăo kơ Aê Diê. Ăt mâo mơh phung amâo thâo ôh si srăng ngă leh Aê Diê mtă brei thâo mpŭ kơ amĭ ama ƀiădah amĭ ama lŏ čiăng pô ngă klei mklă hŏng klei bhiăn Aê Diê. Klei hriăm hruê anei đru drei bi mklă klei bi mguôp plah wah drei hŏng Aê Diê brei dưm êlâo hĭn kơ klei bi mguôp hŏng gŏ sang amâodah ƀĭng găp. Ƀiădah ăt brei drei thâo mbruă hlăm klei bi êdah klei đăo leh anăn klei mĭn hdĭp pô hŏng găp djuê leh anăn ƀĭng găp. Brei yua klei hdĭp pô bi êdah klei huĭ mpŭ, bi khăp hluê si Klei Aê Diê Blŭ čiăng mâo mông găl ba lu găp djuê leh anăn ƀĭng găp pô đăo kơ Aê Diê.
Si ngă drei ngă sĭt tuôm hŏng klei găp djuê ngă jhat kyua đăo kơ Aê Diê?
Wah lač: Ơ Khua Yang, akâo kơ ih bi hriăm kâo thâo dưm klei huĭ mpŭ kơ Aê Diê jing prŏng hĭn kơ klei bi mguôp mkăn hlăm klei hdĭp kâo čiăng kơ djăp boh klei mâo kâo ăt sĭt suôr kkuh mpŭ kơ Ih leh anăn knŏng hjăn kơ Ih.
Dlăng Klei Aê Diê Blŭ hlăm tlâo thŭn: Y-Yôp 26:1-14; 27:1-23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
