Klei Aê Diê Blŭ: Y‑Luk 1:46-56
Êlan kliăng: “Ai mĭn kâo mâo klei mơak hlăm Aê Diê Pô Bi Mtlaih kâo.” (Y‑Luk 1:47).
Klei êmuh ksiêm mĭn: Hlei Aê Diê jing hlăm klei hdĭp H’Mari mmuñ bi mni? Ñu thâo leh ya bruă Aê Diê ngă leh kơ ñu? Si klei mmuñ bi mni kơ klei hơ̆k mơak drei dôk mmuñ hlăm klei hdĭp pô?
H’Mari mphŭn klei mmuñ bi mni kơ Aê Diê hŏng klei bi mni kơ Aê Diê (êlan 46). Ñu mmuñ bi mni kơ Aê Diê hlăm klei hơ̆k mơak jih ai tiê kyua thâo kral ya klei jăk Aê Diê ngă leh kơ ñu.
Tal sa, Aê Diê jing “Aê Diê Pô Bi Mtlaih” ñu (êlan 47). Ñu thâo pô knŏng jing mnuih soh jhat leh anăn ñu thâo Aê Diê jing Pô Bi Mtlaih sa anăn kơ ñu. Tal dua, Aê Diê jing Pô brei klei hơêč hmưi kơ ñu (êlan 48). Boh blŭ “dlăng leh” lač kơ klei thâo pô amâo năng ôh (kyua ñu jing mnuih Nasaret Galilê, sa anôk mnuih Yuđa dlăng hơaĭ mang) ƀiădah Aê Diê ăt khăp. Pô Aê Diê dlăng leh jing mnuih mâo klei hơêč hmưi. Tal tlâo, Aê Diê bi êdah klei myang Ñu hlăm H’Mari (êlan 49) hlăm dŭm bruă prŏng Ñu dôk ngă hlăm klei hdĭp ñu. Tal pă, Aê Diê bi êdah “klei pap” Ñu kơ H’Mari (êlan 50), leh anăn klei Aê Diê pap amâo jih ôh. Tal êma, Aê Diê jing Pô răng mgang leh anăn mkăp brei (êlan 51-53), Aê Diê jing Pô srăng bi dlưh phung mgao hŏng hdră brei diñu jing kngan mang, Ñu ăt bi mđĭ phung thâo luă gŭ, đru digơ̆ mơ̆ng tian êpa dưi trei mđao. Tal năm, Aê Diê jing Pô “sĭt suôr” Ñu djă pioh klei Ñu ƀuăn leh hŏng phung aê đưm, “Ƀiădah tơdah hruê bi kčah truh leh, Aê Diê tiŏ hriê Anak Ñu, brei sa čô mniê kkiêng, čiăng kơ Ñu dôk hdĭp ti gŭ klei bhiăn” (Galati 4:4).
Ti krah ala ƀuôn bŏ hŏng klei rŭng răng hruê anei, klei blah ngă, klei ruă tưp, luč bruă mă đĭ lu… ngă kơ drei amâo dưi mmuñ bi mni kơ klei hơ̆k mơak ôh. Ƀiădah tơdah ksiêm mĭn klei H’Mari mmuñ bi mni, drei thâo ñu ăt dôk hlăm klei bŏ hŏng rŭng răng leh anăn dleh dlan mơh.Wăt tơdah jing djuê ana Y‑Đawit ƀiădah hdĭp ti Nasaret ti Galilê, sa ƀuôn prŏng điêt phung Yuđa dlăng hơaĭ mang, wăt tơdah mrâo knŏng ƀuăn brei jing mô̆ Y‑Yôsep ƀiădah ñu ba tian Khua Yang Yêsu leh anăn tlă anăp hŏng klei arăng tlao mưč, kjham hĭn arăng srăng bhĭr boh tâo tơl djiê tui si klei bhiăn Yuđa (Bruă Lêwi 20:10). H’Mari ăt mmuñ klei mmuñ kơ klei hơ̆k mơak čiăng bi mni kơ Aê Diê kyua ñu thâo Aê Diê dôk hŏng ñu leh anăn ñu jing mnuih dưi mâo klei Aê Diê pap (Y‑Luk 1:28). Brei drei drông hruê bi hdơr kơ Khua Yang Yêsu hriê hlăm klei mơak kyua thâo Khua Yang hriê leh, wăt tơdah ăt adôk mâo lu klei dleh dlan lông dlăng ƀiădah brei drei thâo Khua Yang jing Pô bi mtlaih drei, Ñu ăt bi êdah klei myang leh anăn klei pap hŏng drei, Ñu ăt kiă kriê, răng mgang leh anăn mkăp kơ drei, leh anăn Ñu sĭt suôr nanao hŏng drei.
Ya klei dôk ngă kơ drei amâo dưi hơ̆k mơak mmuñ bi mni kơ Aê Diê?
Wah lač: Ơ Khua Yang, akâo kơ Ih lăm lui jih klei rŭng răng kơ klei dôk mâo riêng gah kâo, akâo kơ Ih đru kâo thâo Khua Yang Yêsu hriê leh leh anăn Ih ba klei hơ̆k mơak lă lar kơ kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 18:19-37
Kênh Youtube BHKTHN:
