II-Kevcai 13:6-11
Nqe cim:
“1os koj tsis txhob cia nws ntxias tau koj; tsis txhob mloog nws hais. Tsis txhob hmov tshua lossis hlub nws, thiab tsis txhob npog nws” (II-Kevcai13:8).
Lus nug rau sawvdaws xav:
- Ntu Vajluskub no hais txog kev haub ntxias los ntawm leejtwg? Thiab Vajtswv qhia kom Nws haiv neeg yuav tau ua li cas rau tej ntawd?
- Lub txim uas cov neeg haub ntxias nws tej kwvtij ntxeeb ze tso tus Tswv tseg yuav raug yog li cas?
- Peb pheej ua li cas thaum peb tej kwvtij txheeb ze tawm tsam peb txoj kev ntseeg?
Ib tsoom mloog txhua tus,
Mauxes hais txog qhov uas tej kwvtij txheeb ze lossis tej phoojywg haub ntxias tso Vajtswv tseg mus pe hawm lwm tus vajtswv. Peb xav tsis thoob, kev dag ntxias tsis yog muaj los ntawm tej neeg sab nraud xwb, tiamsis tseem muaj los ntawm yus tsev neeg thiab cov txheeb ze yus huv tibsi. Yam kev haub ntxias no saib txog yog ua los ntawm ntsiag to tiamsis muaj kuab kawg, rau qhov tus raug haub ntxias yeej tsis faj txog nws tej kwvtij, yog li ntawd nws yooj yim poob rau kev dag ntxias. Yog li ntawd, haiv neeg Yixalayees yuav tsum feeb meej yam txhaum yam yog los ntawm Vajtswv lus: “Tsis txhob pe lwm tus vajtswv, tiamsis pe kuv tib leeg xwb” (Khiavdim 20:3). Yog peb tej kwvtij neejtsa haub ntxias peb tso Vajtswv tseg mus pe lwm tus vajtswv, peb txiav tu nrho tsis mloog, tsis ua raws li lawv hais thiab tsis npog lawv kev hauv ntxias. Kev txhaum tawm tsam Vajtswv yog yam kev txhaum uas zam tsis tau, vim tsis ua raws li Vajtswv kaum nqe kevcai thiab tsis nco Vajtswv txiajntsig uas Nws pab dim kev ua cev qhev nram tebchaws Iziv.
Txhob txwm ua txhaum tus Tswv nqe kevcai yog kev txhaum muaj txim loj, coj yus cov kwvtij neejtsa mus pe hawm lwm tus vajtswv yog coj lawv mus raug kev puastsuaj. Yog li ntawd, cov neeg ua ntawd yuav raug kev rau txim hnyav kom tuag. Tus Tswv kom yuav tsum muab pobzeb txawb cov neeg haub ntxias li ntawd kom tuag, tus yuav txawb ua ntej yog peb thiab tom qab ntawd mam txog lwm tus txawb. Rau txim li ntawd rau cov neeg haub ntxias lwm tus tso Vajtswv tseg yog ua kom txhua tus ntshai thiaj tsis mus ua tej kev txhaum li ntawd. Vajtswv haiv neeg txhua tus yuav tsum paub meej hais tias, peb kev sib txuas nrog Vajtswv yog yam tseemceeb, saib qhov ntawd loj dua kev sib txuas nrog peb tej kwvtij txheeb ze thiab tej phoojywg.
Niaj hnub nimno, muaj qee leej xav los ntseeg tus Tswv tiamsis lawv ntshai tej kwvtij neejtsa thiab lawv tsev neeg tawm tsam. Ib txhia ntshai tsam mus ntseeg Vajtswv lawm yuav ua rau niam thiab txiv tu siab. Kuj muaj qee leej tsis paub yuav ua li cas thiaj zoo, rau qhov Vajtswv Txojlus qhia kom me nyuam yuav tsum fwm niam fwm txiv, tiamsis niam txiv ho yuam me nyuam mus ua tej yam uas tawm tsam Vajtswv tej kevcai. Zaj kawm hnub no qhia rau peb hais tias, peb yuav tsum muab kev sib txuas nrog Vajtswv tseemceeb dua kev sib txuas nrog peb tsev neeg thiab tej phoojywg. Peb kuj yuav tau paub ceev peb txoj kev ntseeg, paub ua neej qhia tshwm peb kev ntseeg rau tsev neeg thiab rau tej phoojywg. Peb yuav tau ua lub neej fwm niam txiv los ntawm pab niam txiv rau qhov zoo raws li Vajluskub qhia, kom muaj sijhawm coj tau tsev neeg los cuag tus Tswv.
Thov Vajtswv,
Tus Tswv, thov Koj qhia kom nyuam yaus nco ntsoov muab kev sib txuas nrog Koj ua qhov loj thiab tseemceeb hauv lub neej, kom nyuam yaus nyob rau ncua caij nyoog zoo li cas los yuav pe hawm Koj ib leeg mus li. Amees.
Ib tsoom cov mloog uas hmov thiab tshua,
Peb ua li cas thaum tej kwvtij haub ntxias kom peb tso Vajtswv tseg, lossis tsim txom peb thaum peb ntseeg lawm?
Nyeem Vajluskub hauv peb lub xyoo: Yauj 26:1-27:23
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
